آئینہ ادراک , ڈاکٹرمحمد نعمان طیب‎‎

0
1634

ریختہ کے حوالے سے
آج ایک دوست کی غزل سنی جو اچھے شاعر ہیں مگر قافیہ ، ردیف ، بحر اور زمین میں عدم توازن سے دل برداشتہ ہوا۔ کچھ بنیادی اصول مثالوں کے ساتھ عرض ہیں تاکہ اردو میں نظم کا جو اعلیٰ ترین معیار ہے اسے قائم رکھا جا سکے ۔

ردیف اور قافیہ دراصل شعری اصطلاحات کے اجزاء ہیں۔ ان کے بغیرصنفِ نظم کا تصور بھی نہیں کیا جا سکتا۔جس طرح شاعری میں بحور اور زمیں خاص اہمیت کی حامل ہیں بالکل اسی طرح ردیف اور قافیہ اصنافِ نظم کے لیے ریڑھ کی ہڈی کی طرح ہیں۔ ان کے بغیر نظم ،نظم نہیں لگتی اوران کے بغیر اصنافِ نظم میں ترنم بھی پیدا نہیں ہوتا۔
قافیہ لفظ قفو سے ہے جس کے معنی پیروی کرنے کےاور پیچھے آنے والے کے ہیں۔اردو ادب میں قافیہ ایسے الفاظ کو کہا جاتا ہے جو اشعار میں الفاظ کے ساتھ غیر مسلسل طورپر آخر میں بار بار آتے ہیں۔یہ الفاظ بعض وقت غیر ضروری معلوم ہوتے ہیں مگر ہٹا دیئے جانے پر بھی خلا پیدا کر جاتے ہیں۔اس لیے ترنم اور تسلسل کو قائم رکھنے کے لیے قافیہ کا استعمال لازم و ملزوم تصور کیا جاتا یے۔اس کی ایک خوبصورت مثال ملاحظہ فرمائیں؛

دلِ ناداں تجھے ہوا کیا ہے
آخر اس درد کی دوا کیا ہے

مندرجہ بالا شعر میں ۔ہوا۔ اور ۔دوا۔ قوافی ہیں۔

ردیف کےمعنی گھڑ سوار کے پیچھے بیٹھنے والے کے ہیں۔ شعری اصطلاح میں ردیف سے مراد قافیہ کے بعد آنے والے وہ الفاظ ہیں جو مکرر آتے ہوں۔ اور یکساں بھی ہوں مگر ردیف پر مصرعے میں آئے یہ بھی لازم نہیں ہوتا۔ یہ بعض وقت غزل کے مصرعہِ ثانی میں تکرار سے بھی آتا ہے۔اس کی ایک اور تعریف یوں بھی کی جاتی ہے کہ۔ قافیہ کے بعد جو الفاظ مسلسل تکرار سے آئیں ردیف کہلاتا ہے۔ ایک عمدہ مثال ملاحظہ فرمائیں؛

نقش فریادی ہے کس کی شوخیِ تحریر کا
کاغذی کے پیرہین ہر پیکرِ تصویر کا

اس شعر میں دونوں مصرعوں میں موجود ۔ کا۔ ردیف کہلاتا ہے
*علم قافیہ*
علم قافیہ ایک ایسا علم ہے جس میں قافیہ سے آگاہی ہوتی ہے۔
قافیہ کی تعریف
پابندِ بحور شاعری کی درجِ ذیل اصناف پر غور کیجئے۔ سب سے نمایاں
غزل ہے،
قطعہ ہے،
رباعی ہے،
مثنوی ہے،
ابیات ہیں؛
وغیرہ۔
بیت وہ صنفِ شعر ہے جس کے دو مصرعے ہوتے ہیں جو عروضی وزن میں متماثل ہوتے ہیں۔ یہاں ایک اصطلاح ’’زمین‘‘ خاص طور پر یاد رکھنے کے قابل ہیں۔ زمین کے دو عنصر ہیں: وزن اور قافیہ؛ دو یا زیادہ ابیات کو ہم زمین کہیں گے اگر ان کے تمام مصرعے ایک ہی عروضی وزن میں ہوں اور اس کے جفت مصرعے ہم قافیہ ہوں۔ ابیات یا اشعار کے ایک مجموعے میں ہر جفت مصرعے کے آخر میں قوافی سے متصل وہ الفاظ جو بہ تکرار متماثل واقع ہوں ردیف کہلاتے ہیں۔ ردیف بیت کا جزوِ لازم نہیں، تاہم ردیف اگر اختیار کر لی جائے تو اس کو پورے فن پارے میں نبھانا لازم ہو جاتا ہے۔ نواب مرزا خان داغؔ دہلوی کی یہ غزل ملاحظہ ہو:

