راولپنڈی سے غیر معمولی تز رفتاری کے ساتھ نواز شریف کا قافلہ جہلم پہنچ گیا

0
105

نواز شریف کا قافلہ راولپنڈی سے غیر معمولی تز رفتاری کے ساتھ جہلم پہنچ گیا جہاں اطلاعات کے مطابق وہ لوگوں سے خطاب کریں گے۔ گزشتہ روز یہ قافلہ جتنی سست روی سے اسلام آباد سے پنڈی پہنچا تھا آج اس سے کئی گنا تیزی سے جہلم پہنچا ہے

اس سے قبل سابق وزیراعظم نواز شریف نے عوام کو مخاطب کرتے ہوئے کہا ہے کہ معزز ججوں نے نواز شریف کو گھر بھجوادیاہے کیا آپ کو منظورہے؟
نوازشریف نے سوہاوہ پہنچنے پر مختصر خطاب کرتے ہوئے کہا کہ آپ نے نواز شریف کو ووٹ دے کر ملک کا وزیراعظم بنایا تھاکہ نہیں؟ میں آپ کی نااہلی کامقدمہ لےکرنکلاہوں۔
انہوں نے کہا کہ نواز شریف پر کوئی کرپشن کا الزام نہیں ہے۔

اس سے قبل سابق وزیراعظم نوازشریف پنجاب ہاؤس راولپنڈی میں رات بھر قیام کےبعد لاہور کے لئے روانہ ہوئے، راولپنڈی سے نکلتے ہی حکمت عملی کے تحت سابق وزیراعظم کے قافلے کی رفتار بڑھادی گئی، ریلی میں شامل بلٹ پروف کنٹینر بھی پیچھے رہ گیا۔

ن لیگ کے رہنما طلال چوہدری نے جیو نیوز سے گفتگو کرتے ہوئے بتایا کہ کل رش کے باعث نواز شریف کی گاڑی نہیں نکل سکی، آج کوشش کی جائے گی کہ شیڈول کے مطابق آگے بڑھا جا سکے۔ ہمیں کل ہی جہلم پہنچنا تھا لیکن نہیں پہنچ سکے اس لئے قافلے کی رفتار بڑھائی گئی ہے تاکہ آج وقت پر وہاں پہنچا جاسکے۔

نوازشریف کا قافلہ جی ٹی روڈ پر کھاریاں،لالہ موسیٰ، گجرات ،گوجرانوالہ سے ہوتا ہوا لاہور میں پہنچے گا۔

راولپنڈی کے پنجاب ہاؤس سے روانگی سے قبل میاں نوازشریف سے وزیراعظم آزاد کشمیر راجہ فاروق حیدر اور وزیر داخلہ احسن اقبال نے ملاقات کی، جس کے دوران آئندہ کی حکمت عملی پر مشاورت کی گئی۔ سابق وزیراعظم نے دعا بھی کرائی۔

پنجاب ہاؤس راولپنڈی سے روانگی پر کارکنان نے میاں نوازشریف پر پھولوں کی پتیاں نچھاور کیں، کارکنان کی بڑی تعداد آج بھی سابق وزیراعظم کے قافلے کے ساتھ موجود ہے۔
سابق وزیر اعظم نواز شریف کے استقبال کے لیے پہلوانوں کے شہرگوجرانوالہ میں ن لیگی کارکنوں کی تیاریاں جاری ہیں، گوجرانوالہ کے مختلف مقامات پرکارکن موجود ہیں جبکہ استقبالیہ کیمپ بھی قائم ہیں، کارکنوں نے چاربکروں کا صدقہ بھی دیا۔

ادھر جہلم میں نوازشریف کے استقبال کے لیے تیاریاں جاری ہیں، جادہ چونگی چوک پرقائدین کےخطاب کے لیےاسٹیج تیارکرلیا گیا، اسٹیج پربلٹ پروف ڈائس رکھ دیا گیا ہے۔
دوسری جانب چودھری نثار نے کہا کہ انہوں نے کمر میں تکلیف کی وجہ سے ریلی میں شرکت نہیں کی۔

سابق وزیراعظم کی لاہور روانگی کے باعث راولپنڈی سے لاہور تک 3 روز کے لیے جی ٹی روڈ کو ہیوی ٹریفک کے لیے بند کیا گیا ہے۔ ایمبولینسوں اور فائربریگیڈ سمیت پبلک ٹرانسپورٹ کو بھی جی ٹی روڈ استعمال کرنے کی اجازت نہیں دی گئی اور ٹریفک کو متبادل راستے سے گزارا جائے گا۔

لاہور روانگی سے قبل مسلم لیگ ن کی رہنما ماروی میمن کا کہنا تھا کہ راولپنڈی کے لوگوں نے بہت پیار دیا ، کارکن بڑی تعداد میں موجود ہیں ،آج جہلم پہنچ جائیں تو بڑی بات ہے۔
اس موقع پر مسلم لیگ ن کے رہنما مشاہد اللہ کا کہنا تھا کہ مخالفین کی زبانیں گنگ ہوچکی ہیں۔

سابق وزیراعظم نواز شریف کی اسلام آباد کے پنجاب ہاؤس سے نکلنے والی ریلی رات گئے تک پنجاب ہاؤس راولپنڈی تک پہنچ پائی تھی۔ رات کو مری روڈ پر مسلم لیگ ن کے کارکنوں کا جم غفیر تھا۔

SHARE

LEAVE A REPLY