ڈاکٹر ظ انصاری کے فرزندِ اکبرخورشید حیدر کا انتقال
ممبئی۔( ندیم صدیقی)مشہور ادیب و ناقد ا ور روزنامہ انقلاب کے سابق ایڈیٹر ڈاکٹر ظؔ انصاری کے فرزند ِ اکبر، مجروح سلطان پوری کے داماد(78سالہ) خورشید حیدر ر16 مارچ کی شام طویل علالت کے بعد اپنی رہائش(نیرول) میں اِنتقال کر گئے۔
ظ صاحب کے تیسرے بیٹے علی انور نے یہ خبر دیتے ہوئے بتایا کہ ہم سب نے گزشتہ10 مارچ کو اُن کی 78 ویں سالگرہ منائی تھی مگر افسوس کہ ہفتے بھر کے اندر ہی وہ دُنیا سے رخصت ہوگئے۔ انا للہ وانا الیہ راجعون
خورشید حیدر نے1969 ع میں روس سے گریجویشن کیا اور پھر وہیں سےمیکنِکل انجینرئینگ میں ماسٹر کیا تھا، وہ گولڈ میڈلسٹ تھے، گزشتہ ایک مدت سے خورشید حیدر سرطان جیسے مرض کے شکار تھے جو بالآخر جان لیوا ثابت ہوا۔ پیر17 مارچ کی صبح 9 بجے اُن کے جسدِ خاکی کو نیرول(نوی ممبئی) کے سُنّی قبرستان میں سپردِ لحد کیا گیا، اس موقع پر ظ صاحب کے خانوادے کے افراد نیز مجروح صاحب کے اہل خانہ اوراحباب موجود تھے،پسماندگان میں بیوہ کے ساتھ ایک بیٹا ہے۔
علی انور نے جملہ مسلمین سے اپنے بھائی کے حق میں دُعائے مغفرت کی درخواست کی ہے۔