رنج کی جب گفتگو ہونے لگی
آپ سے تم، تم سے تو ہونے لگی

یہ غزل بحر رمل مسدس محذوف (فاعلاتن فاعلاتن فاعلن) میں ہے۔ اس کے پہلے دونوں مصرعوں اور پھر ہر جفت مصرع کے آخری الفاظ ہیں: گفتگو ہونے لگی، تم سے تو ہونے لگی، دو بدو ہونے لگی، کو بکو ہونے لگی، روبرو ہونے لگی، آرزو ہونے لگی، جستجو ہونے لگی، آبرو ہونے لگی۔ ’’ہونے لگی‘‘ ان سب میں مشترک الفاظ ہیں اور بالکل آخر میں واقع ہوئے ہیں۔ اصطلاحاً اس کو ردیف کہتے ہیں۔ ردیف سے پہلے الفاظ ہیں: گفتگو، تم سے تو، دو بدو، کو بکو، روبرو، آرزو، جستجو، آبرو۔ یہ الفاظ الگ الگ ہیں تاہم ان میں قدرِ مشترک اِن کے آخر کی صوتیت (واوِ معروف) ہے۔ ان کو قوافی (قافیہ کی جمع) کہا جاتا ہے۔
کلامِ اقبال سے ایک نمونہ دیکھئے:

لوح بھی تو قلم بھی تو تیرا وجود الکتاب
گنبدِ آبگینہ رنگ تیرے محیط میں حباب

یہ فن پارہ بحرِ مزدَوِج میں ہے۔ اس میں ایک مصرعے کا وزن ’’فاعلتن مفاعلن ‘‘ دو بار کے برابرہے اور مفاعلن کے مقابل مفاعلات آ سکتا ہے۔ اس فن پارے کے قوافی ہیں: الکتاب، حباب، آفتاب، بے نقاب، حجاب، اضطراب؛ یہاں ردیف نہیں لائی گئی۔
گویا، قافیہ کسی بیت کے آخر میں واقع ہونے والے وہ الفاظ ہوئے جو مشترک صوتیت رکھتے ہوں۔ ترتیب میں پہلے وہ الفاظ جن کی اختتامی اصوات متماثل ہیں (قافیہ) اور ان کے بعد وہ الفاظ جو املاء اور اصوات دونوں میں متماثل ہوں (ردیف)۔ ردیف ایک لحاظ سے قافیے ہی کی توسیع ہے۔
*قافیے کا اعلان*
ابیات و اشعار کے اوزان اور دیگر جزئیاتِ شعری کے لئے غزل کے اشعار بہترین مواد فراہم کرتے ہیں۔ اس کی بڑی وجہ یہ ہے کہ غزل کا ایک شعر (بیت) مضمون کے حوالے سے بھی آزاد اکائی ہوتا ہے، اور فنیات میں بھی۔ ایک غزل کے جملہ اشعار ایک زمین میں ہوتے ہیں۔ مطلع کے دونوں مصرعوں میں قافیہ کا اہتمام کیا جاتا ہے۔ یہ در اصل ردیف اور قافیہ دونوں کا اعلان ہوتا ہے۔ مطلع کے دونوں قافیے اس انداز میں طے ہوتے ہیں جس سے عیاں ہو جائے کہ آئندہ اشعار میں قوافی پر کیا کیا پابندی عائد ہو گی۔ ردیف اختیاری ہوتی ہے تاہم مطلع کے دونوں مصرعوں میں اگر ردیف بھی شامل ہو گئی تو وہ ہر شعر کے دوسرے مصرعے میں اسی املاء میں (حرف بہ حرف) شامل ہو گی۔ مناسب تر ہے کہ ردیف کو بجا اہمیت دینے کے ساتھ ساتھ قافیے کی توسیع سمجھا جائے۔

