کرونائی غزل
ہر شخص ہے رنجور کرونا کی بدولت
سوچیں ہوئیں ناسور کرونا کی بدولت
یہ خامشی جسطرح لہو چاٹ رہی ہے
پھونکا ہے گیا صور کرونا کی بدولت
اب قُربت محبوب کی باتیں ہیں کہانی
بدلے سبھی دستور کرونا کی بدولت
ہم پہلے بھی کمرے میں رہا کرتے ہیں تنہا
ہم اب بھی ہیں محصور کرونا کی بدولت
ہر روز بچھڑنے کی جو دیتا رہا دھمکی
اب دور بہت دور کرونا کی بدولت
وہ جن سے کبھی بات کو بھی دل نہیں چاہا
کہلائے وہ منصور کرونا کی بدولت
زائر کو یا تبلیغی کو لگتا ہے کرونا
یہ سوچ ہے معذور کرونا کی بدولت
جنت میں بھی سناٹا ہے اب کیا کرے ملاں
غائب ہوئی ہر حور کرونا کی بدولت
اے جان سخن دُکھ تری فرقت کا قیامت
صفدر کو ہے منظور کرونا کی بدولت
صفدر ھمدانی













