قانون کے نفاذ سے وابستہ حکام نے بتایا ہے کہ امریکی تاریخ کی شوٹنگ کے سب سے المناک واقعے کے ارتکاب سے کچھ ہی ماہ اور چند دِن قبل، اسٹیفن پیڈک نے لاس ویگاس کے علاوہ شکاگو کے بھی چکر لگائے تھے، جہاں اُس نے اُن مقامات کے قریب واقع ہوٹلوں میں کمرے بُک کرائے جن سے اُن شہروں میں منعقد ہونے والی موسیقی کی محفلوں کے مقامات با آسانی سے نظر آتے تھے۔
ذرائع ابلاغ نے قانون کا نفاذ کرنے والے اہل کاروں کے حوالے سے اطلاع دی ہے کہ پیڈک نے ’لولا پلوزا فیسٹول‘ کے دوران شکاگو کے ایک ہوٹل میں دو کمرے بُک کرائے تھے، جس میں شرکت کے لیے اگست کے مہینے میں ہر سال موسیقی کے لاکھوں شائقین آتے ہیں۔ تاہم، پیڈک اُس کمرے میں نہیں ٹھہرا۔
سب سے پہلے یہ رپورٹ ’ٹی ایم زیڈ‘ چینل نے دی، جس نے بتایا ہےکہ یہ بات نہیں معلوم آیا اُس اختتام ہفتہ کے دِنوں میں وہ شکاگو ہی میں تھا۔
اِسی طرح، پچھلے اتوار کو ’کنٹری میوزک فیسٹول‘ پر کیے گئے حملے سے پہلے، پیڈک نے ’لائف از بیوٹی فل‘ کے متبادل موسیقی کے میلے کے دوران، لاس ویگاس کی ایک عمارت کے اوپر والے طبقے کے دو کمروں میں بھی پیشگی بکنگ کرائی تھی۔ یہ بات کلارک کاؤنٹی کے پولیس سربراہ، جوزف لمبارڈو نے بتائی ہے۔
