پولنگ کے دن شام چھ بجے سے تا حال میری ہنسی ہے کہ روکے نہیں رک رہی ۔ دوسری طرف کا حال یہ ہے کہ دوڑیں اور پریشانیاں ختم ہونے کا نام نہیں لے رہیں ۔ اب یہ ہے تو سراسر غلط بات کہ کسی کی پریشانی پہ آپ ہنسنا شروع کر دیں مگر معاملہ ہی ایسا ہے کہ اس پر ہنسا ہی جا سکتا ہے ۔ پاکستان کی سب سے بڑی عدالت سے نااہلی کی سند پانے اور پارلیمانی سیاست سے آوٹ ہونے والے جہانگیر ترین، نیب کے مسلسل نشانے پر موجود علیم خان اور برطانیہ کی پارلیمان سے ہوتے ہوئے گورنری کے مزے لینے کے بعد پاکستان تحریک انصاف کو پیارے ہونے والے چودھری سرور پورے ملک میں بھاگ بھاگ کے عالمی ریکارڈ قائم کرنے پر تلے ہوئے ہیں مگر دوڑ ہے کہ ختم ہونے کا نام ہی نہیں لے رہی بے چارے کبھی سڑکوں پر بھاگتے ہیں تو کبھی فضاوں میں پرواز کرتے دکھائی دیتے ہیں ۔ کہیں کی اینٹ کہیں کا روڑا بھان متی نے کنبہ جوڑا کی واضح مثال آج کل پاکستان تحریک انصاف نظر آتی ہے ۔ یہ اینٹیں اور روڑے اکٹھے کرنے میں جہاں پاکستان تحریک انصاف کے باقی رہنما مصروف ہیں وہاں مذکورہ بالا تینوں شخصیات کچھ زیادہ ہی نمایاں ہیں ادھر ادھر سے گھیر گھار کے قومی اسمبلی کے ممبران کی تعداد پوری کرتے ہیں تو صوبائی اسمبلی کے ممبران کی تعداد کم ہو جاتی ہے پھر جہاز لے کر نکل کھڑے ہوتے ہیں صوبائی اسمبلی کے آزاد منتخب ہونے والے ممبران کی منت سماجت کر کے انہیں اپنے چئیرمین کے حضور پیش کرتے ہیں اور ابھی دم بھی نہیں لینے پاتے کہ معلوم ہوتا ہے قومی اسمبلی کے ممبران کی تعداد کم ہو گئی ہے یوں تینوں بے چاروں کو پھر نئے سرے سے بھاگنا پڑ جاتا ہے ۔
