بھارت کا جبر اور بربریت کسی صورت قبول نہیں،وزیراعظم

0
118

وزیراعظم نواز شریف نے کہا ہے کہ پاکستان کبھی کشمیریوں کےحق خودارادیت کی حمایت سےپیچھےنہیں ہٹےگا،اقوام متحدہ کی جنرل اسمبلی کے فورم پر کشمیریوں پر بھارتی مظالم کا معاملہ اٹھاؤں گا، عالمی برادری کو اپنی خاموشی توڑنی پڑے گی، بھارت کا جبر اور بربریت کسی صورت قابل قبول نہیں۔

ان خیالات کا اظہار وزیراعظم نواز شریف نے آزادکشمیر کےصدرمسعود خان، وزیراعظم راجہ فاروق حیدر اورکشمیری قیادت سےملاقاتوں کے دوران کیا۔

اقوام متحدہ کی جنرل اسمبلی میں خطاب کے لئے روانگی سے پہلے وزیر اعظم میاں نواز شریف کشمیری قیادت کو اعتماد میں لینے مظفرآباد پہنچے ہیں۔

کشمیری قیادت سے ملاقاتوں میں وزیراعظم نے کہا کہ وقت آگیا کہ کشمیریوں کی خواہش کے مطابق مسئلہ کشمیر حل کیا جائے ۔

انہوں نے کہا کہ اقوام متحدہ جانے سے پہلے کشمیری قیادت اورحریت رہنماؤں کو اعتماد میں لینا چاہتا تھا۔

مظفرآبادمیں وزیراعظم نواز شریف سے صدر اور و زیراعظم آزاد کشمیر کے علاوہ حریت کانفرنس کے وفد نے بھی ملاقات کی ۔کشمیری رہنماؤں نے وزیراعظم کو مسئلہ کشمیر کے حل سے متعلق تجاویز بھی دیں۔

قبل ازیں وزیراعظم نواز شریف آزاد کشمیر پہنچے تو صدر آزاد کشمیرمسعود خان اوروزیراعظم راجہ فاروق حیدرنے ان کا استقبال کیا۔

SHARE

LEAVE A REPLY