مینز ٹی ٹوئنٹی ورلڈکپ کے پہلے سیمی فائنل میں نیوزی لینڈ نے انگلینڈ کیخلاف ٹاس جیت کر پہلے بولنگ کرنے کا فیصلہ کرلیا۔

واضح رہے کہ نیوزی لینڈ کی ٹیم نے گروپ 2 میں صرف پاکستان سے شکست کھائی اور اس گروپ میں دوسرے نمبر پر رہی۔

دوسری جانب انگلینڈ کی ٹیم اپنے گروپ میں رن اوسط کی بنیاد پر پہلے نمبر پر رہی تھی، جبکہ اسے جنوی افریقہ کے خلاف آخری گروپ میچ میں شکست کا منہ دیکھنا پڑا تھا۔

ٹاس کے موقع پر گفتگو کرتے ہوئے کین ولیم سن کا کہنا تھا کہ یہ ایک اچھی وکٹ ہے، آج کا دن بہت بڑا ہے۔

ان کا یہ بھی کہنا تھا کہ انگلینڈ ہمیشہ مضبوط حریف رہا ہے، ہماری توجہ کرکٹ پر ہے جو ہم کھیلنا چاہتے ہیں۔

اس موقع پر انگلینڈ کرکٹ ٹیم کے کپتان ایون مورگن کا کہنا تھا کہ اگر وہ ٹاس جیت جاتے تو پہلے بولنگ ہی کرتے، لیکن امید ہے کہ یہ ٹاس کھیل کا فیصلہ نہیں کرتی۔

انجری کے شکار جیسن رائے کے ٹیم سے باہر ہونے پر ان کا کہنا تھا کہ یہ بہت ہی دردناک تھا کہ آپ ٹورنامنٹ کے اگلے مرحلے سے قبل باہر ہوجائیں، تاہم یہ سیم بلنگز کے لیے بھی ایک موقع ہے۔

کیوی ٹیم پر بات کرتے ہوئے ایون مورگن کا کہنا تھا کہ نیوزی لینڈ بہت ہی مضبوط ٹیم ہے، وہ فائنل یا سیمی فائنل میں پہنچنے والی کوئی نئی ٹیم نہیں ہے، وہ اس مرحلے کے لیے کوالیفائی کرتے رہے ہیں جب سے ہم کرتے رہے ہیں۔

نیوزی لینڈ:

کین ولیم سن (کپتان)، مارٹن گپٹل، ڈیرل مچل، ڈیون کونوے، گلین فلپس، جمی نیشم، مچل سینٹنر، ایڈم ملن، ٹم ساؤتھی، ایش سوڈھی، ٹرینٹ بولٹ۔

انگلینڈ:

ایون مورگن (کپتان)، جوز بٹلر، جونی بیئرسٹو، ڈیوڈ ملان، لیام لونگسٹن، معین علی، سیم بلنگز، کرس ووکس، کرس جورڈن، عادل رشید، مارک ووڈ۔

SHARE

LEAVE A REPLY