سخن کی تاب کہاں اب کہ دل ہے خوں ناصر

لہو لہو ہے زبان ِ قلم بیاں کے لئے
یہ گل چُنے ہیں شہیدوں کی داستاں کے لئے
کھڑے ہیں شاہ کمر بستہ امتحاں کے لئے
پھر ایسی رات کب آئے گی آسماں کے لئے
دیا بُجھا کے یہ کہتے تھے ساتھیوں سے حسینؑ
جو چاہو ڈھونڈ لو رَستا کوئی اماں کے لئے
کہا یہ سُن کے رفیقوں نے یک زباں ہو کر
یہ جاں تو وقف ہے مولائے انس و جاں کے لئے
ہمیں تو منزل ِ آخر ہے آستان ِ حسینؑ
یہ سَر جُھکے گا نہ اب اور آستاں کے لئے
ستارے ڈوب گئے وقت ڈھونڈتا ہے پناہ
کڑی ہے آج کی شب دَور ِ آسماں کے لئے
گواہی باقی ہے اصغر کی لے چلے ہیں حسینؑ
ورق اِک اور بھی ہے زیب ِ داستاں کے لئے
لُٹا ہے دشت ِ غریبی میں کارواں کس کا
کہ خاک اُڑاتی ہے منزل بھی کارواں کے لئے
کہاں کہاں نہ لُٹا کاروان ِ آل ِ نبیؐ
فلک نے ہم سے یہ بدلے کہاں کہاں کے لئے
یہ دشت ِ کرب و بلا ہے جناب ِ خضر یہاں
ہے شرط تشنہ لبی عُمر ِ جاوداں کے لئے
بہے ہیں کس قدر آنسو چُھپے ہیں کتے ہی داغ
یہ جمع و خرچ ہے باقی حساب داں کے لئے
سکوت ِ اہل ِ سخن بھی ہے ایک طرز ِ سخن
یہ نکتہ چھوڑ دیا مَیں نے نکتہ داں کے لئے
سخن کی تاب کہاں اب کہ دل ہے خوں ناصر
زبان ِ تیر چلی ایک بے زباں کے لئے
ناصر کاظمی
( از ” نشاط ِ خواب” ، مشمولہ ” کلیات ِ ناصر” )

بشکریہ، حسن سلطان کاظمی