وزیر اعظم خاقان عباسی نے منگل کے روز نیو یارک میں امریکہ کے نائب صدر مائیک پینس سے ملاقات کی۔ پاکستانی اہل کاروں کے مطابق، اس موقع پر دوطرفہ، علاقائی اور بین الاقوامی امور پر گفتگو ہوئی۔
اس موقع پر مائیک پینس نے کہا کہ ’’امریکہ پاکستان کے ساتھ تعلقات کو اہمیت دیتا ہے اور دونوں ملکوں کے درمیان بہترین تعلقات کی نئی راہیں تلاش کی جارہی ہیں‘‘۔
امریکی نائب صدر نے کہا کہ ’’امن اور سلامتی کے شعبوں میں امریکہ پاکستان کے ساتھ دیرپہ اور طویل المدت شراکت داری کا متمنی ہے‘‘۔
پاکستانی اہل کاروں کے مطابق، دہشت گردی کے خلاف جاری جنگ میں تعاون کا ذکر کرتے ہوئے، مائیک پینس نے کہا کہ ’’امریکہ پاکستان کے ساتھ مل کر کام کرنا چاہتا ہے‘‘۔
وزیر اعظم خاقان عباسی نے دہشت گردی اور شدت پسندی کے خلاف پاکستان کی جانب سے جاری کارروائی، ’رد الفساد‘ کا ذکر کرتے ہوئے، پاکستانی فوج اور عوام کی جانب سے دی جانے والی قربانیوں کی نشاندہی کی۔
اُنھوں نے کہا کہ ’’پاکستان افغانستان کے امن، استحکام اور سلامتی کا خاہاں ہے، اور اس عزم پر قائم ہے کہ شدت پسندی کے خلاف جنگ مل کر جیتی جا سکتی ہے‘‘۔
خاقان عباسی نے کہا کہ ’’دہشت گردی کے خلاف جنگ میں پاکستان بین الاقوامی اتحاد کا حصہ ہے‘‘۔
ملاقات کے دوران، جنوبی ایشیا کی معاون وزیر خارجہ، ایلس ویلز بھی موجود تھیں۔
اِس سے قبل، وزیر اعظم خاقان عباسی نے ترکی کے صدر رجب طیب اردوان، ایران کے صدر حسن روحانی، اردن کے شاہ حسین دوئم اور سری لنکا کے صدر متھری پالہ سری سینا سے ملاقات کی۔
