حضرت مرزا دبیر نے ۳۰ محرم وفات کی دعا مانگی اور بارگاہ الہی میں قبول ہوئی، ذیشان زیدی

0
2391

مجتہدِ نظم مرزا سلامت علی دبيرؔ

پھر بلبلِ حضرتِ امیرؑ آیا ہے
جبریلِؑ امیں کا ہمسفیر آیا ہے
جو روۓ گا لکھ دے گا اسے خطِ نجات
سرکار ِ حسینی کا دبيرؔ آیا ہے

عزیزو! 30 محرم شاعر ِ اعظم ، مجتہد نظم ، مرید ِ شاہ نجف مرزا دبیر کا یوم وفات ہے۔ مرزا دبیر کی ولادت گیارہویں جمادی الاول 1218 ہجری بمقام دہلی محلہ بلی ماراں میں ہوی. صنف مرثیہ کو بام عروج پر پہنچانے میں میر انیس کے ساتھ ساتھ مرزا دبیر کی کوششیں بھی ہر لحاظ سے صد لائق تحسین ہیں۔ مرزا سلامت علی نام دبیر تخلص ، مرزا غلام حسین کے بیٹے تھے۔ مرزا دبیر کے مورثِ اعلیٰ جناب ملّا ہاشم شیرازی ایران کے مشہور شاعر جناب ملّا محمد اہلیؔ شیرازی (صاحبِ مثنوی “سحر حلال”) کے حقیقی بھائی تھے جن کی مثنوی ایران میں خاصی مقبول ہے۔ مرزا دبیرؔ نے اپنی ایک رباعی میں اپنے جد امجد کی تصنیف “سحر حلال” پر یوں فخر کیا ہے

کب غیر کے مضموں پر خیال اپنا ہے
الہامِ خدا شریکِ حال اپنا ہے
اک یہ بھی ہے اعجاز آئمہؐ کا دبیرؔ
دنیا میں سخن “سحر حلال” اپنا ہے

5 سال کی عمر میں اپنے خاندان کے ساتھ دلی سے لکھنؤ آگۓ ۔ اور وہیں اردو اور فارسی زبان کی تعلیم حاصل کی ۔ مرثیہ کو فکری بلندیوں پر پہنچا دیا ۔ 11 سال کی عمر میں دبیر کے والد انہیں میر ضمیر کے پاس لے گۓ اور کہا کہ صاحبزادے کو مداحئ اہلبیت کا شوق ہے تو میر ضمیر نے دبیر سے کہا صاحبزادے کچھ سناؤ تو مرزا صاحب نے یہ قطعہ پڑا جس پر میر ضمیر اور حاضرین مجلس پھڑک اٹھے اور کوئ کہنے لگا “واہ صاحبزادے کیا بلا کی طبیعت پائ ہے” ۔

کسی کا کندہ نگینے پہ نام ہوتا ہے
کسی کی عمر کا لبریز جام ہوتا ہے
عجب سرا ہے یہ دنیا کہ جس میں شام و سحر
کس کا کوچ کسی کا مقام ہوتا ہے

میر ضمیر نے ہی دبیر تخلص دیا۔ مرزا دبیر نے عربی و فارسی فضیلت کی حد تک حاصل کی۔ مرزا دبیر کی شہرت و منزلت عالم ِ شباب ہی میں اتنی عام ہو چکی تھی کہ شاہ اودھ غازی الدین حیدر نے ان کو شاہی امام باڑے میں دعوت دی ۔ یہ وہ زمانہ تھا جب ہر طرف میر خلیق ، میر ضمیر ، دلگیر اور مرزا فصیح کا طوطی بول رہا تھا ان کا کہنہ مشق اساتذہ کی موجودگی میں نوجوان دبیر کی شاہی مجلس پڑھنا اس کے فنی کمال کی دلیل ہے۔

شیرانِ مضامیں کو کہاں بند کروں
کیا طبع کا دریائے رواں بند کروں
خلاقِ مضامیں تو سبھی ہیں مگر
کھل جائے حقیقت جو زباں بند کروں

ناحق کا نہ چیخنا نہ چلانا ہے
بیکار نہ ہر بند پہ بتلانا ہے
ابن شہؑ مرداں کا ثنا خواں ہوں میں
صد شکر کہ پڑھنا مرا مردانہ ہے

سرکار سلاطین سے سروکار نہیں
جز مجلس ِ مولا کوئی دربار نہیں
مداح ہوں میں امام بے سر کا دبیرؔ
سامان کیسا کہ سر بھی درکار نہیں

ادنی’ سے سر جھکاۓ اعلی’ وہ ہے
جو خلق سے بہرہ ور ہے دریا وہ ہے
کیا خوب دلیل ہے یہ خوبی کی دبیر
سمجھے جو برا آپ کو اچھا وہ ہے

دل کعبہ ہے اس میں ہے مقام ِ حیدرؑ
بھولوں گا نہ میں قبر میں نام ِ حیدرؑ
آپس میں نکیرین کریں گے تکرار
پرسش نہ کرو یہ ہے غلام ِ حیدرؑ

سرقہ مضموں کا زبوں ہوتا ہے
یعنی علم ِ نظم نگوں ہوتا ہے
پر ان میں مندرج ہے حال ِ شہدا
اس سے مرے مرثیوں کا خوں ہوتا ہے

ایک رباعی میں بے جا خوشامد کرنے والوں کی مذمت کرتے ہیں

پیش امرا طالبِ زر جھکتے ہیں
سجدے سے سوا مجرے کو سر جھکتے ہیں
سنجیدہ ہیں یہ لوگ مثلِ ترازو
سوا مال جدھر ہوا ادھر جھکتے ہیں

