جسم ِ محمد ﷺ جس سے بنا ، ہے خاک ِ پاک مدینے کی
نعت نگار: سیدعارف معین بلے
نور ِ نبی ﷺکو میرے ربّ نے دی پوشاک مدینے کی
جسم ِ محمد ﷺ جس سے بنا ، ہے خاک ِ پاک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جس کے اِک اِک ذرّے نےبھی چوما آپ کے قدموں کو
سبحان اللہ سبحان اللہ ، ہے وُہ خاک ، مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بے شک ہے دہلیز ِ ِ محمد بھی جنّت کا اِک ٹکڑا
ہمسری کیسے کرسکتے ہیں ہفت افلاک مدینے کی ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اللہ اللہ ، آپ ﷺ کے قدموں کی برکات کے کیا کہنے
اللہ اللہ ، نِری شفا ہے ساری خاک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جُھنڈ کھجوروں کے پیڑوں کے ، آپ کے سانسوں کی خوشبو
دونوں جہانوں سےہے بڑھ کر ، یہ اِملاک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کے در پر آکر سب رو رو کے دعائیں کرتے ہیں
اِسی لئے تو ساری فضائیں ہیں نمناک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اُن کا کرم ہے بیٹھے بٹھائے مجھ کو تبرکات ملے
آب ِ زمزم ، عجوہ کھجوریں ، اِک مسواک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مکّہ سے بھی دُگنی برکتیں مانگیں نبی ء رحمت ﷺ نے
قدر جو دل سے کرتے تھے شاہ ِ ﷺ لولاک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کے لمس کی خوشبو ہو یا آپ کے ہوں کچھ نقش ِ قدم
مِل سکتی ہے دولت ، کرکے دھرتی چاک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اللہ ُ اکبر ۔۔ شاہ ِ مدینہ ﷺ کی قوت کے کیا کہنے
ایک مہینے تک کی مسافت تک ہے دھاک مدینے کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہیں اگر مرمٹ جاؤں ، وہ میری شفاعت کردیں گے
میرے مقدّر میں بھی لکھ دے مولا خاک مدینے کی
جسم ِ محمد ﷺ جس سے بنا ، ہے خاک ِ پاک مدینے کی
نعت نگار: سیدعارف معین بلے
