لوح ِ قرآنی کی زینت چودہ حروف ِ مقطعات ہیں۔جو قرآن حکیم فرقان ِ مجید کی سورتوں میں آئے ہیں ۔ ان تمام حروف ِ مقطعات کے مفاہیم و مطالب کاعلم کسی کو نہیں کیونکہ یہ اللہ تبارک وتعالی ٰ اور نبی ء رحمت صلی اللہ علیہ وآلہ وسلم کے مابین ایک راز ہے۔ ان حروف ِمقطعات کو زمینوں اور آسمانوں کے خزائن کی کُنجیوں کانام بھی دیا گیا ہے۔یہ تمام حروف ِ مقطعات ایسے ہیں ،جنہیں ملا کر نہیں بلکہ الگ الگ پڑھا جاتاہے۔مفسرین نے بھی ان کے حوالے سے بڑی حد تک خاموشی اختیارکئے رکھی ہے اور ان حروف ِمقطعات کے معانی بیان کرنے سے گریزاں نظرآتےہیں۔نبی ء رحمت صلی اللہ علیہ و آلہ وسلم نےان کے حوالے سے جو بلیغ اشارے دئیے ہیں ،ان کی بنیاد پر بعض اولیاء، صوفیاء اور مشائخ نےاللہ تبارک و تعالیٰ اور نبیء رحمت صلی اللہ علیہ وآلہ وسلم کے مابین اس راز کو جاننے اور سمجھنے کی کوشش ضرور کی ہے۔اس حوالے سے نثر اور نظم میں بہت کم کام ہواہے ۔ معروف شاعر اہل ِ بیت ِ اطہار سید عارف معین بلے نےلوح ِ قرآنی کےء تمام حروف ِ مقطعات کی بنیاد پر مدحیہ شاعری کی ہے۔اس سے پہلے اردو ادب میں ایسا کوئی تخلیقی اور تحقیقی تجربہ نہیں کیا گیا۔لوح ِ قرآنی اور اسماء النبی صلی اللہ علیہ و آلہ وسلم کے موضوع پر سید عارف معین بلے کی مدحیہ شاعری آپ ملاحظہ فرماچکے ہیں ۔ اب آپ ملاحظہ فرماسکیں گے ۔لوح قرآنی کے حروف ِ مقطعات کی بنیا د پرسیدعارف معین بلے کی بہت سی نعتیں ۔ فی الحال ۔ ن ۔ والقلم وما یسطرون کے حوالے سے ایک نعت بارگاہ ِ رسالت مآب صلی اللہ علیہ و آلہ وسلم میں پیش کرنے کی سعادت حاصل کی جارہی ہے ۔ اس مدحیہ شاعری کا عنوان ہے۔ ن۔ جو حروف ِ مقطعات میں سے ایک ہے ۔ بلاشبہ ۔ق۔ بھی حروف ِ مقطعات میں شامل ہے ۔انہوں نے اس نعت میں حرف ۔ق۔ اور۔ ن۔ دونوں حروف ِ مقطعات کےذکر ِ خیر کے ساتھ اپنا شعری رنگ دکھایا ہے۔ لیکن ان کی نعت کامرکز اورمحور ۔ن۔ ہی ہے۔ آپ ۔ن۔ کی بنیاد پر ان کی مدحیہ شاعری دیکھئے اور سوچئیے کہ سید عارف معین بلے نے اپنے تخلیقی جوہر دکھاتے ہوئے کن کن زاویوں سےمدح سرائی کی ہے۔۔۔۔{ادارہ}
