آدمیوں کے بنائے جہان میں،اسماءاعظم

اسماءاعظم برطانیہ کے شہر مانچسٹر میں مقیم اہل دانش و اہل قلم میں سے ایک ہیں جو سوشل ایکٹویسٹ اور بلاگر’ بھی ہیں، عالمی اخبار کے قلم قبیلے میں انکی شمولیت ہمارے لیئے باعث عزت ہے۔ وہ جلد ہی اخبار میں تسلسل سے کالم نگاری بھی شروع کریں گی۔عالمی اخبار کا ادارتی بورڈ انکو خوش آمدید کہتا ہے

صٓفدر ھمٰدانی

مدیر اعلیٰ۔ عالمی اخبار

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آدمیوں کے بنائے جہان میں،اسماءاعظم

میری نسبت اس بدقسمت قبیل سےہے

جس کو گٹھی میں صبر پلایا جاتا ہے

اور زندگی بھر آنسو پینے کا ہنر سکھایا جاتا ہے

جس کی اپنی آواز سے کوئی آشنائی نہیں
اپنی ذات تک سے شناسائی نہیں

پنکھ کھولےتو پہچان پہ سوال اُٹھیں

چلے تو اسکی اُٹھان سوال بن جائے
قلم اُٹھائے تو اس کے الفاظ

اس کے کردار کی سیاہی بنا کر

چہرے پہ تھوپ دیے جاتے ہیں

وہ بولے تو سارا شہر جیسے

یکدم سماعت سے محروم ہو جاتا ہے

اس کا وجود ہی منظر سے معدوم ہو جاتا ہے

اس کے پاس ہمیشہ دو رستے رہے ہیں

صبر کا گھونٹ
یا
موت کی آغوش

اس کو بے لباس کر کے بے آبرو کرنے والے
معتبر ہاتھ
اسکی تقدیر لکھتے ہیں
اسکی آنکھوں کے خواب نوچ کر

اپنی مرضی کی تعبیر لکھتے ہیں

بنت فلاں، زوجہ فلاں کے پردے میں

اس کی اپنی کوئی پہچان نہیں رہتی
آدمیوں کے بنائے جہان میں

سچ تو یہ کہ وہ انسان نہیں رہتی
(اسماءاعظم)