کم و بیش دوڈھائی ماہ پہلے ڈاکٹر خورشید عبداللہ نے بریکینگ نیوز دی تھی کہ انہوں نے نصیر بھائی کے گرد گھیرا تنگ کیا ہوا ہے اور نصیر بھائی سے ایک ایسے کام کے لیے حامی بھر والی ہے جو واقعی کار دشوار ہی نہیں ناممکنات میں شمار کیا جا سکتا ہے۔ اس روز پہلی بار ہمیں احساس ہوا کہ ہم بھی عقل مندوں کی فہرست میں شامل کیے جاسکتے ہیں کیونکہ ہمارے یار خورشید نے جو مبہم سا اشارہ دیا تھا وہ یہ سمجھنے کے لیے کافی تھا کہ نصیر بھائی کی کوئی کتاب شائع ہونے کو ہے۔مجھے معجزوں سے زیادہ ڈاکٹر خورشید کی ادبی سنجیدگی پر یقین تھا اس لیے پہلا سوال یہی کیا کتنی غزلیں شامل ہوں گی۔۔۔ ڈاکٹر مسکرائے ، بولے قبلہ ان کا رثائی کلام شائع ہورہا ہے۔۔۔خبر بڑی تھی اس لیے تجسس کا لیول بھی بڑھتا چلا گیا مگر ڈاکٹر نے نے ہمیں فوری طور پر اپنی کلینک کے مکسچر پر ٹرخا دیا ، ارشاد فرمایا قبلہ دو چار روز میں افاقہ نہ ہوا تو اینٹی بائوٹک کے ذر یعے مرض تجسس پر قابو پانے کی کوشش کی جائے گی۔۔ مارچ کی دو تاریخ کو فون کی گھنٹی بجی۔۔۔ صبا ۔۔۔بھئی اپنا ایڈریس ایس ایم ایس کرو۔۔ کتاب بھجوانی ہے۔ اس سے پہلے کہ ہم نصیر بھائی سے تہنیتی
کلمات عرض کرتے فون بند ہو چکا تھا۔ کتاب ملی تو سرورق دیکھ کر ہی یقین ہوگیا کہ یہ نصیر بھائی ہی کی کتاب ہے۔مزید تصدیق کتاب کی پشت پر ان کی تصویر اور اس سے بھی زیادہ اس شعر سے ہوگئی جو تصویر کے نیچے اپنے منہ سے اپنا تعارف کروا رہا تھا۔۔۔۔۔۔۔
نکل کے نرغہ شر سے تری پناہ کی سمت۔۔۔۔۔۔۔۔۔ میں آرہا ہوں مرا انتظار کر مولا۔۔۔۔۔۔۔۔۔۔۔۔۔۔۔۔
اس نقش پا کے بعددوسرے نقش پا کی تلاش میں الٹے پاوں نکل کھڑے ہوئے۔۔ دیکھا نصیر ترابی سراج اورنگ آبادی کے قدموں میں اجازت طلبی کے لیے حاضر تھے پھر انہوں نے
میر صاحب کو جھک کر سلام کیا، مصحفی کے ہاتھوں کو بوسہ دیا۔ غالب کے قدم چھوئے، انیس کی طرف ملتجیانہ نگاہوں سے دیکھا امیر مینائی کے تغزل کو سلام کیا، شاد عظیم ابادی
سے داد چاہی، اقبال کے شکوہ کے سامنے نظریں جھکا لیں، حسرت موہانی، یگانہ، جگر فیض مدنی،ناصر کاظمی، مجید امجد اور مصطفی زیدی کو اپنی نئی کتاب لاریب کانسخہ پیش کیا اور بزم آواز ہمیشگاں سے نکل کر خاموشی سے عقیدہ نوائی کرتے ہوئے ہمیں بھی اپنے احسن الانتساب تک لے گئے۔۔۔
بگو نصیر شمار از خدا چہ می خواہی
ز طیبہ و نجف و کربلا چہ می خواہی
کتاب کا ایک ایک ورق نصیر بھائی کی بے پناہ منفرد تخلیقی صلا حیتوں کی گواہی دے رہا تھا
کلام کی فہرس مرتب کی تو اسے تار نفس کا عنوان دیا۔۔۔ اور پھر اپنے رب کا شکر ادا کرتے ہوئے استغاثہ تک پہنچ گئے کہ یہی وہ منطقی ترتیب ہے جس کا پہلا درس کربلا کے میدان میں دیا گیا تھا۔۔ کتاب میں حمد نعت سلام قصیدہ مناجات شامل ہیں۔اور ہر صنف میں نصیر بھائی کا مخصوص منفرد رنگ جھلکتا نظر آتا ہے۔۔ لاریب کی ایک نظم نفس جبریل جو علامہ اقبال کی ایک غزل مسلسل کی تضمیں ہے، نصیر بھائی کے تخلیقی جوہر اور رنگ غیر سے اپنی خوشبو کشید کرنے کی بہترین مثال کے طور پر سامنے آئی تو بے ساختہ داد دینے کا جی چاہا۔۔اس نظم کے صرف ایک دو بند حاضر ہیں
پس حجاب ہیں وہ جستجو روی دے کر
سکوت غیب کو آہنگ دل بری دے کر
کرم دراز کیا قرض ٓآگہی دے کر
عجب مزا ہے مجھے لذت خودی دے کر
وہ چاہتے ہیں کہ میں اپنے آپ میں نہ رہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسافتا یہ روش کم خرام ہے شائد
کثر اک آنچ کی پیہم مدام ہے شائد
قوام ریشہ اسباب خام ہے شائد
یہ کائنات ابھی ناتمام ہے شائد
