قاتلوں کی اس بستی میں ہم ڈھوندھ رہے ہیں کوئی انساں
کیسی عید کہاں کی عید
ہم تو اپنے بچوں کو دفنا کر آئے ہیں
جاگنے والی آنکھوں کو سُلوا کر ائے ہیں
باپ نے بیٹا،بیٹے نے ایک باپ لحد میں اتارا ہے
بھائی نے بھائی کی میت قبر کی گود میں رکھی ہے
عید کی خوشیاں منانے والو
یہ بھی سوچو
ہم بھی پاکستان کے رہنے والے ہیں
زندہ باد ہاں زندہ باد برسوں سے کہنے والے ہیں
اس پاک وطن کی بنیادوں میں اپنا خون بھی شامل ہے
ہم بھی اس مٹی کو چومنے والے ہیں
لیکن اب جو قبرستانوں میں ہم
اپنے چاند ستاروں کو دفنا کر آئے ہیں
تو یہ سوچ رہے ہیں
کیا اس مُلک کے حاکموں کو یہ خبر نہیں ہے
ہم جو پارہ چنار میں رپنے والے ہیں
ہم پر روز قیامت ٹوٹتی رہتی ہے
اب تو قبرستانوں میں دفنانے کی جا ملتی نہیں
یاسیت کے مارے بچے گُم سُم ہیں
بہنوں نے بھائیوں کے جنازے
آنکھوں میں سجا کر رکھے ہیں
لیکن یہ سب اندھے گونگے بہرے حاکم بے حس ہیں
انکی لُغت میں ہم سب رینگتے کیڑے ہیں
انکے پاس اک لفظ نہیں تعزیت کا
انکے گھر سے کوئی جنازہ نکلے کڑیل بیٹے کا
پھر انکو محسوس ہو شاید
باپ کا اپنے بیٹے کی میت کو لحد میں رکھ کے آنا کیا ہوتا ہے
بے حس حاکمو دیکھو ہمارے
ہاتھوں پر ہے خون کی مہندی
آنکھوں میں اشکوں کا چراغاں
قاتلوں کی اس بستی میں ہم ڈھوندھ رہے ہیں کوئی انساں
