پیرس حملوں میں مبینہ طور پر ملوث صالح عبدالسلام کو بیلجیم کی پولیس پر فائرنگ کے الزام میں بیس سال قید کی سزا سنا دی گئی ہے۔ بیلجیم کی ایک عدالت نے اس مراکشی نژاد فرانسیسی شہری کو دہشت گردانہ سوچ کے تحت اقدام قتل میں قصووار قرار دے دیا ہے۔
نومبر 2015ء کے پیرس حملوں میں ملوث اس اٹھائیس سالہ ملزم کے خلاف یہ پہلا عدالتی فیصلہ ہے۔ اس واقعے کے کئی ماہ بعد مارچ 2016ء میں اس مفرور ملزم کو برسلز کے ایک نواحی علاقے سے گرفتار کیا گیا تھا۔ اس موقع پر عبدالسلام کی فائرنگ سے کئی پولیس اہلکار زخمی ہو گئے تھے۔