نعت ِ رسول ِ مقبول ﷺ ۔ن ۔ والقلم وما یسطرون
مدحت نگار: سیدعارف معین بلے
ن بھی اسمِ گرامی ہے مرے سرکار ﷺکا
ق بھی ہے نامِ نامی احمدِ مختار ﷺ کا
۔۔۔۔۔۔۔۔۔۔۔۔۔۔۔۔۔۔۔۔
ق ہو یا ن دونوں حرف ہیں قرآن میں
اور یہ قرآن اُترا ہے نبی ﷺکی شان میں
۔۔۔۔۔۔۔۔۔۔۔۔۔۔۔۔۔۔۔۔
ن کیا ہے؟ نون ہے بے شک نشانی نور کی
ن میں مستور ہے مولا کہانی نور کی
۔۔۔۔۔۔۔۔۔۔۔۔۔۔۔۔۔۔۔۔
ن کیا ہے؟ نور ہے اور نور کا مظہر ہیں آپ
سربسر ہیں نور ﷺمولا، نور کا پیکر ہیں آپ
۔۔۔۔۔۔۔۔۔۔۔۔۔۔۔۔۔۔۔۔
ن سے بے شک نبی ء خاص ﷺ ہے رب کی مراد
ن سے ممکن ہے کہ مطلوب ہو دیں کی نہاد
۔۔۔۔۔۔۔۔۔۔۔۔۔۔۔۔۔۔۔۔
ن سے ہے نعمت اللہ، ن سے بے شک نجات
ن کے پردے میں کی ہے ناطق بالحق کی بات
۔۔۔۔۔۔۔۔۔۔۔۔۔۔۔۔۔۔۔۔
ن سے ناطق بھی ہے، ناجز بھی ہے،ناشر بھی ہے
ن سے ناصح بھی ہے،ناظر بھی ہے،ناصر بھی ہے
۔۔۔۔۔۔۔۔۔۔۔۔۔۔۔۔۔۔۔۔
ن سے ہے نجمِ ثاقب، ن سے بے شک نقیب
النذیر ﷺ و النصیح و النجید و النجیب
۔۔۔۔۔۔۔۔۔۔۔۔۔۔۔۔۔۔۔۔
ن سے ناسک بھی ہے، ناسخ بھی، ناہی بھی حضور
ن سے نورِ مجسم ﷺ ہی کا ہے مقصود نور
۔۔۔۔۔۔۔۔۔۔۔۔۔۔۔۔۔۔۔۔
ن بے شک نام ہے رب کی نوازشات کا
ن اِک آئینہ ہے نورانی تعلیمات کا
۔۔۔۔۔۔۔۔۔۔۔۔۔۔۔۔۔۔۔
ن اک نغمہ ہے بے شک سید الثقلین کا
ن ہے اک نام نعتِ سرورِ کونین ﷺکا
۔۔۔۔۔۔۔۔۔۔۔۔۔۔۔۔۔۔۔۔
ن ہے حنان میں، اور ن ہے برہان میں
اَن گنت جلوے ہیں بے شک ن کے قرآن میں
۔۔۔۔۔۔۔۔۔۔۔۔۔۔۔۔۔۔۔۔
امن میں،مامون میں، بے شک اماں میں ن ہے
مان لیجے سرورِ کون و مکاں ﷺ میں ن ہے
۔۔۔۔۔۔۔۔۔۔۔۔۔۔۔۔۔۔۔۔
زینت ِ قرآن میں ہے، سورہ ء رحمان میں
ن جنت میں ہے بے شک، ن ہے ایمان میں
۔۔۔۔۔۔۔۔۔۔۔۔۔۔۔۔۔۔۔۔
اللہ اللہ سورہ ء یاسین میں بھی ن ہے
مرحبا طس کی آواز میں بھی ن ہے
۔۔۔۔۔۔۔۔۔۔۔۔۔۔۔۔۔۔۔۔
ہے قسم مولا قلم کی، اِس کے لکھنے کی قسم
ن کے مفہوم کی ابجد نہیں سمجھے ہیں ہم
۔۔۔۔۔۔۔۔۔۔۔۔۔۔۔۔۔۔۔۔
حسن ہے منزل کا بے شک، زینتِ منبر ہے ن
ن سے ناظر یقیناً حاصلِ منظر ہے ن
۔۔۔۔۔۔۔۔۔۔۔۔۔۔۔۔۔۔۔۔
ن سے بے شک نظر ہے، یہ نظر کا کھیل ہے