رنج کی جب گفتگو ہونے لگی
آپ سے تم، تم سے تو ہونے لگی
اس میں ’’ہونے لگی‘‘ ردیف ہے، استاد داغؔ نے ہر شعر میں اس کا اہتمام کیا ہے۔ قوافی ہیں: گفتگو، تم سے تو، دو بدو، کو بکو، روبرو، آرزو، جستجو، آبرو؛ ان سب میں صرف ایک حرف آخری واو ( واوِ معروف) حرفِ قافیہ ہے۔ گویا اس غزل کے لئے تین باتیں طے ہو گئیں: غزل کا ہر شعر ’’فاعلاتن فاعلاتن فاعلن‘‘ پر پورا اترے گا؛ حرفِ قافیہ واوِمعروف ہو گا، یعنی اس سے پہلا حرف جو بھی ہو اُس پر پیش (ضمہ) ہو گا؛ ردیف ’’ہونے لگی‘‘ کو ہر بیت کے آخر میں شامل کیا جائے گا۔

لوح بھی تو قلم بھی تو تیرا وجود الکتاب
گنبدِ آبگینہ رنگ تیرے محیط میں حباب
اس غیر مردّف فن پارے کے قوافی ہیں: الکتاب، حباب، آفتاب، بے نقاب، حجاب، اضطراب؛ جن سب کا آخر ’’اب‘‘ (الف حرفِ علت، ب ساکن) ہے۔ الف حرف علت کا خاصہ ہے کہ یہ اپنے ماقبل کو زبر (فتحہ) دیتا ہے۔ سو، یہ الف حرف قافیہ ہوا اور لفظ کے آخری حرف (ب) کو جو ہر قافیے میں موجود ہے، حرفِ قافیہ کا معاون مانا جائے۔

اپنی جولاں گاہ زیرِ آسماں سمجھا تھا میں
آب و گل کے کھیل کو اپنا جہاں سمجھا تھا میں
ردیف: ’’سمجھا تھا میں‘‘؛ قوافی: آسماں، جہاں،ہم عناں، فغاں؛ وغیرہ۔ ان قوافی میں حرفِ قافیہ وہی الف (حرفِ علت) ہے، اس پر نون غنہ وارد ہوا ہے۔ تقطیع میں نون غنہ کی حیثیت سے قطع نظر، ہمیں تسلیم کرنا ہو گا کہ اس کی وجہ سے آواز کا رُخ ناک کی طرف ہو جاتا ہے اور صوتیت بدل جاتی ہے۔ اسے ہم حرف کے خواص میں شامل کرتے ہیں۔ اور یہ نتیجہ اخذ کرتے ہیں کہ حرفِ قافیہ حرفِ علت ہو تو اس میں اس کا بہ غنہ یا بغیر غنہ ہونا بھی پیشِ نظر رکھا جائے گا۔

لبوں پر ہیں تالے، نگہ پر ہیں پہرے
ہم انساں ہیں یا چلتے پھرتے کٹہرے
(منیر انور)

ردیف (کوئی نہیں)؛ قوافی: پہرے، کٹہرے، ٹھہرے، گہرے؛ وغیرہ۔ یہاں ہائے ہوز مجزوم حرفِ قافیہ ہے۔ اور اس سے پہلے حرف پر زبر (فتحہ) ہے۔ لفظ کے بقیہ حروف یہاں دو ہیں(ر ے)۔ ایک حرف کی مثال اقبال کے اشعار میں آ چکی ہے۔ لفظِ قافیہ میں حرفِ قافیہ کے بعد جو کچھ بچ رہے (یعنی اس لفظ کا بقیہ، جو ظاہر ہے حرفاً، اعراباً، صوتاً باہم متماثل ہو گا)، اس کو حرفِ قافیہ کا معاون مان لیا جائے، اس سے تفہیم آسان ہو جاتی ہے۔

حدیثِ درد کو آخر بیاں تو ہونا تھا
جو کرب دل میں چھپا تھا عیاں تو ہونا تھا
(منیر انور)

ردیف: ’’تو ہونا تھا‘‘؛ قوافی: بیاں، عیاں، وہاں، کارواں؛ وغیرہ۔ یہاں بھی الف حرفِ علت (ماقبل زبر کی خاصیت الف علت میں از خود شامل ہے) بہ غنہ کو حرفِ قافیہ مان لیا جائے؛ بقیہ ردیف ہے۔

