پاکستان اور سری لنکا کے درمیان2 ٹیسٹ میچوں پر مشتمل سیریز کا دوسرا اور آخری ٹیسٹ دبئی میں جاری ہے۔میچ میں چائے کے وقفے تک لنکن ٹیم نے 4 وکٹ پر 355 رنز اسکور کرلیے ہیں۔
لنکن ٹیم کی جانب سے اوپنر دیموتھ کرونا راتنے 170 رنز کے ساتھ ناٹ آئوٹ ہیں جبکہ نروش ڈکویلا 47 رنز پر کھیل رہے ہیں۔
پاکستان کو آج میچ کے دوسرے دن پہلی کامیابی لنکن کپتان دنیش چندیمل کی صورت میں ملی جنہیں یاسر شاہ نے 62 کے اسکور پر ایل بی ڈبلیو کیا تھا۔
اس کے بعد قومی ٹیم لنکن بیٹسمینوں کو آئوٹ یا پریشان کرنے میں بری طرح ناکام رہی اور لنکن ٹیم اپنے اسکور میں آرام سے اضافہ کر رہی ہے۔
اس سے قبل سری لنکن ٹیم نے 254 رنز 3کھلاڑی آؤٹ پر اپنی اننگز آگے بڑھائی۔ناٹ آؤٹ بیٹسمین کرونا رتنے 133 رنز اور چندی مل 49 رنز کے ساتھ میدان میں اترے تھے۔
گزشتہ روز پاکستان کے خلاف سیریز کے دوسرے اور آخری ٹیسٹ میچ کے پہلے دن سری لنکا نے90 اوور میں 3وکٹوں پر254رنز بنائے تھے ،چوتھی وکٹ پر کرونارتنے اور کپتان چندی مل نے 118رنز کی شراکت قائم کی۔
اوپننگ بیٹسمین کرونارتنے سنچری بنانے میں کامیاب رہے ،انہوں نے دن کے اختتام تک 15چوکوں اور 1چھکے مدد سے 133رنز بنائے جبکہ کپتان چندی مل نے 5بار گیند کو بائونڈری سے باہر کا راستہ دکھایا۔
اس سے قبل گرین کیپس کے خلاف سیریز میں 0-1کی برتری رکھنے والے کپتان چندی مل نے ٹاس جیت کر بیٹنگ کا فیصلہ کیا۔ سری لنکا کی پہلی وکٹ 63 کے اسکور پر گری جب کشال سلوا 27رنز بنا کر یاسر شاہ کا شکار بنے ۔
دوسری وکٹ پر کرونارتنے نے سماراوکراما کے ساتھ مل کر 68رنز جوڑے ،131 کے مجموعی اسکور پر سماراوکراما کو محمد عامر نے پویلین کی راہ دکھائی وہ ایک چھکے اور 5چوکوں کی مدد سے 38رنز بنانے میں کامیاب رہے ۔
ڈے نائٹ میچ میں چائے کے وقفے سے کچھ دیر پہلے سری لنکا کی تیسری وکٹ بھی گر گئی، یاسر شاہ نے مینڈس کو ایک کے انفرادی اسکور پر اسد شفیق کی مدد سے قابو کیا تو لنکن ٹیم کے 3 کھلاڑی 136 پر پویلین لوٹ چکے تھے۔
چوتھی وکٹ پر کرونارتنے کا ساتھ دینے کے لئےکپتان چندی مل میدان میں اترے ،اس دوران دونوں بیٹسمینوں نے پاکستانی بائولنگ لائن کو کوئی وکٹ دینے سے انکار کردیا اور گرائونڈ میں کئی خوبصورت اسٹروک کھیلے۔
اس دوران کرونارتنے نے سنچری 198 گیندوں پر 14 چوکوں کی مدد سے مکمل کی یہ ٹیسٹ کرکٹ میں ان کی ساتویں سنچری ہے جبکہ وہ سیریز کے پہلے ٹیسٹ میچ کی پہلی اننگ میں 93رنز بنانے میں کامیاب رہے تھے۔
سرفراز احمد سری لنکن بیٹنگ لائن اپ میں دراڑ ڈالنے کے لئے 6باولرز آزمائے جن میں سے یاسر شاہ 90رنز کے عوض 2 جبکہ محمد عامر 59رنز دے کر ایک وکٹ لینے میں کامیاب رہے۔ سنچری میکر کرونارتنے وہاب ریاض، محمد عباس، حارث سہیل اور اسد شفیق کی گیندوں کو کامیابی کھیلنے میں کامیاب رہے ۔
پاکستان نے دوسری ٹیسٹ میچ میں فاسٹ بولر حسن علی کی جگہ وہاب ریاض کو شامل کیا ہے جبکہ سری لنکا نے دو تبدیلیاں کی اور لکشن سنداکان کی لہیرو کمیج کو جبکہ زخمی تھرمانے کی جگہ سماراوکراما کو ٹیم میں جگہ دی ہے ۔
سری لنکا کے ہاتھوں اگر قومی ٹیم کو شکست ہوئی تو پاکستانی ٹیم 7 سال بعد پہلی مرتبہ ٹیسٹ کرکٹ کی عالمی رینکنگ میں ساتویں نمبر پر چلی جائے گی، اس وقت قومی ٹیم چھٹی پوزیشن پر براجمان ہے۔
یاد رہے سری لنکن ٹیم نے آج اپنا پہلا ڈے نائٹ ٹیسٹ میچ گلابی گیند سے کھیلا ہے جب کہ پاکستانی ٹیم کا یہ تیسرا ڈے نائٹ ٹیسٹ میچ ہے

SHARE

LEAVE A REPLY