سپریم کورٹ نے زینب کیس میں غیر ذمہ دارانہ صحافت کرنے پر ڈاکٹر شاہد مسعود کے پروگرام پر 3 ماہ کی پابندی لگا دی۔ عدالت نے ریمارکس دیئے کہ ڈاکٹر شاہد مسعود 3 ماہ تک پروگرام نہیں کر سکتے، الزامات پر معافی بھی مانگنا ہوگی۔
ڈاکٹر شاہد مسعود کیس کی سپریم کورٹ میں سماعت ہوئی، چیف جسٹس پاکستان ثاقب نثار نے ریمارکس دیئے کہ ہم آپ کو پھانسی نہیں دیں گے، ڈاکٹر شاہد مسعود تحریری معافی نامہ جمع کرائیں جس میں غیر مشروط معافی مانگنا ہو گی، تحریری معافی نامہ جمع کرانے کے بعد حکم نامہ جاری کریں گے۔
وکیل نے کہا ڈاکٹر شاہد مسعود غیر مشروط معافی کیلئے تیار ہیں۔ چیف جسٹس ثاقتب نثار نے ریمارکس دیئے کہ پیمرا قانون کے تحت پروگرام بند اور دہشتگردی کا مقدمہ بھی بن سکتا ہے، آپ نے خود کہا تھا الزام جھوٹا نکلے تو پھانسی لگا دیں، ہم پھانسی نہیں لگائیں گے، آپ اپنی سزا خود تجویز کر لیں، 6 ماہ کیلئے آف ایئر ہو جائیں، معاف کردوں گا۔
چیف جسٹس پاکستان ثاقب نثار نے کہا اب عدالت پہلے والی نہیں رہی، شاید میں بدل گیا ہوں۔ ڈاکٹر شاہد مسعود نے کہا ایک ماہ کیلئے پروگرام آف ایئر کر دیتا ہوں۔ جس پر چیف جسٹس پاکستان نے کہا ایک ماہ سے کام نہیں چلے گا۔
