دردِحرم
یہ عجیب سے تیرے شہر ھیں
کبھی مہرباں کبھی قہر ھیں
وھی روز و شب کا حساب ھے
وھی جاں کنی کا عذاب ھے
ھیں غروب دن کی اداسیاں
شبِ تابدار کی مستیاں
کسی بالکونی سے جلوہ گر
کوئی ماورائی سا کوزہ گر
کوئی گیت دردِحرم سرا
کسی محل میں کوئی اپسرا
کہیں آئینوں کے ھزار غم
کہیں چاپ اسکی ھے دم قدم
تیرے بت کدے ھیں کہاں کہاں
میرے چارہ گر میرے مہرباں
بڑی حسرتیں میرے چار سو
کوئی ہو بہو وھی تو ھی تو
رگِ جاں سے کچھ ھے جڑا ھوا
وھی بے نیازی کاسلسلہ
یہ جو سبز نیلی ھے روشنی
کبھی دیدنی بھی نادیدنی
ھے عجیب شامِ سپردگی
کسی کام آئی نہ بندگی
کوئی آٹھواں کہیں در کھلے
کوئی تارِ جاں بھی کہیں ملے
یہ جو کشف ھے دل ِزار کا
میری نیند کا یا خمار کا
تہہِ خاک ھے جو چھپا ھوا
وہ فلک کی مٹی کا بت کدہ
,,,,,,,,,,,,,,
دلبرا ! رقص کر
رقص کر ‘ میرے دل کی زمیں پر
نگاہوں پہ اپنا بدن عکس کر
رقص کر
میری آشاؤں کو چُن کے گھنگھرو بنا
میری ساری اناؤں کو پازیب کر
فرشِ دل ‘ جس کو ہم جانتے تھے کبھی عرشِ دل
اپنے پنجوں سے روند
ایڑیوں سے دَبا
دھول اِتنی اڑا ۔۔۔۔
مجھ کو تیرے سوا
کچھ دِکھائی نہ دے ‘ کچھ سُجھائی نہ دے
مجھ کو محبوب کر’ مجھ کو مصلوب کر
میری میں مار دے ‘ مجھ کو مجذوب کر
مجھ کو بے نقص کر
دلبرا ! رقص کر
……………………
مجھے کچھ نہیں سننا پپا۔۔۔
(لکھنو کی ایک بیٹی عائشہ کے لئے)
دریا کی لہروں میں اپنے درد بھگونے نکلی ھوں
جانے کتنے رتجگوں کے بعد میں سونے نکلی ھوں
اب کسی سے کچھ نہیں کہنا
جیون کی میلی چادر پہ اور نہیں کچھ بننا
پپا۔۔ مجھے اب کچھ نہیں سننا
میں ناری ھوں
جانے مجھ کو کون سی نار میں جلنا ھے
کس کی اور نکلنا ھے
کس کے سنگ سنگ چلنا ھے
پپا اب میں تھک سی گئی ھوں
دریا کی موجوں میں مجھ کو بہنے دو
دریا مجھ کو اپنے ساتھ بہا ئے گا
دور تلک لے جائے گا
اپنے ساتھ میں کیا لے جاتی
صدیوں سے خالی دامن ھوں
ھاں لیکن میں تم سب کو کچھ دے کر جانا چاھتی ھوں
پیار کرو تو اس کو زر کے دھاگے سے نہ باندھو
چِتا جلاؤ حرص و ہوس کی
یا دفناؤ گہری قبر میں
تاکہ آنےوالے سمے میں
کوئی بھی عائشہ
آشاؤں کے منڈپ میں جل نہ جائے
پپا مجھ کو اور نہیں کچھ کہنا
۔۔۔۔۔۔
مظہر شہزاد خان