مرزا صاحب کی شاعری میں نعتیہ کلام یقیناََ ایک الگ مضمون کا متقاضی لیکن نمونے کے طور پر یہ تین بہترین رباعیات تو دیکھئے

اندام ِ نبیۖ نے کیا صفائ پائ
ساۓ کی بھی وصل سے جدائ پائ
وہ سایہ ہوا دوات ِ قدرت میں جمع
لکھنے کو قضا نے روشنائ پائ

آدم نے شرف خیر البشر سے پایا
رشتہ ایماں کا اس گہر سے پایا
دو میم محمد ۖ سے جہاں روشن ہے
مضمون یہ دل ِ شمس و قمر سے پایا

رف رف پہ عجب لطف سواری دیکھا
معراج ہوئ جمال ِ باری دیکھا
نو قلزم گردوں کے گۓ پار نبی ۖ
گھر آکے وضو کا آب جاری دیکھا

شاعروں کا فروغ بادشاہوں یا امیروں کی دست گیری سے ہوا کرتا ہے مگر دبیر کا فروغ آئمہ اطہار و شہدائے کربلا کی بدولت ہوا. اس مضمون کو وہ خود ایک مرثیہ میں یوں فرماتے ہیں کہ حضرت عباسؑ کا ان کو سہارا ہے

خاقانیؔ و فردوسیؔ و سعدیؔ و نظامیؔ
شاہوں کی مدد سے ہوئے آفاق میں نامی
عباسؑ ہیں اس بندہ ِ درگاہ کے حامی
دیتا ہے سخن لکھ کے مجھے خطِ غلامی
ہیں دو ہی دبیر اس میں نہیں ایک کو شک ہے
منبر مری جاگیر مقام اس کا فلک ہے

دبیر کے کلام کی بیس 20 جلدیں منشی ناول کشور پریس لکھنؤ سے شائع ہوئیں تھیں۔ مرزا دبیر فقہ، قرآن و حدیث کے بہت بڑے عالم تھے. آپ نے کثیر احادیث و اقوال معصومین ، روایات اور قرآنی آیات سے اپنے کلام کو نکھارا ہے

تشریح ِ قل کفی’ کی ہے کیا مرتضی’ علیؑ
تصریح انّما کی ہے کیا مرتضی’ علیؑ
تفسیر لا فتی’ کی ہے کیا مرتضی’ علیؑ
تاثیر ہر دعا کی ہے کیا مرتضی’ علیؑ
گنجینۂ علوم ِ خدا داد کون ہے
جبریلؑ سے فرشتے کا استاد کون ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہوتی تھیں صفیں آب ِ دم تیغ سے بے دم
پانی جو کھڑے ہوکے پیو ہوتا ہے سن کم
حل کرتی تھی ہر مسئلہ تیغ ِ شہ عالم
ہے خون نجس اس میں یہ آلودہ تھی ہر دم
پر اس پہ نجاست کا گماں ہو نہیں سکتا
یعنی کہ نجس آبِ رواں ہو نہیں سکتا
ٍ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضرت نے لیا چلوؤں میں خون ِ دل ِ پاک
تھراتے ہوۓ ہاتھوں سے پھینکا سوۓ افلاک
فرماتے ہیں باقرؑ نہ گری بوند سر ِ خاک
ہر روز شفق دیکھ کہ ہم ہوتے ہیں غمناک
رنگیں جن شفق سے فلک ِ پیر کا ُرو ہے
سمجھو نہ شفق ، یہ مرے دادا کا لہو ہے
ٍ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب اس طرح سے جلاء الیعون میں ہے رقم
کہ جب قریب در ِ کوفہ آۓ اہل ِ حرم
لٹک رہی تھی وہاں لاش ِ مسلم ِؑ ُپرغم
نگاہ پڑ گئ زینبؑ کی اس پہ ہاۓ ستم
کہا سکینہؑ نے رو کر جی تڑپتا ہے!!
یہ کس شہید کا لاشہ پھوپھی لٹکتا ہے؟؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب ہے بیان ِ شیخ مفید اس جگہ مفید
عصر ِ ظہور میں ہے یہ افسانہ ِ جدید
دس دن کے بعد ہوے گا دجال بھی پدید
پہلے مقیم ہوگا سر ِ کوہ وہ پلید
اسباب و فوج جمع غرض کرکے کوہ پر
حملہ کرے گا پھر شہ گردوں ِشکوہ پر

جب بادشاہ اودھ غازی الدین حیدر نے اپنے عزاخانے میں ذاکری کے لیۓ بلوایا ۔ مرزا دبیر منبر پر گۓ ، حمد و نعت میں ایک ایک رباعی پڑھی اور پھر مسدس کا یہ بند پڑھا جو راستے میں لکھا تھا

واجب ہے حمد و شکر جناب ِ الہ میں !
فضل ِ خدا سے آیا ہوں کس بارگاہ میں
مجھ سا گدا ، اور انجمن ِ بادشاہ میں !
چرچا یہ لوگ کرتے ہیں اس وقت راہ میں
ذرّے پہ چشم ِ مہر ہے مہر ِ منیر کو
حضرت نے آج یاد کیا ہے دبیر کو

پھر یہ مرثیہ پڑھا جس کا مطلع ہے “داغ غم حسین میں کیا آب و تاب ہے” جب مرثیے کا یہ بند پڑھا تو بادشاہ رونے لگا جب بی بی سکینہ یزید سے کہتی ہیں

