سپریم کورٹ نے حمزہ شہباز کو گرفتاری سے قبل آگاہ کرنے کے لاہور ہائیکورٹ کے حکم کیخلاف نیب درخواست پر فیصلہ دیتے ہوئے حکم کو کالعدم قرار دے دیا ہے۔
سپریم کورٹ کے جج جسٹس اعجاز الاحسن نے تین رکنی بینچ ( جسٹس منیب اختر اور جسٹس مظاہر اکبر نقوی ) کے ہمراہ جمعرات 24 نومبر کو قومی احتساب بیورو ( نیب ) کی جانب سے دائر درخواست پر سماعت کی۔
سماعت کے دوران لاہور ہائی کورٹ کے فیصلے کے خلاف سپریم کورٹ نے ریمارکس دیتے ہوئے کہا کہ گرفتاری سے قبل ملزم کو آگاہ کرنے کی قانون میں کوئی شرط نہیں ہے۔
سپریم کورٹ کا یہ بھی کہنا تھا کہ گرفتاری سے قبل آگاہ کرنے کا لاہور ہائیکورٹ کا حکم خلاف قانون ہے۔ حمزہ شہباز کو گرفتاری سے 10 دن قبل آگاہ کرنے کا حکم عدالتی نظیر کے طور پر استعمال نہ کیا جائے۔ عدالت عظمیٰ کی جانب سے لاہور ہائی کورٹ کا حکم غیر موثر ہونے کی بنیاد پر کیس کو نمٹا دیا گیا۔
واضح ہے کہ لاہور ہائی کورٹ نے پاکستان مسلم لیگ نواز ( ن) کے رہنما حمزہ شہباز کو صاف پانی، رمضان شوگر ملز اور آمد سے زائد اثاثہ جات کیس میں گرفتاری سے قبل آگاہ کرنے کا حکم دیا تھا۔
نیب کی جانب سے 18 نومبر کو سماعت کیلئے مقرر کی گئی درخواست میں مؤقف اختیار کیا گیا تھا کہ ملزم کو گرفتاری سے پہلے آگاہ کرنا ضروری نہیں۔ لاہور ہائیکورٹ کا فیصلہ قانون کے برخلاف ہے۔
