بنگلہ دیش میں عام انتخابات سے قبل حکومتی سیاسی جماعت کے حامیوں کے ایک حملے میں کم از کم 10 صحافی زخمی ہو گئے ہیں۔ مقامی میڈیا کے مطابق لاٹھیوں سے مسلح افراد نے نواب گنج کے علاقے میں پیر کی شب ایک موٹل پر حملہ کر دیا جہاں کئی مقامی میڈیا اداروں کے صحافی ٹھہرے ہوئے تھے۔ حملہ آوروں نے دو بنگلہ دیشی ٹیلی وژن چینلز سے تعلق رکھنے والے کم از کم 10 صحافیوں کو زخمی کر دیا جبکہ 16 کاروں کے شیشے توڑ دیے۔ اس حملے کی ذمہ داری حکمران عوامی لیگ کے اسٹوڈنٹ اور یوتھ وِنگ پر عائد کی گئی ہے۔ ایک مقامی نیوز پیپر کے مطابق اس کے صحافی پیر کی شام سے لاپتہ ہیں۔