جب روز کبریا کی عدالت کا آۓ گا
جبّار بادشاہوں کو پہلے بلاۓ کا
انصاف و عدل ان سے بہت پوچھا جاۓ گا
تو آج داد دینے کی کل داد پاۓ گا
گل کر دیا ہے دونوں جہانوں کے چراغ کو
لوٹا ہے تیر ے عہد میں زہرا کے باغ کو

دبیر تو یہ مرثیہ پڑھ کر چلے گۓ مگر بادشاہ کو ساری رات خوف خدا سے نیند نہیں آئ ۔ یہ بند گو تازیانہ عبرت ہوگیا . صبح ہوتے ہی اپنے وزیر کو انصاف اور عدالت کے بارے میں تاکید کی۔ ایک حکایت کے مطابق نواب مرزا فیض آبادی نے دبیر کو بلوایا اور ان سے خواہش کی کہ چودہ معصوموں کے حال میں مختلف مرثیے لکھ دیں تاکہ ہر معصوم کی شہادت پر پڑھا جاسکے چنانچہ جب دبیر پالکی میں واپس لکھنؤ جارہے تھے تو راستے میں تمام مرثیوں کو کہکر نواب صاحب کو بھجوا دیا۔ ان میں سے کچھ مرثیوں کے مطلع یہ ہیں

کیا خلقِ حسن تھا حسنؑ سبز قبا میں
بیمار کربلا کا بھی کیا فیض عام ہے
ہے قصد کچھ فضائل باقرؑ رقم کروں
جعفرؑ صادق کا رتبہ خلق میں مشہور ہے
کیا موسئ کاظم کے فضائل کا بیاں ہو
کیا شاہِ خراسان کی زیارت کا شرف ہے
شہرہ جہاں میں حسنؑ عسکری کا ہے

مرزا دبیر نے تقریبا” 135 سلام کہے ہیں ۔ سلاموں میں طویل قطعہ بند رکھنا دبیر ہی کی ایجاد ہے۔

کہا ہند نے تم میں یثرب کی بو ہے
اسیرو دھڑکتا ہے سینہ ہمارا
پکارے حرم اب تو پھرتے ہیں در در
وطن تھا ہاں کبھی مدینہ ہمارا
سدا روز عاشور کہتی تھیں بیویں
لٹا تھا اسی دن خزینہ ہمارا
ٍ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سینے میں نیزہ حلق پہ خنجر زبان پہ شکر
یہ حلم جز حسین بھلا کس بشر میں ہے
طوفاں اٹھا ہے آب دم ذوالفقار سے
ہستئ اہل ظلم کی کشی بھنور میں ہے
بولی دیکھ کے نرگس کو باغ میں صغری’
کہ تو بھی کیا گل زہرا کے انتظار میں ہے
شہید و بیکس و مظلوم و بے دیار و غریب
ہر ایک لفظ یہ شبیّر کے خطاب میں ہے
ٍ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خیال ِ کربلا ہے اور میں ہوں
بہشت ِ جانفزا ہے اور میں ہوں
چنوں موتی بیابان ِ نجف کے
یہ درِ ُمدعا ہے اور میں ہوں
نبیﷺ کہتے تھے اے حیدرؑ تمہارا
شناسا اک خدا ہے اور میں ہوں
نہ پہنچا کربلا میں جو دم ِ حشر
یہ بختِ نارسا ہے اور میں ہوں

مرزا دبیر نے اپنے 7 مرثیوں میں جنات کا ذکر کیا ہے۔ زعفر جن کا جو مرثیہ ہمارے خاندان میں پچھلی ۵ پشتوں سے پڑھا جا رہا ہے اس کے کچھ بند دیکھیے

ناگہ وہ غبار اڑتا ہوا نہر پر آیا
گھاٹوں پہ نہ پھر ایک نگہبان نظر آیا
ميدان کی بھی فوجوں کا منھ کو جگر آیا
ہر غول حضور شہ دیں ننگے سر آیا
ہاتھوں پہ تو دستاریں تھیں اور لب پہ یہ نالے
اے نوح ِ علیؑ کشتئ امت کو بچا لے

ہاتھوں کو کٹاۓ جہاں عباسؑ پڑے ہیں
وہاں غول کے غول اس گھڑی یا شاہ کھڑے ہیں
شکلیں ہیں مہیب اور قد و قامت بھی بڑے ہیں
غل ہے انھیں مارو کہ جو سیدّ سے لڑے ہیں
سب کرتے ہیں ماتم تن ِ صد پاش کے اوپر
سردار کو غش آگیا ہے لاش کے اوپر

جناب زعفر جن امام سے کہتے ہیں

حیدر نے مرے باپ کو جب شیعہ کیا تھا
مولا نے نشاں بارہ اماموں کا دیا تھا
روۓ تھے بہت آپ کا جب نام لیا تھا
دے کر یہ خبر خون جگر اپنا پیا تھا
میّت کوئ رہتی نہیں محتاج کفن کی
شبیّر کفن پاۓ گا نہ خاک وطن کی

دریاۓ کریمی نے پھر اک جوش جو مارا
فرمایا نہ گھبراؤ مجھے سر نہیں پیارا
یہ زعفر جن آیا ہے غمخوار ہمارا
لشکر بھی اسی کا یہ ترائ ميں ہے سارا
سر دوں گا پہ احسان کبھی سر پہ نہ لوں گا
اکبر کی قسم حکم ِ جہاد اس کو نہ دوں گا

