نیوزی لینڈ کےآرٹسٹ نے کرائسٹ چرچ کے ہیرو شہید نعیم رشید کو خراج عقیدت پیش کرنے کے لئے دیوار پر ان کی یادگار تصویر بناڈالی، تصویر میں سبز رنگ پاکستان اورسیاہ رنگ نیوزی لینڈکی عکاسی کرتاہے۔
تفصیلات کے مطابق نیوزی لینڈ کے شہر آکلینڈکے آرٹسٹ پال نے کرائسٹ چرچ میں شہید نعیم رشید کو خراج عقیدت پیش کیا اور ایک دیوار پر نعیم رشید کی کی یادگار تصویر بنائی، تصویر پر پیغام میں لکھا “ہیروکی یاد میں” اور ساتھ ہی حملے کی تاریخ بھی لکھی۔
پال کا کہنا ہے کہ تصویر میں سبز رنگ پاکستان اورسیاہ رنگ نیوزی لینڈکی عکاسی کرتاہے، ہم غم میں شامل ہیں۔ نعیم اورشہداہمیشہ یاد رہیں گے۔
یاد رہے پاکستان کے ہیرو نعیم راشد جنہوں نے کرائسٹ چرچ میں جان پر کھیل کر نمازیوں کو بچانے کی کوشش کی اور اسپتال میں زخموں کی تاب نہ لاکردم توڑگئے، ان کے بیٹے طلحہ بھی فائرنگ میں جاں بحق ہوگئے تھے۔
نعیم رشید کاتعلق ایبٹ آباد سے تھا، وہ نیوزی لینڈ میں ٹیچنگ کرتے تھے۔
واضح رہے نیوزی لینڈ کے علاقے کرائسٹ چرچ میں سفید فام شخص نے دو مساجد پر اُس وقت فائرنگ کی تھی کہ جب وہاں نمازِ جمعہ کی ادائیگی کے لیے مسلمانوں کا اجتماع شروع ہونا تھا۔
فائرنگ کے واقعے میں 49 مسلمان شہید جبکہ متعدد نمازی شدید زخمی ہوئے، ملزم نے اپنے گھناؤنے عمل کی ویڈیو سوشل میڈیا پر براہ راست نشر کی تھی۔