کہ آرہی ہے دمادم صدائے کن فیکوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یار ڈاکٹر صاحب مجھے کہنے دیجے کہ نصیر بھائی نے اقبال کے مندرجہ بالا اشعار کی تضمین کر کے محض اپنے تخلیقی ذوق کی آبیاری نہیں کہ بلکہ اس کلام میں موجود اقبال کے فلسفہ فکر کی ایک طرح سے خوبصورت تشریح بھی کی ہے۔۔۔اساتذہ کی زمینوں میں
استاتذہ ہی کے رنگ کے مصرعے مسلسل مشق سخن سےلکھے جا سکتے ہیں مگر ایسی زمینوں میں جہاں مزید آبیاری کی گنجائش نہ ہو وہاں اپنے نام کا پودا لگانا غیر معمولی وصف ہے۔۔
ذرا ملاحطہ فرمائیے
انیس کی زمین میں یہ شعر
یم فرات رواں ہے میان دیدہ و دل
نہ دامنوں کو خبر ہے نہ آستینوں کو
جو آب ہے مرے مشکیزہ سخن میں نصیر
نظر ملے تو نظر آئے سطح بینوں کو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عجیب حال تھا آل نبی کا بعد حسین
کہ خون بہا نہ لیا اشک خوں بہا کے چلے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آرزو لکنوی کی زمین میں سلام کا یہ شعر دیکھیے
بندش آب چٹانوں کا جگر کاٹ گئی
انتہا یہ ہے نشیبوں میں نہ ٹہرا پانی
یوں رواں ہوتا نہ دریائے کرم شہ کا تو لوگ
جھانکتے پھرتے کنویں اور نہ ملتا پانی
دجلہ وقت ہی ساکن ہو تو کیا کہیے نصیر
ماہی طبع کو درکار ہے بہتا پانی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اور اب ذرا غالب کی زمیں۔۔ہائے ہائے کیا کہنے نصیر بھائی
حال اس دشت کے پیاسوں کا بیاں کیا ہو جہاں
سر پہ بس دھوپ رہی سائے بھی سائے نہ بنے
کربلا سے ہوئی زندہ یہ رہ و رسم وفا
ہوئے اک بار جو اپنے وہ پرائے نہ بنے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سچ ہے ولی دکنی نے ٹھیک کہا تھا
راہ مضمون تازہ بند نہیں
تا قیامت کھلا ہے بب سخن
ڈاکٹر صاحب یار ملاقات ہو تو دل کے پھپھولے پھوڑے جائیں۔۔۔ فی الحال مبارک باد قبول کیجے کہ کم سے کم آپ نے زندگی میں ایک اور نیک کام سر انجام دے دیا اور اب آپ فرشتہ صفتی کی طرف مائل پرواز ہیں اللہ جزا دے گا اور نصیر بھائی کو مبارک باد دی جائے گی کسی ایسے وقت جب بھوک زوروں پر ہوگی اور وہ سیخ کباب کھلانے کا اہتمام کریں گے، باقی انتظام و اہتمام میرے ذمے،،،،، اب وہ کلام بھی سن لیجے جس نے سر گھما کر رکھ دیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ ہے مجلس شہہ عاشقاں کوئی نقد جاں ہو تو لے کے آ
یہاں چشم تر کا رواج ہے، دل خوں چکاں ہو تو لے کے آ
یہ فضا ہے عنبر و عود کی یہ محل ہے ورد درود کا
یہ نماز عشق کا وقت ہے کوئی خوش ادا ہو تو لے کے آ
یہ جو اک عزا کا شعار ہےیہ عجب دعا کا حصار ہے
کسی نا رسا کو تلاش کر کوئی بے اماں ہو تو لے کے آ
یہ حضور و غیب کے سلسلے یہ مدار عشق کے مرحلے
غم رائگاں کی بساط کیا غم جاوداں ہو تو لے کے آ
یہ علم ہےحق کی سبیل کایہ نشاں ہے اہل دلیل کا
کہیں اور ایسے قبیل کا کوئی سائباں ہو تو لے کے آ
سر لوح آب لکھا ہوا کسی تشنہ مشک کا ماجرا
سر فرد ریگ لکھی ہوئی کوئی داستاں ہو تو لے کے آ
ترے نقشہ ہائے خیال میں حد نینوا کی نظیر کا
کوئی اور خطہ آب و گل تہ آسماں ہو تو لے کے آ
کبھی کنج حر کے قریب جا کبھی تا بہ صحن حبیب جا
کبھی سوئے بیت شبیب جا زر ارمغاں ہو تو لے کے آ
مرے مد و جزر کی خٰیر ہو کہ سفر ہے دجلہ دہر کا
کہیں مثل نام حسین بھی کوئی بادباں ہو تو لے کے آ
میں وہ حال ہوں کہ بحال ہوںمرے فرق فر پہ کلاہ رکھ
میں صراط حر کا ہوں راہ روکوئی ہفت خواں ہو تو لے کے آ
نہ انیس ہوں نہ دبیر ہوں میں نصیر صرف نصیر ہوں
مرے ظرف حرف کو جانچنے کوئی نکتہ داں ہو تو لے کے آ