حرفِ قافیہ سے فوراً پہلے واقع ہونے والے حروف باہم مختلف ہوتے ہوئے بھی ایک قدرِ مشترک رکھتے ہیں، وہ ہے ان کا حرفِ قافیہ سے اتصال اور اعراب یا عدم اتصال اور ان حروف کا اپنا اعراب، گویا حرفِ قافیہ سے اس کا تعلق کس نہج پر استوار ہے۔ لہٰذا ہم حرف ماقبل حرفِ قافیہ کو حرفِ قافیہ کا نقیب مانتے ہیں۔

ہوا ہے اُس پہ چاہت کا اثر آہستہ آہستہ
شفق اتری تو ہے رخسار پر آہستہ آہستہ
(منیر انور)

ردیف: ’’آہستہ آہستہ‘‘؛ قوافی: اثر، پر، نظر؛ وغیرہ۔ اس میں رائے مجزوم حرفِ قافیہ ہے اور اس کے نقیب پر زبر (فتحہ) ہے۔

سرمئی شام ہی اتری ہے ابھی وادی میں
رات حائل ہے ابھی صبح کی تابانی میں
(محمد یعقوب آسی)

ردیف: ’’میں‘‘؛ قوافی: وادی، تابانی، بستی، آگاہی، پیراکی؛ وغیرہ۔ اس غزل میں ی (یائے معروف) حرفِ قافیہ ہے۔ یاد رہے کہ یائے معروف وہ یائے مجزوم ہے جس کے ماقبل پر زیر (کسرہ ) ہو۔ یہاں د، ن وغیرہ نقیب ہیں۔

پھر سے طاری ہے زندگی پہ جمود
اور نایاب رہگزارِ کشود
(محمد یعقوب آسی)

ردیف (کوئی نہیں)؛ قوافی: جمود، کشود، شہود، سجود، بے سود، ناموجود، مسعود؛ وغیرہ۔ ان اشعار میں واوِ معروف (واوِ مجزوم جس کے ماقبل پر پیش یعنی ضمہ ہے) حرفِ قافیہ ہے، اور ’’د‘‘ اس کا معاون ہے، جب کہ ج، ک نقیب ہیں۔

کیسا ماحول ساز گار ہوا
دل زدوں میں مرا شمار ہوا
(محمد یعقوب آسی)

ردیف: ’’ہوا‘‘؛ قوافی: سازگار، شمار، سوار، آب دار، غبار؛ وغیرہ ؛ الف علت حرفِ قافیہ اور ’’ر‘‘ اس کا معاون ہے۔ گ، م نقیب ہیں۔ قریب الصوت قوافی

قوافی کو عرفِ عام میں ہم قافیہ الفاظ کہا جاتا ہے۔ حرکات اور نون غنہ کے اشتراک کے حوالے سے بات ہو چکی، ہم یہاں حرفِ قافیہ کو مخارج کے حوالے سے دیکھیں گے۔ یہاں احبابِ علم کی آراء تقسیم ہو چکی ہیں۔ ایک مکتبِ فکر کا کہنا ہے کہ حرفِ قافیہ کو قطعی ہونا چاہئے یعنی قریب المخارج اصوات کی بھی گنجائش نہیں۔ تاہم بہت قریب المخارج حروف قافیہ میں ایک دوسرے کے مقابل لائے جاتے ہیں۔ ت کے ساتھ تھ کا قافیہ بہت عام ہے۔ غلام محمد قاصر کا یہ شعر:

اکیلا دن ہے کوئی اور نہ تنہا رات ہوتی ہے
میں جس پل سے گزرتا ہوں محبت ساتھ ہوتی ہے
ہمارے مطالعہ میں ایسی غزلیں بھی آئی ہیں جن کے قوافی میں ذ، ز، ض، ظ کو؛ اور الف اور عین کومقابل لایا گیا ہے۔

موجہء گل کو ہم آواز نہیں کر سکتے
دِن ترے نام سے آغاز نہیں کر سکتے
عشق میں یہ بھی کھلا ہے کہ اٹھانا غم کا
کارِ دشوار ہے اور بعض نہیں کر سکتے
(پروین شاکر)