صنعت غیر منقوط / مہملہ میں مرزا دبیر کا ایک پورا مرثیہ ہے

صمصام کو الہام ہوا سر کو علم کر
گہہ سورۂ الحمد کو گہہ ُصور کو دم کر
اک وار لگا اور دو اعدا کو قلم کر
ہر دم عمر ِ سعد کا دم محو ِ عدم کر
دو حصے کمر کر کہ الگ کاسۂ سر کر
ہر طرح مہم سہل کر اور معرکہ سر کر

حضرت علی اکبر کے گھوڑے کی تعریف

چلنے میں یہ شمشیر ہے پلے میں یہ ہے تیر
لڑنے میں یہ تقدیر بگڑنے میں ہے تدبیر
چھپنے میں یہ ہے خواب یاں ہونے میں تعبیر
جانے میں رسولوں کی دوا آنے میں تاثیر
مضمون ہیں بہت – پر کوئی دلچسپ نہیں ہے
اسرار ہے اعجاز ہے یہ اسپ نہیں ہے

غور کریں گے تو ہمارے پیج سوز سلام مرثیہ خوانی سے سب سے زیادہ مرزا صاحب کا کلام پوسٹ ہوتا ہے۔ کیوں کہ خدائے سخن میر انیس کی طرح دبیر شناسی اردو مرثیہ کے لئے انتہائی ضروری ہے
رثائ ادب کو دیکھتے ہوئے ہماری ایک آنکھ انیسی اور دوسری آنکھ دبیری ہونی چاہی۔ دونوں نے الگ الگ جمالیات مرثیہ نگاری پیش کی ہیں۔ اب کہ جب ہم اکیسویں صدی میں مرثیہ کو اگلی پشتوں تک پہچانے کا کام کر رہے ہیں اور اس لیے بھی کہ دبیر کافی عرصہ سے ناشروں کی عدم توجہی کا شکار رہے تھے ۔مگر اب عوام الناس دبیریت سے نزدیک ہورہے ہیں۔ ڈکٹر تقی عابدی کا کمال ہے کہ دبیر کے مرثیوں کے علاوہ ان کی نظم و نثر و مثنویات کی باقی تحریروں کو بھی انھوں نے ڈھونڈ کر نکالا اور چھان پھٹک کے بعد مرتب کر کے شائع کیا۔

دبیر نے بغیر نقطوں کے ایک کلام لکھا جس کا پہلا شعر:

“ہم طالع ہما مرا وہم رسا ہوا”

اس بے نقطہ نظم میں مرزا دبیر نے اپنے تخلص دبیر کی جگہ اپنا تخلص ’’عطارد‘‘ استعمال کیا اور اس پوری نظم میں شروع سے آخر تک ایک نقطے کا استعمال بھی نہیں کیا۔ ایک انگریز مصنف ، پرو فیسر اور قدیم اردو شاعری کے کے ماہر پروفیسر فرانسس ڈبلیو پرچیٹ نے ایک مقام پر لکھا ہے کہ’’ اس طرح کا مکمل مرثیہ نگار، شاعر اور انسان دوبارہ پیدا نہیں ہو سکتا‘‘

مجھے ایک صاحب ملے اور کہنے لگے دبیر کے کلام میں مبالغہ آرائی بہت ہے تو میں نے جواب دیا اگر مبالغہ میں سچی بات کہہ دی تو پھر وہ چپ ہوگۓ ۔ میں نے دو رباعیات سنا ڈالیں

حیدرؑ نے قدیر ازلی کو سمجھا
اللہ بھی خُوب اپنے ولی کو سمجھا
سمجھے جو خُدا علیؑ کو، ہے کفر دبیر
پر کہتا ہوں میں خدا علیؑ کو سمجھا

تھا نور ِ علیؑ شمس و قمر سے پہلے
مخلوق ہوۓ ابوالبشر سے پہلے
حیراں ہیں خلقت ِ علیؑ میں آدم
موجود تھا فرزند پدر سے پہلے

مرزا سلامت علی دبیر کا ایک مشہور مرثیہ در حال شہادت حضرت عباس ’’کس شیر کی آمد ہے کہ رن کانپ رہا ہے،” اب تاریخ کا حصہ بن گیا ہے۔

کس شیر کی آمد ہے کہ رن کانپ رہا ہے
رن ایک طرف چرخ کہن کانپ رہا ہے
رستم کا بدن زیر کفن کانپ رہا ہے
ہر قصر سلاطین زمن کانپ رہا ہے
شمشیر بکف دیکھ کہ حیدر کے پسر کو
جبریل لرزتے ہیں سمیٹے ہوے پر کو

مزید شہرہ آفاق مرثیے

بانو پچھلے پہر اصغر کے لیۓ روتی ہے – دبیر کا سب سے پہلا مرثیہ
قید خانے میں تلاطم ہے کہ ہند آتی ہے – محب آل محمدۖ ہند کا بیان
آہوئے کعبہ قربانئ داور ہے حُسین – ذبیحہ کی شرطیں اور شہادت حسین کا ذکر
کیا شان روضۂ خلف بوتراب ہے – زیارت ناحیہ کے اکثر فقروں کا مطلب بیان کیا
لعل لب شبیر گہر بار ہے رن میں – تمام علم بدیع اور علم بیان کی صعنتوں کو جمع کیا
اے قہر خدا رومیوں کو زیر و زبر کر – جب ترکوں نے کربلا میں 22 ہزار شیعہ قتل کۓ
اب تک کسی نے حر کا سراپا نہیں کہا – اس مرثیے میں جناب حر کا سراپا لکھا
آتش سے سبب دشمنئ آب کیا ہے – دونوں عنصروں کے سبب اہلبیت پر ہونے والے ظلم
مریم سے بھی بتول کو رتبہ سوا ملا
دست خدا کا قوت بازو حسین ہے
ماتم کا مرقع ہے کہ مجلس ہے خاموش
بلقیس پاسباں ہے یہ کس کی جناب ہے
قرآن مبیں سورۂ یک آیہ ہے کس کا
فہرست یہ شبیر کے لشکر کی رقم ہے
چہلم جو کربلا میں بہترّ کا ہوچکا
سبطین ِ علی رونق ِ میدان ِ وغا تھے
کس کی زباں سے پیاس نے پائی ہے آبرو
مومنوں بیکس و بےیار ہے مجبور حسین
مسافران مصیبت وطن میں آتے ہیں
تسبیح فاطمہ جو ادا کی امام نے

