میریلیبون کرکٹ کلب (ایم سی سی) نے دورۂ پاکستان کے پہلے میچ میں لاہور قلندرز کو چار وکٹ سے ہرا دیا۔ مہمان ٹیم نے 136 رنز کا ہدف آخری اوور میں حاصل کرلیا۔ روی بوپارا نے 42 رنز کی شاندار اننگز کھیلی۔
قذافی اسٹیڈیم میں کھیلے گئے ٹی ٹوئنٹی میچ پہلے بیٹنگ کرتے ہوئے لاہور قلندرز کے اوپنرز فخر زمان اور سلمان بٹ نے دھواں دھار آغاز کیا۔ سلمان بٹ 28 رنز بناکر آؤٹ ہوئے جبکہ فخر زمان نے 45 رنز کی اننگز کھیلی۔
پھر کپتان سہیل اختر نے 28 گیندوں پر 40 رنز کی ناقابل شکست اننگز کھیلی اور ٹیم کا اسکور 20 اوورز میں 5 وکٹ پر 135 تک پہنچادیا۔
جواب میں ایم سی سی کے بلے بازوں نے بھی شاندار بیٹنگ کی۔ کمار سنگا کارا نے اپنے تجربے کا بھرپور مظاہرہ کیا، انہوں نے 25 رنز بنائے، پھر سُمیت پٹیل نے 31 اور روی بوپارا نے 42 رنز کی اننگز کھیل کر ٹیم کی جیت یقینی بنا دی۔ رہی سہی کسر دیگر کھلاڑیوں نے پوری کر دی۔
یوں ایم سی سی نے ہدف آخری اوور میں چھ وکٹ پر حاصل کر لیا۔
ٹور کے دوسرے میچ میں ایم سی سی اور پاکستان شاہینز اتوار کو مدمقابل ہوں گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان کے دورے پر آنے والی میریلیبون (ایم سی سی) کی ٹیم کل قذافی اسٹیڈیم لاہور میں لاہور قلندرز کے ساتھ ٹی ٹوئنٹی میچ کھیلے گی۔
لاہور قلندرز کی انتظامیہ نے ایم سی سی کے دورہ پاکستان کو تاریخی قرار دیا اور کہا ہے کہ پی ایس ایل سے قبل لاہور قلندرز کو میچ کا بہت فائدہ ہوگا۔
کمار سنگاکار کی قیادت میں ایم سی سی کی ٹیم آج صبح لاہور پہنچی جبکہ کل قذافی اسٹیڈیم لاہور میں لاہور قلندرز کے خلاف پہلا ٹی ٹوئنٹی میچ کھیلے گی۔
قلندرز کے سی او او اور منیجر ثمین رانا کا کہنا تھا کہ ایم سی سی کو پاکستان میں خوش آمدید کہتے ہیں، میچ کا لاہور قلندرز کو تو فائدہ ہوگا ہی لیکن اس سے پاکستان کا بھی سافٹ امیج دنیا میں جائے گا۔
ہیڈ کوچ لاہور قلندرز عاقب جاوید کا کہنا تھا کہ لوگ زیادہ سے زیادہ اسٹیڈیم آئیں اور دنیا کو بتائیں کہ ہم کرکٹ سے پیار کرتے ہیں۔
میچ کی حکمت عملی سے متعلق انہوں نے کہا کہ ہمیں کمبی نیشن آزمانے کا موقع ملے گا۔
کپتان لاہور قلندرز سہیل اختر نے کہا کہ یہ میچ پی ایس ایل کی تیاریوں کے لیے بھی اہم ہوگا۔
لاہور قلندرز اور ایم سی سی کے درمیان ٹی ٹوئنٹی میچ جمعہ کی شام پانچ بجے شروع ہو گا، جس کے لیے لاہور قلندرز نے مفت ٹکٹس تقسیم کی ہیں۔












