ترک میڈیا کے مطابق ایرانی خبر رساں ادارے سےگفتگو کرتے ہوئے ایرانی پارلیمنٹ کی قومی سلامتی اور خارجہ پالیسی کمیٹی کے رکن فدا حسین مالکی نے ایران پر ممکنہ امریکی جوہری حملے سے متعلق میڈیا رپورٹ پر ردعمل دیتے ہوئےکہا کہ اگر امریکا نے ایران کے خلاف جوہری ہتھیار استعمال کیا تو ایران بھی اسی نوعیت کا جواب دےگا۔
ان کا یہ بیان ایک میڈیا رپورٹ کے حوالے سے سامنے آیا جس میں امریکا کی جانب سے ممکنہ جوہری حملےکا ذکر کیا گیا تھا۔
جب ان سے پوچھا گیا کہ وہ ایران پر امریکی جوہری حملے کے امکان کو کس حد تک سنجیدہ سمجھتے ہیں تو انہوں نے کہا کہ ٹرمپ کی جانب سے کوئی غیر دانشمندانہ اقدام خارج از امکان نہیں، لیکن انہیں نہیں لگتا کہ وہ ایسا کرنے کی جرات کریں گےکیونکہ اس طرح کا اقدام دنیا کو ایک خطرناک جنگ میں دھکیل سکتا ہے۔ اگر ایسا کوئی اقدام کیا گیا تو ایران بھی جواب دے گا اور اس کا ردعمل ایران کے خلاف استعمال کیے جانے والے ہتھیار کی نوعیت کے مطابق ہوگا۔
جب ان سے ہتھیار کی نوعیت سے متعلق وضاحت طلب کی گئی تو انہوں نےکہا کہ امریکا جو بھی استعمال کرے گا ایران اس کا جواب دے گا۔ تاہم انہوں نے واضح طور پر یہ نہیں کہا کہ ایران کے پاس جوہری ہتھیار موجود ہیں۔
فدا حسین مالکی کا مزید کہنا تھا کہ جب تک امریکا اپنے سابقہ وعدوں پر عمل نہیں کرتا، ایران مذاکرات کی میز پر واپس نہیں آئے گا، بصورت دیگر آبنائے ہرمز سمیت کئی معاملات حل طلب رہیں گے۔