مرزا دبیر کے قریب 100 مرثیے ہیں جو قرآنی لفظ “اذا” یعنی جب سے شروع ہوتے ہیں۔ مثلا”

جب اختر یعقوب پہ مہر کی خدا نے – حضرت عباس کی شادی کا ذکر
جب رونق مرقع کون و مکاں ہوئ – ولادت حضرت علی اکبر
جب فاطمہ سے عقد شہ لافتی’ ہوا – مولاۓ کائنات و سیدۂ کونین کا عقد
جب تیغ انتقام برہنہ خدا نے کی – در حال حضرت مختار / انتقام قتل حسین
جب پریشاں ہوئ مولا کی جماعت رن میں – بہترین استعارے استعمال کیے ہیں
جب دختر ِ خاتون ِ قیامت ہوئ پیدا
جب حرم قلعۂ شیریں کے برابر آۓ
جب سے علم و فوج کا دنیا میں نشاں ہے
جب گور غریباں سے وطن میں حرم آۓ
جب کربلا میں عترت اطہار لٹ گئ
جب ختم کیا سورۂ ولیل قمر نے
جب کہ زنداں ميں نبیۖ زادیوں کو رات ہوئ

صبح کا منظر

جب سرنگوں ہوا علم کہکشان شب
خورشید کے نشاں نے مٹایا نشان شب
تیر شہاب سے ہوئی خالی کمان شب
تانی نہ پھر شعاع قمر نے سنان شب
آئی لو صبح زیور جنگی سنوار کے
شب نے زرہ ستاروں کی رکھ دی اتار کے

جذبات نگاری شاعری کی روح ہے اور اسی سے شاعر کی صحیح عظمت کا اندازہ ہوتا ہے۔ دبیر کے قلم میں جہاں جذبات نگاری کے اعلیٰ مرقعے نکلے ہیں، وہ کسی طرح بھی میر انیس کے بہترین شاہکاروں سے کم نہیں۔ مثلاً ا ایک بند اس کی اعلیٰ مثال ہےکہ جب حضرت علی اکبر رن میں جانے کے لئے ماں سے رخصت طلب کرتے ہیں مگر پھوپھی سے اجازت نہیں مانگتے، اس سے حضرت زینب کو رنج ہوتا ہے۔ خاص طور پر اس وجہ سے کہ علی اکبر کو انہوں نے پالا تھا۔

اکبر کے سنانے کویہ کہتی تھی زباں سے
اب عون و محمد تمہیں لائوں میں کہاں سے
جو کام کیا پوچھ ، کے مجھ سوختہ جاں سے
اب قدر ہوئی پیاروں کی جب چھٹ گئے ماں سے
کیا جان کے دم بھرتی تھی ہمشکل ِ نبی کا
سب کہنے کی باتیں ہیں نہیں کوئی کسی کا

اپنے ایک مرثیے میں حضرت علی اکبر کے حال میں چہرے کو مخصوص رنگ و آہنگ عطا کرتے ہیں

محتاجِ کفن لاش ہے کس فخر جہاں کی
ہم گورِ غریباں میں ہے دھوم آہ و فغاں کی
پوچھو تو زمانے میں ہے یہ رسم کہاں کی
تابوت پہ سہر ا نہیں میت ہے جواں کی
مرنا تو ہے برحق سبھی اک روز مریں گے
لیکن یہ شباب اور یہ اجل یاد کریں گے

ایک مرثیے میں مولاۓ کائنات کی اصحابِ کہف سے ملاقات کا ذکر کیا اور شہادت امام حسین پر ختم کیا ۔ جب آتش نے یہ پورا مرثیہ سنا تو کہنے لگے “ایسے مضامین کہو گے تو مر جاوگے یا خون تھوکو گے”

کوہ رقیم پر جو علیؑ کا گذر ہوا
اور غار میں نبیۖ کا وصی جلوہ گر ہوا
چہرے کی آب و تاب سے روشن وہ گھر ہوا
درج گہر بنا کبھی برج قمر ہوا
عکس ُرخ ِ علیؑ تھا دو چند آفتاب سے
اصحاب کہف ہو گئے بیدار خواب سے

ڈاکٹر سید ناظر حسین زیدی دبیر کے متعلق لکھتے ہیں،

”دبیر کے کلام کا خاص جوہر زورِ بیان ، شوکتِ الفاظ ، بلند تخیل ، ایجاز مضامین اور صنائع کا استعمال ہے۔ تخیل کی بلند پروازی ، علمی اصطلاحات ، عربی فقروں کی تضمین اور ایجاز مضامین کے زور میں وہ بے مثل ہیں یہ ان کی خاص مملکت ہے۔“

