عجیب بات ہے کہ انسان اپنی حقیقت کو بھول جاتا ہے۔ شمس جیلانی

0
1093

عجیب بات ہے کہ انسان اپنی حقیقت کو بھول جاتا ہے۔ شمس جیلانی یہاں میں دو ایسی قرآن کی آیات پیش کرنے جارہا ہوں جن میں سے ایک آیت نمبر 68 سورہ یٰسین کی ہے جوکہ مختصر ہے اس میں صرف اتنا بتایا ہے کہ ہم انسان پیدا کرتے ہیں تو وہ نحیف ہوتا ہے پھر ہم اسے طاقتور بنا کردوبارہ نحیف کردیتے ہیں تو کیا کوئی روکتا یا روک سکتا ہے تو جب ہمیں پہلی دفعہ انسان کو بنانے سے کوئی نہیں روک سکا جبکہ اس کا وجود ہی نہیں تھا پھر ہمارے لئے دوسری مرتبہ بنا نا کیا مشکل یہ تو اس سے کہیں آسان ہے۔ اور دوسری سورہ روم کی آیت نمبر54 ہے۔ جس میں اللہ سبحانہ تعالیٰ نے تفصیلاً ارشاد فرمایا ہے جس کی تفسیر بیان کرتے ہوئے علامہ ابن ِکثیر ؒ نے کافی چیزوں اور مرحلوں کا احاطہ کیا ہے کہ انسان کی ترقی اور تنزل پر نظر ڈالو تو اس کی اصل تو اس مٹی سے ہے پھر نطفہ سے ہے پھر خون بستہ سے پھر گوشت کے لوتھڑے سے پھر اسے ہڈیاں پہنائی جاتی ہیں پھر ان پر گوشت اور کھال پہنائی جاتی ہے پھر روح پھونکی جاتی ہے پھر ماں کے پیٹ سے ضعیف اور نحیف نکلتا ہے پھر تھوڑا تھوڑا بڑھتا جاتا ہے اور مضبوط ہوتا جاتا ہے پھر بچپن کی بہاریں دیکھتا ہے پھر جوانی کے قریب پہنچتا ہے پھر جوان ہوتا ہے آخر نشو نما موقوف ہوجاتی ہے پھر اب قویٰ مضمحل ہونے لگتےہیں طاقتیں گھٹنے لگتی ہیں پھر ادھیڑعمر کو پہنچتا ہے پھر بڈھا ہوتا ہے پھر بڈھا پھوس ہوتا ہے طاقت کے بعد یہ کمزوری بھی قابل ِ عبرت ہوتی ہے کہ ہمت پست ہے چلنا پھرنا اچکنا پکڑنا سننا دیکھنا غرضیکہ ہر طاقت سست ہوجاتی ہے رفتہ رفتہ بالکل جواب دے جاتی ہے اور ساری صفتیں متغیر ہوجاتی ہیں۔ بدن پر جھریاں پڑجاتی ہیں رخصار پچک جاتے ہیں دانت ٹوٹ جاتے ہیں بال سفید ہوجاتے ہیں یہ ہے قوت کی بعد کی ضعیفی اور بڑھاپا ۔ اس کے بعد کچھ اضافت اس خادم نے بھی کی ہے کہ جن لوگوں پروہ چند یوم پہلے تک حکمرانی کر رہا ہوتا ہے اب وہی لوگ اس کے اوپر حکمراں ہوجاتے بعض اوقات صورتِ حال یہاں تک پہنچتی ہے کہ وہ اب اپنے آپ کروٹ بھی نہیں بدل سکتا جب تک کہ کوئی اس کو کروٹ نہ بدلوائے۔ کبھی جس کی دانشمندانہ باتوں کی وجہ اسے دانشوروں میں دنیا شامل کیا کرتی تھی اب اسی کی بچکانہ اور احمقانہ باتوں پر ہنستی نظر آتی ہے؟ کیا تم نے کسی کا یہ دور نہیں دیکھا کہ اللہ سبحانہ تعالیٰ جو چاہتا ہے وہ کرتا ہے؟ بنانا اور بگاڑنا اس کی قدرت کے ادنیٰ کرشمے ہیں۔ ساری مخلوق اس کی غلام ہے وہ سب کا مالک ہے نہ اس جیسا کسی کا علم ہے نہ کسی کی قدرت ہے۔ اس طویل آیت میں اللہ سبحانہ تعالیٰ نے تمام دنیا کو چیلینج کیا ہے کہ وہ ایک چھوٹے سے جر ثومے سے انسان کو پیدا کرتا ہے اس کو شکل و صورت دیتا ہے جوکہ ہر ایک کی دوسرے سے مختلف ہوتی ہے حتیٰ کے ایک کی آنکھ دوسرے کی آنکھوں سے نہیں ملتی انگلی کے پورے دوسروں سے نہیں ملتے؟اسے وہ جہاں مختلف ہیئتووں میں رکھتا ہے اس کو و ہی رزق بھی پہنچانے کا سامان ہمیشہ کے لیئے کر دیتا ہے جب انسان اس دنیا میں آتا ہے تو بے جان لوتھڑا ہوتا ہے، پھر آہستہ آہستہ وہ ایک طاقتور جوان بنا دیتا ہے پھر وہ لمبے لمبے منصوبے بنا نے لگتا ہے اور ایک دوسری جگہ فرمایا ہے کہ“ پھر وہ مجھ ہی سے اکڑنے لگتا ہے“جبکہ اسے یہ تک معلوم نہیں کہ وہ اگلی سانس بھی لے سکے گا یا نہیں اور سمجھتا ہے کہ میں ہمیشہ کے لئے یہاں آیا ہوں اور ہمیشہ یہاں رہونگا۔ بعض اوقات وہ اپنی اوقات بھول کر خدا ئی کی دعوے کرنے لگتا ہے جیسے کہ فرعون حالانکہ روزانہ وہ لو گو ں کو مرتے ہوئے اورقبر میں دفن ہوتا ہوا دیکھتا ہے پھر بھی اسے یقین نہیں آتا کہ اس کا کوئی پیدا کرنے والا بھی ہے اور اس کو ایک معینہ مدت کے لیئے یہاں بھیجا گیا ہے تا کہ اس کے اعمالوں کے مطابق اسےجنت یا جہنم کا مستحق قرار دیا جاسکے؟ یہاں چوروں سے بچنے کے لئے ، طوفانوں سے بچنے کے لئے ایک مضبوط اور عالیشان محل بنا تا ہے۔ جہاں کے وہاں کے ٹائم کے فرق کی وجہ سے وہ اسے بروز حشر ایسا لگے کا جب قبر سے اٹھا کر اللہ سبحانہ تعالیٰ کے روبرو پیش کیا جا ئے گا کہ وہ ایک لمحہ یا اس سے بھی کچھ کم سویا ہے۔ جبکہ وہاں مکان بنا نا یہاں سے کہیں آسان ہےجہاں ہمیشہ رہنا ہے۔ جہاں کھانے کمانے کا کوئی مسئلہ نہیں حتیٰ کہ ہر قسم کی عبادت بھی معاف ہے اور وہ صرف عمل صالح کے عیوض ہر وقت قسم قسم کے محلات الاٹ کر رہا ہے؟ اس کے باوجود وہ ان اینٹوں اور پتھروں کے مکانوں کو ترجیح دیتا ہے جن کا پتہ نہیں کب آگ لگ جا ئے جل جائیں، کب زلزلہ آئے گرجائیں اور کب زور کی بارش ہو اور ٹپکنے لگیں، اس نے جو چھت ارمان سےبنائی تھی جس کی مظبوطی پراس کو ناز تھا وہ رہائش کے قابل نہ رہے اور انسان ہر لمحہ خائف رہے کہ اب سر پر گری اور تب سر پر گری؟ اس عقلمند سےپوچھئے کہ اس دنیا کے لیئے محنت کرنا بہتر ہے یا اس دنیا کے لیئے محنت کرنا جس کی ایک منٹ کی گارنٹی نہیں ہے۔ جواب آپ پر چھوڑتا ہوں؟ یہاں حضرت علی کرم وجہ کا ایک مکالمہ کسی کے ساتھ پیش کرکے بات ختم کرتا ہوں کہ کسی نے ان سے سوال کیا کہ اگر یہ سب کچھ وہاں نہ ہو اتو؟ انہوں نے جواب میں فرمایا کہ اگر ہوا تو؟

SHARE

LEAVE A REPLY