کیلنڈر میں سال نو کا مطلب یہ سمجھانا ہے
خاک کے اوپر کی دنیا سے خاک کے نیچے جانا ہے
خاک کے اوپر کی دنیا کی خاک ہی اصل نشانی ہے
خاک کے نیچے کی دنیا انسان کی اصل کہانی ہے
دولت شہرت عزت طاقت رشتے سب کچھ فانی ہے
سیرت باقی رہ جانی ہے صورت تو مٹ جانی ہے
کیا لکھو گے لکھنے والو جھوٹے سب افسانے ہیں
کیا اس سال بھی ہم نے پچھلے سال کے سوگ منانے ہیں
سب کے اپنے اپنے جھنڈےسب کے الگ ترانے ہیں
کیا اس سال بھی ہم نے نفرت کے ہی تیر چلانے ہیں
بھوک کی اونچی دیواروں کے تاج محل بنانے ہیں
کیا اس سال بھی ہم نے غیروں کے ہی ڈھول بجانے ہیں
بونے قد کے دانشور اور لمبی بہت زبانیں ہیں
سال نیا ہے بے شک لیکن لوگ تو وہی پرانے ہیں
جنتر منتر جادو ٹونے اور نجومی آئیں گے
ٹی وی کی سکیرینوں پر گمراہی وہ پھیلایں گے
نئے سال میں کیا کیا ہوگا یہ ہم کو بتلائیں گے
نفرت کرنے والے ہم کو پیار کا سبق پڑھایں گے
خون کی ہولی کھیلیں گے اور پھر غایب ہوجایں گے
اندھی یہ تصویریں ہیں اور گونگی یہ تحریریں ہیں
جو بویا تھا کل ہم نے سب اس کی تاثیریں ہیں
تلوے چاٹنے والوں کے تو پاس بڑی جاگیریں ہیں
محنت کرنے والوں کے ہاتھوں میں صرف لکیریں ہیں
آگے جو بڑھ سکتے ہیں اُن پیروں میں زنجیریں ہیں
رونے والی آہوں کی قسمت کو جو چمکایں گے
مقتل کی تاریک گھٹن میں حق کا علم اُٹھایں گے
غربت اور جہالت کے یہ دن بھی کبھی تو جایں گے
انسان جنہیں کہہ سکتے ہوں وہ لوگ کبھی تو آیئں گے
آج نہیں تو کل لیکن انصاف کبھی تو آئے گا
سانپوں کے اس زہر کا بھی تریاق کبھی تو آئے گا
ڈاکو چور لٹیروں کو جو سولی پر لٹکائے گا
پسا ہوا مزدور بھی جس دن وافر روٹی کھائے گا
سوچ رہا ہوں ایسا بھی اک سال کبھی تو آئے گا
سوچ رہا ہوں ایسا بھی اک سال کبھی تو آئے گا
عزیررشید