عقیدے کی پختگی

ناجی بخدا فرقۂ اثنا عشری ہے
القاب امامیہ ہے کیا ناموری ہے
اس فرقہ پہ اللہ کو مہر پدری ہے
نیکی تو پسندیدہ ہے عصیاں نظری ہے
وہ تحفہ کہ شایان خدائے ازلی ہے
اک ماتمِ شبیرؑ ہے اک حبِ علیؑ ہے

ہے ورد ِ زباں : “حیدرؑ ِ کرار امامی”
“حقا کہ حسنؑ سیّد ِ ابرار ، امامی”
“شاہ ِ شہدا ، فدیۂ غفّار ، امامی”
محتاج ِ دوا ، عابدؑ ِ بیمار ، امامی”
یارب میں تیرے بارہ اماموں کے تصدّق
شبّیرؑ کی اولاد کے ناموں کے تصدّق

بے نام علیؑ حق سے اذاں کرتی ہے شکوا
اس نام نے دو لطف اذاں میں کیے پیدا
الله و نبیﷺ اور علیؑ دیکھو تو اک جا
اور دوسرا اک لطفِ نہاں اس میں ہے پیدا
“ہے اسم ِ نبیﷺ بیچ میں الله و علیؑ کے”
“الله و علیؑ دونوں نگہباں ہیں نبیﷺ کے”

مرزا صاحب کے دور میں ایک شخص نے شدت سے عزاداری کی مخالفت کی تو مرزا صاحب نے جوابا یہ مرثیہ کہا

اے شمع قلم انجمن افروز رقم ہو
پر بزم مخالف کے لیے صاعقہ دم ہو
اے تیغ زباں نظم کے میداں میں علم ہو
اس طرح علم ہو کہ سر کفر قلم ہو
اے فکر رسا ناد علی پڑھ کے سنبھل جا
اے افعی مصرعہ تو خوارج کو نگل جا

علم الاعداد

کہنے سے اذاں کے دین سب ملتا ہے
پر نام ِ علیؑ نہ لو تو کب ملتا ہے
اعداد ِ “محمد ۖ ” اور “علیؑ” کو گن لو
یہ دونوں جو باہم ہوں تو “رب” ملتا ہے

ہے ثابت و روشن جو کرو خوب نگاہ
بارہ ہیں امامت کے فلک بارہ ماہ
بے شبہ کہ با خدا ہیں اثنا عشری
بارہ ہیں حروف لا الا الہ اللہ

ہندوستانی رنگ
بعد اس کے ہوا شور کہ لو آتی ہے بیوہ
تشریف نئی بیوہ کے گھر لاتی ہے بیوہ
گھونگھٹ کو الٹتے ہوئے شرماتی ہے بیوہ
سر گوندھا ہوا ساس سے کھلواتی ہے بیوہ
زینبؑ نے کہا بیوۂ فرزند حسنؑ ہے
یہ کیوں نہیں کہتے مرے قاسمؑ کی دلہن ہے

بین
مِرے غیور، مِرے کم سُخن علی اکبر
مِرے دلیر، مِرے صف شِکن علی اکبر
مِرے غریب، مِرے بے وطن علی اکبر
مِرے حسیں، مِرے نازُک بدن علی اکبر
بڑے سعید ہوئے اور بڑے رشید ہوئے
پدر کے بدلے جوانی میں تُم شہید ہوئے

مرزا دبیر کی صرف ایک نثری تصنیف ملتی ہے ’’ ابواب المصائب ‘‘ !اسے بھی ڈاکٹر تقی عابدی نے ڈھونڈ ہ نکالا ہے ۔یہ ان ہی کے اہتمام سے اشاعت پذیر ہوئی ہے اور اپنے طرز کی منفرد تصنیف معلوم ہوتی ہے اس میں حضرت یوسف کاجو احوال قرآن مجید میں آیا ہے اس کا تفصیلی ذکر کرتے ہیں۔ ان کے تمام مصائب وتکالیف کاموازنہ امام حسین کے مصائب وتکالیف سے کیا گیا ہے اس کا دیبا چہ بھی نثر میں ہے لیکن اس کی ابتدا ایک قطہ سے ہوئی ہے جس میں حمد باری تعالیٰ کے بعد نعت کے یہ چند اشعار مثنوی کی شکل میں ہیں:

شھد اللہ علی صدقِ رسول العربی
رحمہ للہ علیٰ آل و اولاد نبی
بعد حمد احدِ پاک لکھوں نعت رسول
کون وہ شہرِ علومِ احدی بابِ بتول
وہ رسولان سلف سے بخدا افضل ہے
بیش کار احمدِ مختار کا ہر مرسل ہے
فخرِ آدم ، شرف عالم و سرتاجِ ملک
قبلۂ اہلِ زمیں کعبۂ ارباب فلک
پہلے آغاز اسی سے ہوا اللہ کانام
انبیا سبحہ کے دانے ہیں یہ ان کا ہے امام
انبیا ذرے ،یہ خورشید فلک پرور ہیں
مصطفے چاند رسولانِ سلف اختر ہیں

کلامِ دبیر سے نعت گوئی کے یہ چند نمونے پیش کیے گئے ان سے واضح ہوتا ہے کہ دبیر حب نبی میں ڈوبے ہوئے تھے اور جس کسی صنف سخن میں طبع آزمائی کی اس کو ذکر نبی سے محترم اور معزز بنادیا رباعی ،قطعہ ،مثنوی ،مرثیہ ہرایک صنف کو موزوں قرار دیتے ہوئے فن کا وقار بھی قائم رکھا اور حضور کی فضیلت کے ذکر سے ان کا مرثیہ بھی آسمان تک پہنچا دیا ۔

