میری قسمت کہ میں آقا کی جو مدحت لکھوں
اس کا مطلب ہے کہ اپنے لیئے جنت لکھوں
انکو طیب لکھوں عادل لکھوں عالم لکھوں
کم سے کم لکھوں تو یاسین کی صورت لکھوں
انکو عاقب لکھوں ثاقب لکھوں احمد لکھوں
عجز کے ساتھ انہیں شان عبادت لکھوں
انکو کامل لکھوں اکمل لکھوں خاتم لکھوں
ہو اجازت تو میں آقا کو محبت لکھوں
میرے ماں باپ فدا نام محمد پہ مدام
میں کہاں اور کہاں انکی جو سیرت لکھوں
شہر طیبہ کا سفر اب بھی نگاہوں میں مری
لفظ وہ لاؤں کہاں سے جو حقیقت لکھوں
سوچ کر بھی یہ نزاکت میں تڑپ جاتی ہوں
آپ سے کاش کبھی اپنی میں نسبت لکھوں
نزاکت شکیلہ
