پاکستان کی وزارت خارجہ نے جاری ہونے والے ایک بیان میں کہا ہے کہ پاکستان کا ایک اعلیٰ سطحی وفد 14 مارچ کو نئی دہلی جا رہا ہے جہاں وہ نئی دہلی میں کرتار پور راہداری سے متعلق میں مذاکرات میں شرکت کرے گا۔
بعد ازاں ایک بھارتی وفد اسلام آباد کا دورہ کرے گا۔
ماہرین اس پیش رفت کو تعلقات میں بہتری کے ایک اشارے کے طور پر دیکھ رہے ہیں۔
بھارتی کنڑول کے کشمیر میں 14 فروری کو پلوامہ کے مقام پر ایک خودکش حملے میں بھارتی فورسز کے 49 اہل کاورں کی ہلاکت کے بعد تعلقات انتہائی کشیدہ ہو گئے تھے کیونکہ اس کی ذمہ داری ایک کالعدم گروپ جیش محمد نے قبول کرنے کا دعویٰ کیا گھا۔ بھارت یہ الزام لگاتا ہے کہ اس گروپ کی قیادت اور تربیتی کیمپ پاکستان میں ہیں اور وہاں کے خفیہ ادارے اس گروپ کی سرپرستی کرتے ہیں۔
کرتار پور پاکستان کی سرحد کے اندر سکھ کمیونٹی کا ایک مقدس مقام ہے،، وزیر اعظم عمران خان نے خیر سگالی کے اظہار کے طور پر کرتار پور میں سکھوں کو ویزہ فری انٹری دینے کا اعلان کرتے ہوئے سرحد تک راہداری بنانے کا اعلان کیا تھا۔
کرتار راہداری کا باضابطہ آغاز اگلے سال ہو گا۔ یہ مقام پنجاب کے دارالحکومت لاہور سے 120 کلومیٹر شمال میں واقع ہے۔