شبلی اور ان کے حواریوں نے مرزا دبیر کے محاسن پر پردہ ڈال کر ان کی عیب جوئ کی ۔ نتیجہ یہ نکلا کہ ہم ایک بہت بڑے شاعر کی حقیقی تفہیم سے محروم رہ گۓ . اردو ادب میں جو دہشت گردی عام ہے اس کی تاریخ پرانی ہے ۔ مرزا دبیر کی حق فراموشی اردو ادب پر بہت بڑا ظلم ہے ۔ مرزا دبیر پر یہ اعتراض کیا گیا کہ وہ مشکل اور بھاری الفاظ استعمال کرتے ہیں جس سے دبیر کے کلام کے بارے ميں غلط فہمی ہونا شروع ہوگئ ۔ زبان و بیاں اور اسلوب الگ حیثیت نہیں رکھتا بلکہ موضوع اور خیال کی مناسبت سے ہی سامنے آتے ہیں لیکن فن اور ادب کی اس باریکی کو بہت کم لوگ سمجھ پاتے ہیں ۔ اسی ناسمجھی نے دبیر کے ساتھ بہت عرصہ تک انصاف نہیں ہونے دیا لیکن ادبی شعور منظر عام ہونے لگا اور شخصیت کی فرقہ پرستی کے خلاف بیداری پیدا ہونے لگی اور ایک نیا ادبی ماحول پیدا ہوا کئ ناقدوں خصوصا محمد زماں ، ثابت لکھنوی ، پروفیسر نیر مسعود ، ڈاکٹر کاظم علی خاں ، پروفیسر اکبر حیدری ، ڈاکٹر سید تقی عابدی جناب محمد رضا کاظمی اور ڈاکٹر ہلال نقوی کے نام سر فہرست ہیں جس سے دبیر کے بارے میں بدگمانی خاصی کم ہوئ۔ اور موجودہ دور میں فروغ ِ مرثیہ کے مورث ِ اعلی جناب اصغر مہدی رضوی اشعر، نامور محقق مرثیہ و تحت اللفظ خواں میرے بہت ہی عزیز دوست جناب فرحان رضا بکثرت دبیر کے مرثیے پڑھ کر مرثیے سے شغف رکھنے والوں کو دبیریت کے کمال دکھا رہے ہیں ۔ مرزا دبیر کے ضمن میں جناب سلمان حیدر رضوی کی تحریر بھی بے مثال ہے اور یہ بندہ احقر بھی اپنے پلیٹ فارم پر سب سے زیادہ دبیر شناسی پر کام کر رہا ہے۔

ناقدر ہیں گر اہلِ جہاں کچھ نہیں پرواہ
ہے شکر کی جا ہم کو شکایت نہیں اصلا
بندے کو ہے کافی کرم ِ خالق ِ یکتا
تعریف کی تحسین کی خواہش نہیں حاشا
جو حق کی طرف سے ہے وہ عزت نہیں جاتی
اجماع سے حیدرؑ کی خلافت نہیں جاتی

مرزا دبیر کو آخری عمر میں مرنے سے قبل چند صدمے اٹھانے پڑے ۔ پہلا صدمہ ان کے جوان بیٹے مرزا محمد ہادی تخلص عطارد کا 20 سال کی عمر میں انتقال ہوگیا ۔ دبیر نے فارسی کلام میں عطارد تخلص استعمال کیا ۔ دوسرا صدمۂ روحانی ان کے بڑے بھائ مرزا غلام محمد نظیر کے مرنے کا ہوا ۔ تیسرا صدمہ ان دونوں سے بڑھ کر ہوا وہ 29 شوال 1874 کو میر انیس کی وفات تھی جس پر مرزا دبیر بے اختیار روۓ اور فرمایا ایسے معجز بیان ، فی اللسان قدردان کے اٹھ جانے سے اب کچھ لطف نہ رہا اب ہمیں بھی چراغ سحری سمجھو۔ واقعہ اس طرح ہے کہ مرزا دبیر ایک مرثیہ نظم کر رہے تھے کہ میر انیس کے انتقال کی خبر ملی ۔ مرثیہ ناتمام چھوڑ دیا اور کہا “دبیر یہ تیرا آخری مرثیہ ہے” اور یہی نامکمل مرثیہ اپنی آخری مجلس میں پڑھا ۔ یہ مرثیہ حضرت عباس کے ولادت و حال میں تھا اور اس میں مولاۓ کائنات اور جناب ِ ام البنین کے عقد کا بھی ذکر ہے

انجیل ِ مسیح ِ لب ِ شبّیر ہیں عباسؑ
سرخئ سر ِ سورۂ تقدیر ہیں عباسؑ
یہ مصحف ِ اخلاص کی تفسیر ہیں عباسؑ
ہر جزو ِ ُکل آیۂ تسخیر ہیں عباسؑ
شمشیر ِ خدا ہیں سپر ِ شاہ عرب ہیں
خالق کے سوا قبضہ میں اس تیغ کے سب ہیں

اور میر باقر کے امام باڑے میں وہ معرکہ الٓارا قطعۂ تاریخ پڑھا جو میر انیس کی قبر پر کندہ ہے

آسماں بے مہ کامل سدرہ بے روح الامیں
طور ِ سینا بے کلیم اللہ و منبر بے انیسؔ

اور آخر میں کچھ مختصر مگر چیدہ نکتے “مرزا دبیر یکتاے فن زماں”