آ رہا ہے ڈر مجھے انجام کا آغاز سے
ابتدا سے ہی نظر آتے ہیں وہ ناراض سے
خصلت و عادات سے ہی امتیازِ نسل ہے
ورنہ صورت چیل کی بھی ہے مشابہ باز سے
(وحید ناشاد)

پنجابی شاعری میں البتہ قابلِ قبول حروفِ قافیہ کے مندرجہ ذیل گروہ عام طور پر معروف ہیں: (ب، پ)، (ت، تھ)، (ت، ٹ)، (ث، س، ص)، (ح، ہ)، (خ، ک، کھ)، (د، ڈ، ڈھ)، (ر، ڑ، ڑھ)، (ذ، ز، ض، ظ)، (ا، ع، ہ)، (ق، ک)، (گ، غ)، (ن، ں)، (ف، پھ)۔

*نقیب (ماقبل حرفِ قافیہ)*
نقیب کا مختصر ذکر پہلے ہو چکا، کچھ امور کی وضاحت

اول: بعض فن پاروں کی قوافی کی کچھ ایسی صورت پیش آتی ہے: (مِلا، سِلا، صلہ، گِلا، دِلا؛ بَلا، جَلا، گَلا، چَلا؛ رُلا، سُلا، تُلا) ان میں لام اپنے ماقبل کے ساتھ مجزوم نہیں، مگر سب قوافی میں موجود ہے؛ حرف ماقبل لام متحرک ہے مگر حرکات متماثل نہیں ہیں۔ ہمارے نزدیک یہ قوافی کے تین الگ الگ گروہ ہیں: حرف ما قبل لام پر زبر (بَلا، جَلا، گَلا، چَلا)؛ حرف ماقبل لام پر زیر ( مِلا، سِلا، صلہ، گِلا)؛ حرفِ ماقبل لام پر پیش (رُلا، سُلا، تُلا)؛ و علیٰ ہٰذا القیاس۔

دوم: یہ بھی ہوتا ہے کہ لام الف مثل مندرجہ بالا ہوں اور اس سے پہلے سبب خفیف واقع ہو۔ مثلاً: اگلا، پچھلا، نچلا،جھُولا، تولا، تھَیلا، گِیلا، میلہ، پتلا، منجھلا، سنبھلا، کچلا، نکلا؛ وغیرہ۔ ان میں حرفِ قافیہ لام سے فوراً پہلے حرف ناطق مجزوم واقع ہیں (اگلا، پچھلا، نچلا، منجھلا، سنبھلا، کچلا، نکلا)۔ یا پھر حرفِ علت جو ایک دوسرے سے عرف (الف، واو، یاے؛ معروف، مجہول، لین ہونے) میں متماثل نہیں ہیں: جھولا، تھیلا، گیلا، میلہ۔ ان میں حرفِ قافیہ کی صوتیت اپنے ماقبل سے آزاد ہو جاتی ہے۔ سفارش: ایسے قوافی میں حرفِ قافیہ سے پہلا حرف(نقیب) اگر متحرک ہے تو اس کو ’’پہلی صورت‘‘ کے تحت دیکھا جائے، اگر ساکن غیر مجزوم ہے تو اس کے سکون کو زبر پر قیاس کیا جائے ۔

سوم: حرف ماقبل لام (نقیب) پچھلے لفظ کا آخری اور ساکن حرف ہے: بات لا، کام لا، جام لا، ہاتھ لا، آگ لا، پات لا، خاص لا، آج لا، باز لا؛ وغیرہ۔ ایسے میں لا حرفِ معاون یا ردیف کا جزو ہوا۔مزید متنوع صورتیں بھی ممکن ہیں (خاص طور پر تراکیب اور لاحقوں سے سبب سے): ہوا دار، نمودار، خریدار، طرح دار، بیدار، زَردار؛ ستم گری، توَنگری، کارگری، بخیہ گری، دریوزہ گری، سیم گری؛ حق گو، خوش گو، نغز گو، غزل گو، قصہ گو، دروغ گو، یاوہ گو، نظم گو؛ وغیرہ۔
چہارم: زیرِ اضافت و توصیف کو زیر پر قیاس کیا جائے ، اور ایسا زیراگر (بہ شرطِ بحر) بقدر ’’ے‘‘ طویل ہو جاتا ہے تواسے یائے مجہول پر قیاس کیا جائے۔ واوِ عطف کو اگر وہ گر رہا ہے تو پیش پر، اور اگر نہیں کر رہا تو اسے واوِ مجہول پر قیاس کیا جائے۔

