ادارہ عالمی اخبار اس عنایت کے لیئے سیدہ کوثر کا ممنون ہے
مدیر اعلیٰ، صفدر ھمدانی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آلِ احمد کا زین کہتے ہیں
جس کو ہم تم حسین کہتے ہیں
کیوں تڑپتی ہو کربلا کی زمین
مجھ کو زہرا کا چین کہتے ہیں
عرش پر ہیں یہ شبر و شبیر
خلد میں سیدین کہتے ہیں
شاہ کرب و بلا کے بابا کو
شاہِ بدر و حنین کہتے ہیں
تیرے دشمن بھی تیرے اکبر کو
یوسفِ یوسفین کہتے ہیں
دس محرم کے استغاثہ کو
لوگ غربت کے بین کہتے ہیں
تم محمد کی میم ہو کوثر
ہم علی کی بھی عین کہتے ہیں
سیدہ کوثر / لندن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ادب کی بار گاہ میں قلندری علی علی
یہ زندگی علی علی ، پرندگی علی علی
دماغ عکسِ کربلا مجھے یہ دل نجف لگے
نگر نگر گلی گلی علی علی علی علی
صداۓ کن کا معجزہ ارم , عدن کی راحتیں
قدم قدم چمن چمن کلی کلی علی علی
زمینِ کربلا پہ ابنِ فاطمہ نے لکھ دیا
بشر ,بشر,خدا ,خدا, نبی نبی, علی ,علی
وہ ہجرتیں وہ الجھنیں وہ جنگ وہ مقامِ امن
جگہ جگہ ضرورتیں گلی گلی علی علی
وجاہتیں شجاعتیں کرامتیں اسی سے ہیں
سو دم بہ دم قدم قدم ولی ولی علی علی
اسی کا در سدا کھلا اسی کا گھر بہت بڑا
وظاٸفِ ہمیشگی سخی سخی علی علی
جہاں پکار جس جگہ سمجھ وہیں پہنچ گیا
درونِ غم بس اک صداۓ حیدری علی علی
وہ مکہ آمدِ حرم وہ کوفہ ضربِ تیغِ سم
کوٸ کبھی نہ کر سکا یہ بندگی علی علی
دلاوری کا سید الملاٸکہ سے پوچھیے
ہے اب بھی منقسم زمینِ خیبری علی علی
مرا بھی شجرہ مل رہا ہے اولیں امام سے
یہ کفوِ فاطمی ہے جدِ کوثری علی علی
سیدہ کوثر/ لندن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میرے اجداد کا رستہ ہے مدینے والا
اس لیے بھی میرا لہجہ ہے مدینے والا
آج تک رحم کی امید کہیں سے نہیں ہے
امتی امتی کہتا ہے مدینے والا
کہتا ہے پھرتا ہے سرِ دشت ثنا خوانِ نبی
میں ہوں بندہ میرا آقا ہے مدینے والا
میرِ محفل نے مجھے خانہِ جنت میں کہا
آپ کا شعر بھی اچھا ہے مدینے والا
نور سے نور کی قندیل نکل آتی ہے
اس لیے دیکھنے والا ہے مدینے والا
آج امکان میں اسلام کا آغاز ہوا
آج فاران سے نکلا ہے مدینے والا
دف بجاتے ہوئے پڑھیے گا قصیدے اس کے
خانوادے سے نکلتا ہے مدینے والا
جس کو جو کچھ بھی ملا آپ کے صدقے سے ملا
یعنی مولا کا بھی مولا ہے مدینے والا
ہفت افلاک بھی جاروب کشی کرتے ہیں
سینہِ ہست پہ تمغہ ہے مدینے والا
نینوا ہو گا معلٰی بھی تو بن سکتا ہے
کربلا والے کا نانا ہے مدینے والا
اب مرے ہاتھ بھی آئیں گے خزانے کوثر
اب مرے ہاتھ میں کاسہ ہے مدینے والا
سیدہ کوثر/ لندن