١- مرزا دبیر اردو کا وہ تنہا شاعر ہے جس نے اردو شعرا میں سب سے زیادہ اشعار کہے . دبیر کے مطبوعہ اشعار کی تعداد ١ لاکھ 20 ہزار سے زیادہ ہے
٢ – مرزا دبیر اردو کا وہ تنہا شاعر ہے جس نے سب سے زیادہ مرثیے لکھے. مطبوعہ مرثیوں کی تعداد تقریباََ 450 ہے
٣ – مرزا دبیر اردو کا وہ تنہا شاعر ہے جس نے سب سے زیادہ رباعیات کہیں . مرزا دبیر کی رباعیات کی تعداد ١٣٣٢ ہے جن کو 106 مضامین پر تقسیم کیا جاسکتا ہے. جیسے دبیر خود ایک مصرع میں کہتے ہیں
“مضمون میرا گھر پوچھتا آتا ہے فلک سے”
٤- مرزا دبیر اردو کا وہ تنہا شاعر ہے جس نے سب سے زیادہ الفاظ استعمال کیے
٥. مرزا دبیر اردو کا وہ تنہا شاعر ہے جس نے صنعت غیر منقوط یا مہملہ میں سب سے زیادہ اشعار کہے . انشا اللہ خان انشا جو دبیر کے سگے نانا خسر تھے ، ان کے غیر منقوط اشعار دبیر سے تعداد میں کم ہیں. تقی عابدی نے اسی عنوان سے دبیر پر ایک کتاب “طالع مہر” تحریر فرمائی ہے
٦. مرزا دبیر اردو کا وہ تنہا شاعر ہے جس کی آمدنی ہزاروں روپیوں تک تجاوز کر گئی تھی اور وہ سب اہل حاجت میں تقسیم ہوتی تھی۔
٧. مرزا دبیر اردو کا وہ تنہا شاعر ہے جس نے علم بدیع کی لفظی اور معنوی صنعتوں کو سب سے زیادہ استعمال کیا ہے۔
٨. مرزا دبیر اردو کا وہ تنہا شاعر ہے جس کے حسب پر ، نسب پر ، مذہب پر ، شخصیت پر ، فن پر استاد اور شاگردوں کی طرف سے حملے کیے گۓ
٩ – مرزا دبیر اردو کا وہ تنہا شاعر ہے جس کے دوست “دبیریے” اور مخالف “انیسیے” شدید تھے . اردو ادب نے ایسی چشمک نہیں دیکھی اگر چہ مرزا دبیر اور میر انیس کے دل ایک دوسرے سے صاف تھے اور دونوں ایک دوسرے کی بہت قدر کرتے تھے
١٠ – مرزا دبیر اردو کا وہ تنہا شاعر ہے جس نے نثری کتاب ابواب المصائب کے علاوہ شاعری کی ہر ہیت اور صنف ، یعنی غزل ، نظم ، قصیدہ ، مثنوی ، قطعہ ، مخمس ، مسدس ، تاریخ ، رباعی ، سلام ، مرثیہ ، شہر آشوب اور تضمین میں شاہکار چھوڑے ہیں
١١. مرزا دبیر اردو کا وہ تنہا شاعر ہے جس نےاپنی وفات کی تاریخ کی دعا محرم کے ایام میں مانگی تھی جو مستجاب ہوئی. دبیر کا انتقال ٣٠ محرم ١٢٩٢ ہجری کو ہوا

جب ُمصحف ِ ہستی مرا برہم کرنا
سی پارۂ ایام ِ محرم کرنا
برباد نہ جائے مری خاک اے گردوں
تیار چراغ ِ بزم ِ ماتم کرنا

ہزاروں آدمی جنازے میں شریک ہوئے اور اکثر مرزا مرحوم کی یہ رباعی پڑھتے جا رہے تھے
رحمت کا تری امید وار آیا ہوں
منہ ڈھانپے کفن سے شرمسار آیا ہوں
چلنے نہ دیا بار گنہ نے پیدل
تابوت میں کاندھوں پہ سوار آیا ہوں

دبیر شناسی کے حوالے سے پچھلے پانچ سال بڑے اہم رہے ہیں۔ پہلے تو فروغ مرثیہ کی گراں پیش کش “فرہنگ دبیر” شائع ہوئ۔ پھر جناب فرحان رضا اور ان کے فرزند ارجمند ماسٹر مصطفیٰ رضا کی جانب سے مرزا صاحب کا منتخب نمونہ کلام اوران پر لکھے گئے منتخب مضامین کا مجموعہ “دبیریات” شائع ہوا جس کی کم از کم 200 کاپیاں بٹ چکیں ہیں۔ محقق مرثیہ اور خطیب مولانا ارتضی عباس نے “خزینہِ دبیر” کے نام سے ایک بہترین کتاب ترتیب دی جس میں تمام آئمہ کے حال پر مراثی موجود ہیں اور فروغ مرثیہ کے مورث اعلی اصغر مہدی اشعر اب تک “دبیر کے مرثیے” جلد اول ، دوم، سوم، چہارم اور پنجم شائع کرچکے ہیں جو فضلی سنز اور محفوظ بک ایجنسی سے دستیاب ہیں ۔ پروردگار ہم سب کو دبیر شناسی کی مزید توفیق عطا فرماے تاکہ اس چشمے کا جو پانی رواں دواں ہے اس سے کچھ فیضیابی حاصل کرسکیں

ترتیب و انتخاب و پیشکش : ذیشان زیدی

SHARE

LEAVE A REPLY