تیسرے ایک روزہ بین الاقوامی میچ میں آسٹریلیا نے پاکستان کو میچ جیتنے کے لئے 267 رنز کا ہدف دیا ہے۔
پہلے اور دوسرے ون ڈے کی نسبت پاکستانی بولرز نے اچھی گیندیں کرائیں اور عثمان شنواری نے صفر پر اوپنر عثمان خواجہ کو پویلین بھیج دیا۔
ابھی اسکور صرف 20 ہوا تھا کہ شان مارش کو جنید خان نے شان مسعود کے ہاتھوں کیچ آؤٹ کرادیا، وہ 14رنز بناکر آؤٹ ہوئے۔
ابتدائی دو وکٹیں جلد گرنے کے بعد فنچ اور ہینڈزکومب نے اننگز کو سنبھالا۔
دونوں بیٹسمینوں نے تیسری وکٹ کی شراکت میں شاندار 84 رنز کا اضافہ کیا، لیکن ہینڈزکومب 47 رنز بناکر پویلین لوٹ گئے، انہیں حارث سہیل نے کلین بولڈ کیا۔
اسٹوئنیس جلد وکٹ گنوا بیٹھے، وہ 10 رنز پر عماد وسیم کی گیند پر کلین بولڈ ہوئے۔
دونوں میچوں میں سنچری بنانے والے فنچ اس میچ میں صرف 10 رنز کی کمی سے مسلسل تیسری سنچری نہ بناسکے اور 90 رنز پر یاسر شاہ کو وکٹ دے بیٹھے۔
میکسویل برق رفتار 71 رنز کی اننگز کھیل کر رن آؤٹ ہوئے۔
اس طرح آسٹریلیا نے مقررہ 50 اوورز میں 6 وکٹوں کے نقصان پر 266 رنز بنائے۔
کیرے 25 اور کمنس 2 رنز کے ساتھ ناٹ آؤٹ رہے۔
عثمان شنواری، جنید خان، یاسرشاہ، عماد وسیم اور حارث سہیل نے ایک، ایک وکٹ حاصل کی۔
محمد حسنین سب سے مہنگے بولر ثابت ہوئے انہوں نے 5 اوورز میں 50 رنز دیئے۔
