چیف الیکشن کمشنر اور ای سی پی کے 2 ممبران کی تقرری کے لیے ناموں کو حتمی شکل دینے کے لیے پارلیمانی کمیٹی کا اجلاس ایک مرتبہ پھر ملتوی ہوگیا۔
اس حوالے سے وزیر دفاع پرویز خٹک نے کہا ہے کہ پارلیمانی کمیٹی کا اجلاس اب کل طلب کیا گیا ہے۔
انہوں نے مزید کہا کہ اس معاملے میں اپوزیشن جماعتوں کے ساتھ رابطے جاری ہیں، امید ہے کہ اچھا نتیجہ سامنے آئے گا۔
وزیر دفاع کا یہ بھی کہنا تھا کہ وہ لو اور دو نہیں کر رہے، جو بہترین ہوگا اس کا انتخاب کریں گے۔
خیال رہے کہ چیف الیکشن کمشنر اور 2 اراکین کی تقرری کے معاملے میں اب تک حکومت اور اپوزیشن حتمی نتیجے پر نہیں پہنچ سکے ہیں۔
اس حوالے سے حکومتی اراکین کا ماننا ہے کہ معاملہ جلد حل ہوجائے گا جبکہ اپوزیشن اراکین کا ماننا ہے کہ اس معاملے میں ڈیڈلاک برقرار ہے۔
ایک روز قبل وزیراعظم عمران خان نے ایک مرتبہ پھر وزیر دفاع پرویز خٹک کو اپوزیشن اور اتحادی جماعتوں سے رابطوں کا ٹاسک دیا تھا۔
وزیراعظم نے اپوزیشن اور اتحادیوں کے ساتھ رابطوں کا ٹاسک دے دیتے ہوئے وزیر دفاع کو ہدایت کی کہ وہ اپوزیشن کے ساتھ مل کر قانون سازی کی راہ ہموار کریں۔
……………………….
وزیراعظم کے زیر صدارت اہم اجلاس میں انہوں نے چیف الیکشن کمشنر کی تقرری پر اپوزیشن سے مل کر جلد فیصلہ کرنے کی ہدایت کر دی ہے۔
وزیراعظم عمران خان سے سپیکر قومی اسمبلی اسد قیصر اور سینیٹ میں قائد ایوان شبلی فراز سمیت وزیر دفاع پرویز خٹک، وزیر منصوبہ بندی اسد قیصر، وزیر برائے پارلیمانی امور اعظم سواتی اور وزیر مملکت علی محمد خان کی ملاقات ہوئی۔
ذرائع کے مطابق وزیراعظم نے قانون سازی کے معاملات میں تیزی لانے کی ہدایت کی۔ اجلاس میں چیف الیکشن کمشنر کی تقرری اور آرمی چیف کی مدت ملازمت میں توسیع بارے قانون سازی پر مشاورت ہوئی اور فیصلہ کیا گیا حکومت اس سے متعلق قانون سازی کے لیے سپریم کورٹ کے تفصیلی فیصلے کا انتظار کرے گی۔ سپریم کورٹ کا تفصیلی فیصلہ آنے کے بعد قانون سازی کا فیصلہ کیا جائے گا۔
حکومت کا تفصیلی فیصلے کی روشنی میں نظر ثانی اپیل بھی دائر کر سکتی ہے۔ اجلاس میں قانون سازی کے لئے ایوان کا ماحول سازگار بنانے پر بھی مشاورت ہوئی۔ وزیراعظم نے چیف الیکشن کمشنر کی تقرری بارے اپوزیشن سے مل کر جلد فیصلہ کرنے کی ہدایت کی۔