عابد سیال کی ایک غزل ملاحظہ ہو (اس کا مطلع دستیاب نہیں):

اک شمع سی ہر شام جلا رکھتے ہیں دل میں
اک آس پہ ہر روز سنورتا ہے یہ رستہ
اے موجِ غمِ یار! گزر دل کی گلی سے
مدت سے مسافر کو ترستا ہے یہ رستہ
ہم چل تو پڑے تیرے اشارے کے سہارے
اب دیکھیے کس سمت نکلتا ہے یہ رستہ
جتنا میں سنبھل جانے کی کوشش میں ہوں عابد
اتنا مرے پیروں سے الجھتا ہے یہ رستہ
اس غزل کے قوافی ہیں: سنورتا، ترستا، نکلتا، گزرتا، الجھتا۔ یہاں ہم یہ سفارش کرتے ہیں کہ حرفِ قافیہ (ت) ہے اور نقیب مجزوم ہے۔ دخیل اور اساس وغیرہ کی بحث یہاں ضروری نہیں رہتی۔

عابد سیال ہی کی ایک اور غزل کے قوافی: مطلع میں (چمکنے، ملنے) اور باقی اشعار میں (دھرنے، بدلنے، بگڑنے، جلنے)۔ اس میں بھی یہی صورت کار فرما ہے۔ مطلع میں اگر قوافی (عامل، کامل) واقع ہوں جیسی کہ اساس اور دخیل کی مدوں میں مثال دی جاتی ہے تو اس میں بلا توقف الف علت کو حرفِ قافیہ سمجھا جانا چاہئے اور (م ل) معاونین ہیں ۔
*ہم قافیہ الفاظ *
مثال:
؎ ظلمت کدے میں میرے شبِ غم کا جوش ہے
اک شمع ہے دلیلِ سحر سو خموش ہے

خدا؛جدا؛فدا؛ ہوا؛ شفا؛

اطاعت: قناعت، شجاعت، عبادت، سلامت، ذہانت، ثابت، محبت، مروت، طاقت، سعادت۔

آباد: برباد، سجاد، ف رہاد، فریاد، آزاد، شہزاد، شمشاد، داد، شاد، صاد، کھاد، عاد، یاد

عابد: زاہد، راشد، ساجد، شاہد، شاید، خالد، مساجد، شواہد، وارد، مسجد۔

انوار: اتوار، تہوار، بیمار، سردار، بے کار، اوزار، سوار، شمار، خمار، ہزار۔

معصوم: معلوم، علوم، مغموم، مفہوم، مرحوم، محروم، منظوم، مقسوم، کلثوم، قوم۔
کریم: رحیم، علیم، سلیم، نعیم، ٹیم، جیم، گیم، لحیم، شحیم، شمیم۔
ولی: علی، گلی، کلی، جلی، ابھی، کبھی، تبھی، جبھی، سبھی، سعی، جمی۔
اقوال: چکوال، اموال، شوال، احوال، سوال، قوال، نوال، جوال، زوال، وال
بندگی: آزردگی، افسردگی، متقی، جنوری، فروری، ہمسری، عاجزی، آخری، ظاہری، باطنی

قافیے، قفو بہ معنے پیروی کرنے کے نکلا ہے، جس کے لغوی معنی “ پیچھے آنے والے“ کے ہیں۔ بقول اخفش قافیہ “ شعر کا آخری کلمہ “ ہے۔ لیکن یہ تعریف جامع نہیں۔ سکاکی کے نزدیک ساکن مقدم سے پہلا حرف مع حرکت قافیہ کہلاتا ہے۔ خلیل کی تعریف یوں ہے۔ “ شعر میں سب سے آخری ساکن سے پہلے جو ساکن آئے اس کے ماقبل متحرک سے آخر تک سب قافیہ ہے“۔ جہاں تک عربی زبان کا تعلق ہے یہ تعریف صحیح ہے لیکن ہماری زبان کے معاملے میں یہ درست نہیں بیٹھتی۔ اردو میں قافیہ ان حروف اور حرکات کا مجموعہ ہے۔ جوالفاظ کے ساتھ غیر مستقیل طور پرشعر یا مصرعے کے آخر میں باربار آئے۔ یہ مجموعہ کبھی کبھی مہمل معلوم ہوتا ہے لیکن اس کا کچھ مضائقہ نہیں بالعموم اس پورے لفظ کوجس میں یہ مجموعہ آتا ہے قافیہ کہہ دیتے ہیں۔ چونکہ قافیہ ابیات کے آخر میں واقع ہوتا ہے یا ایک قافیہ دوسرے قافیہ کے پیچھے آتا ہے لہذا اس نام سے موسوم ہوا۔