زاویہ ہے دیکھنے کا، یہ ہنر کا کھیل ہے
۔۔۔۔۔۔۔۔۔۔۔۔۔۔۔۔۔۔۔۔
ن کی تنویر ہے جنات میں، انسان میں
ن جلوہ گر نظر آیا مجھے فرمان میں
۔۔۔۔۔۔۔۔۔۔۔۔۔۔۔۔۔۔۔۔
ہے نظر کا یہ نگاہِ معتبر کا نام ہے
ن بے شک نسبتِ خیرالبشر ﷺکانام ہے
۔۔۔۔۔۔۔۔۔۔۔۔۔۔۔۔۔۔۔۔
ہے زمیں میں ن بے شک، آسماں میں ن ہے
غور کیجے تو یہ کھلتا ہے جہاں میں ن ہے
۔۔۔۔۔۔۔۔۔۔۔۔۔۔۔۔۔۔۔۔
ہے سمندر میں یقیناً، ہے سفینے میں بھی ن
ن ہے سلطان ِ مکہ ﷺمیں،مدینے میں بھی ن
۔۔۔۔۔۔۔۔۔۔۔۔۔۔۔۔۔۔۔۔
ن میں مخفی معانی،ہے معانی میں بھی ن
آپ ﷺ اللہ کی نشانی اور نشانی میں بھی ن
۔۔۔۔۔۔۔۔۔۔۔۔۔۔۔۔۔۔۔۔
البیاں میں ن ، القرآن، الفرقان میں
ن اُترا ہے مرے پیارے نبی ﷺکی شان میں
۔۔۔۔۔۔۔۔۔۔۔۔۔۔۔۔۔۔۔۔
ن مظہر نُدرتوں کا ہے، نوازشات کا
ہے اشارہ ن مولا ﷺ کی نوادرات کا
۔۔۔۔۔۔۔۔۔۔۔۔۔۔۔۔۔۔۔۔
دین ہے،ایمان ہے، قرآن ہے،رمضان ہے
لفظ ہے جو بھی کلیدی،ن اس کی جان ہے
۔۔۔۔۔۔۔۔۔۔۔۔۔۔۔۔۔۔۔۔
دین کا بے شک مبیں کا حرفِ آخر ن ہے
مولا ختم المرسلیں ﷺ کا حرفِ آخر ن ہے
۔۔۔۔۔۔۔۔۔۔۔۔۔۔۔۔۔۔۔۔
ن سے بے شک توازن بھی ہے المیزان کا
ن ہے واللہ حرفِ آخریں ایمان کا
۔۔۔۔۔۔۔۔۔۔۔۔۔۔۔۔۔۔۔۔
ن ہے نورِ ازل ﷺ، نورِ ہدایت ن ہے
ن نورِ حق ہے، ناموسِ رسالت ن ہے
۔۔۔۔۔۔۔۔۔۔۔۔۔۔۔۔۔۔۔۔
ن ہے نادِ علی میں، پنجتن میں ن ہے
بنتِ پیغمبر میں ہے،مولا حسن میں ن ہے
۔۔۔۔۔۔۔۔۔۔۔۔۔۔۔۔۔۔۔۔
غور تو کیجے حسین ابنِ علی میں ن ہے
ہے نمازِ عشق میں بھی، روشنی میں ن ہے
۔۔۔۔۔۔۔۔۔۔۔۔۔۔۔۔۔۔۔۔
جلوہ ہے دنیا و دیں میں ن کی تنویر کا
حق ادا کیسے ہو سوچو “نون” کی تفسیر کا
۔۔۔۔۔۔۔۔۔۔۔۔۔۔۔۔۔۔۔۔
موتی میزانِ لُغت میں یہ نہیں تولے گئے
مولا ﷺ ہم پہ نو ن کے معنی نہیں کھولےگئے
۔۔۔۔۔۔۔۔۔۔۔۔۔۔۔۔۔۔۔۔
[ قران ِ حکیم کےچودہ حروف ِ مقطعات کی بنیاد پر سیدعارف معین بلے نے جومدحیہ شاعری کی ہے،اس میں سے کچھ شعری نگارشات منظرعام پرآچکی ہیں اوریہ نعت ِ رسول مقبول ﷺ ۔ن ۔والقلم وما یسطرون اسی سلسلے کی کڑی ہے۔ ادارہ ]
نعت ِ رسول ِ مقبول ﷺ ۔ن ۔ والقلم وما یسطرون
مدحت نگار: سیدعارف معین بلے
