پیرس کا ایفل ٹاور ایرانی خواتین کے حق میں جگمگا اٹھا

0
951

پیرس کا ایفل ٹاور ایران میں اپنے حقوق کیلئے لڑنے والی خواتین کے حق میں جگمگا اٹھا۔

ایفل ٹاور پر لائٹنگ کے ساتھ خواتین کو زندگی اور آزادی دو کے نعرے درج کیے گئے، اس موقع پر شہریوں کی بڑی تعداد بھی موجود تھی جنہوں نے ایرانی حکومت کیخلاف شدید نعرے بازی کی۔

گزشتہ ہفتے ایران میں برطانوی نژاد ایرانی شہری کو پھانسی دی گئی تھی جس پر فرانس نے ایرانی سفیر کو بطور احتجاج طلب کر کے تشویش کا اظہار کیا تھا۔

واضح رہے کہ ایران میں 13 ستمبر 2022 کو مہسا امینی کے اخلاقی پولیس کے ہاتھوں قتل کے بعد سے احتجاج کا سلسلہ جاری ہے۔

مہسا امینی کو ٹھیک سے اسکارف نہ پہننے پر تہران میں اخلاقی پولیس نے گرفتار کیا تھا، حراست کے دوران انہیں مبینہ طور پر تشدد کا نشانہ بنایا گیا جس کے باعث وہ کوما میں چلی گئی اور تین دن اسپتال میں زیر علاج رہنے کے بعد دم توڑ گئی تھی۔

مہسا امینی کے قتل کیخلاف ہونے والے مظاہروں کو طاقت سے کچلنے کے دوران پولیس کی فائرنگ سے درجنوں مظاہرین ہلاک اور زخمی ہوئے جبکہ سیکڑوں مظاہرین کو گرفتار بھی کیا گیا جو اس وقت مختلف جیلوں میں قید ہیں۔

ایران کی جانب سے مظاہروں میں ملوث ہونے کے الزام میں متعدد افراد کو پھانسی پر لٹکایا جاچکا ہے جس کی وجہ سے دنیا بھر میں تہران کیخلاف شدید احتجاج کیا جارہا ہے۔

SHARE

LEAVE A REPLY