ہمارے نزدیک قافیہ کی واضع ترتعریف یہ ہے کہ قافیہ وہ مجموعہ ء حروف و حرکات ہے جو اواخرابیات میں دو یا زیادہ لفظوں کی صورت میں بطور وجوب یا استحسان مقرر لایا جاتا ہے۔

قافیے کے بعد جو حرف، کلمہ یا کلمات مستقل طور پر باربار آئیں انہیں ردیف کہتے ہیں۔

*استعارہ*
علم بیان کی اصطلاح میں حقیقی اور مجازی معنوں کے درمیان تشبیہ کا علاقہ ہونا۔ یعنی حقیقی معنی کا لباس عاریۃَ َ لے کر مجازی معنوں کو پہنانا۔ مثلا نرگس کہہ کر آنکھ مراد لینا۔ استعارہ اور تشبیہ میں یہ فرق ہے کہ استعارہ تشبیہ سے زیادہ بلیغ ہوتا ہے۔ تشبیہ میں ایک چیز کو دوسری جیسا قرار دیا جاتا ہے جب ان میں کوئی صفت یا خوبی مشترک ہو لیکن استعارے میں ایک چیزکوہوبہودوسری چیزمان لیا جاتاہے۔ تشبیہ میں مشبہ اور مشبہ بہ دونوں کا ذکر کیاجاتا ہے جب کہ استعارہ میں مستعار لہ ( جسے تشبیہ میں مشبہ کہتے ہیں) نہیں لکھا جاتا صرف مستعار منہ ( جسے تشبیہ میں مشبہ بہ کہتے ہیں ) کا ذکر ہوتا ہے۔ گویا استعارہ میں صرف اس چیز کا ذکر ہوتا ہے جسکواستعارہ بنایا جائے جب کہ تشبیہ میں دونوں کا ذکر کیا جاتا ہے کبھی حرفِ تشبیہ کے ساتھ اور کبھی حرفِ تشبیہ کے بغیر۔
*ارکان استعارہ*
مستعار لہ: وہ فرد یا چیز جس کے لیے کوئی لفظ یا خوبی ادھار لیا جائے۔
مستعار منہ:وہ شخص یا چیز جس سے کوئی لفظ یا خوبی مستعار لیا جائے۔
وجہ جامع: مستعار لہ اور مستعار منہ میں جو وصف اور خوبی مشترک ہو اسے وجہ جامع کہا جاتا ہے۔
*کنایہ*
کنایہ، علم بیان میں یہ وہ کلمہ ہوتا ہے جس کے معنی مبہم اور پوشیدہ ہو۔ ان کا سمجھنا کسی قرینے کا محتاج ہو، وہ اپنے حقیقی معنوں کی بجائے مجازی معنوں میں اس طرح استعمال ہوا ہو کہ اس کے حقیقی معنی بھی مراد لیے جا سکتے ہوں۔ یعنی بولنے والا ایک لفظ بول کر اس کے مجازی معنوں کی طرف اشارہ کر دے گا، لیکن اس کے حقیقی معنی مراد لینا بھی غلط نہ ہو گا۔
مثلاً
’’زید کو آپ نے سر پر چڑھایا ہے۔ ‘‘ (حقیقت میں اس کے معنی یہ ہے کہ زید کو آپ نے بگاڑا ہے۔)
’’بال سفید ہو گئے لیکن عادتیں نہ بدلیں۔ ‘‘ (یہاں بال سفید ہونے سے مراد بڑھاپا ہے لیکن حقیقی معنوں میں بال سفید ہونا بھی درست ہے۔)
*کنایہ کی تعریف و اقسام*
کنایہ کی تعریف؛
کنایہ عربی زبان کا لفظ ہے۔اور اسکا معنی اشارہ کرنے کے ہیں۔کنائیہ میں لفظ اپنے مجازی معنوں میں استعمال ہوتا ہے ۔ لیکن اسکے حقیقی معنی کہا جاتا ہے۔کنایہ علمِ بیان کی ایک اہم قسم ہے۔ Insinuation بھی مراد لیے جاتے ہیں۔

میر صاحب زمانہ نازک ہے
دونوں ہاتھوں سے تھامیے دستار

اس شعر میں لفظ اپنے مجازی معنوں میں استعمال ہوا ہے۔لیکن حقیقی معنی بھی مراد لیے گئے ہیں۔

کنایہ کی اقسام؛
کنایہ کی مشہور چھ اقسام ہیں؛

ا۔کنایہ قریب ب۔کنایہ بعید ج۔تلویح د۔رمز ہ۔ایما و۔تعریض

کنایہ قریب؛
موصوف کی کسی صفت کا یوں اظہار کیا جائے کہ اس مخصوص صفت کی طرف انسان کا دماغ فوراً منتقل ہو جائے اور زیادہ غور و فکر کرنا نہ پڑے یہاں موصوف اور صفت کے درمیان کوئی واسطہ نہ ہو۔مثلاً

ہے دوش محمد کا مکیں خانہ زین پر
اس ناز سے رکھتا ہی نہیں پاوں زمین پر

کنایہ بعید؛
وہ کنایہ جو فوراً سمجھ میں نہ آئے بلکہ کچھ غور و فکر کرنا پڑے۔بالعموم صفات بیان کر دی جاتی ہیں۔ لہذااس چیز تک پہنچنا آسان ہوتا ہے۔ جیسے؛

عروجِ آدم خاکی سے انجم سہمے جاتے ہیں
کہ یہ ٹوٹا ہوا تارا مہہ کامل نہ بن جائے

تلویح؛
تلویح کے لفظی معنی دور سے اشارہ کرنے کے ہیں۔جس کنائے میں صفت سے موصوف تک پہنچنے میں متعدد واسطوں سے گزرنا پڑے تو اس کنائے کو تلویح کہتے ہیں۔مثال لے طور پر؛

مغز کو باغ میں آنے نہ دی جئے
نہ حق خون پروانے کا ہو گا۔

رمز؛
رمز کے معنی بھی اشارہ کرنا کے ہیں ۔اگر کنائے میں واسطے تو زیادہ یہ ہوں لیکن ان میں پوشیدگی ہو تو اس رمز کہتے ہیں۔مثال ملاحظہ فرمائیں؛

کچھ کرو فکر اس دیوانے کی
دھوم ہے پھر بہار آنے کی

بہار کی آمد کنایہ ہے۔ جنون کی زیادتی سے مراد یہ ہے کہ کچھ لوگوں پر بہار کی وجہ سے جنون میں اضافہ ہوتا ہے۔

ایما؛
ایما کے لفظی معنی بھی اشارہ کرنا کے ہیں۔یہ وہ اشارہ ہے جس میں نہ تو واسطے زیادہ ہوں اور نہ ان میں پوشیدگی ہو مثلاً

سفید ریش سے مراد بوڑھا آدمی ہے۔ یہ کانیہ قریب ہی کا دوسرا نام ہے۔

تعریض؛
تعریض کنایہ کی ایک اہم قسم ہے اس میں اشاروں اور کنایوں میں کسی عیب کاذکر اس طرح کیا جائےکہ موصوف کا ذکر نہ ہو لیکن اس کی صفات کسی دوسرے شخص سے منسوب کر کے اس طرح بیان کی جائیں کہ دماغ مدعا تک پہنچ جائے۔ کنایہ تعریض میں ذکر کسی اور کا ہوتا ہے ۔عام طور پر طنز کے لیے استعمال ہوتا ہے۔جیسے؛

بدنام بھی جھوٹے بھی ہمیں ہیں بے شک
ہم ستم کرتے ہیں اور آپ کرم کرتے ہیں

SHARE

LEAVE A REPLY