مجھکو بھی کرو قتل کہ ہوں میں بھی ہزارہ
مقتل میں کھڑا ہوں مجھے رونے سے نہ روکو
میں عاشق شبیر ہوں سینے پہ یہ لکھو
کربل میں ہوں میں آج ذرا ایسے بھی سوچو
زندہ ہے سماعت تو یہ نعرہ میرا سُن لو
گردش میں کہاں تک رہے قسمت کا ستارہ
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔
تُف تجھ پہ ہو اے ملک خدادا کے حاکم
رہتا ہے یزیدوں سے تمسک ترا ہر دم
دیکھے ہیں بہت ہاں ترے ظالم سے مراسم
دائم ہے ہمیشہ بھلا کب جبر کا موسم
اس کھیل میں قسمت ہے تری صرف خسارہ
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔۔۔۔
قاتل کی خبر ہے تمہیں ہم کو ہے یہ معلوم
اب تیری حکومت کو بدل دیں گے یہ مظلوم
ہونا ہے بہت جلد قیادت سے بھی محروم
ذلت تری قسمت میں لکھی یہ ترا مقسوم
ملنا نہیں تجھ کو کسی طوفاں میں کنارہ
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔۔۔۔
ہے جرم ہمارا ہیں غلام آل نبی کے
پڑھتے ہیں قصیدے ہاں محمد کے علی کے
ہم ابن غلام ابن غلام حق کے ولی کے
ہم غازی علمدار کے عباس جری کے
مشکل میں ہر اک بعدِ خدا یہ ہی سہارا
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔۔۔
گردن کا مری کٹنا ہے کب کوئی نئی بات
تمہارے لیئے خون ہمارا بنا سوغات
ہو گی تو کبھی ختم ترے ظلم کی یہ رات
کیا تم نے کبھی دیکھے ہیں بکتے ہوئے سادات
ٹولہ جو ہے حاکم کا یزیدوں کا ہے سارا
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حاکم کی طبیعت میں رعونت نہیں ہوئی
لاشوں کی کسی دین میں قیمت نہیں ہوتی
افسوس کو گر جائیں تو ذلت نہیں ہوئی
ہر چیز کا حل سُن لو کہ طاقت نہیں ہوتی
کچھ کام ذرا عقل سے بھی لے لو خدارا
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بن جائے نہ ہر فرد کہیں ہم میں ہزارہ
پھر اسکے نتیجے میں فقط ہو گا خسارہ
آ جائے نہ زد میں کہیں ہر ایک ادارہ
بن جائے نہ آتش کدہ یہ ایک شرارہ
ہم میں سے ہر اک شخص ہے شبیر کا پیارا
مجھکو بھی کرو قتل کہ ہوں میں بھی ہزارہ
،،،،،،،،،،،،،،،،،
کچھ اور نہ سمجھو ہمیں انسان سمجھ لو
ہمدردی کو تم کاش اب ایمان سمجھ لو
اب بھی ہے بہت وقت اے سلطان، سمجھ لو
اس بار ہمارا بھی یہ اعلان سمجھ لو
اک لمحہ نہیں اب ہمیں تضحیک گوارا
مجھکو بھی کرو قتل کہ ہوں میں بھی ہزارہ
۔۔۔۔۔۔۔۔۔۔۔۔۔۔۔۔۔
اب اور ذرا صبر کا یارا نہیں ہم کو
کس کس بھلا منزل سے گزارا نہیں ہم کو
جُز رب کے کوئی ایک سہارا نہیں ہم کو
اپنا تو سمجھ کر بھی پُکارا نہیں ہم کو
مشکل ہے کہ اب تم پہ یقیں ہوجو دوبارہ
مجھکو بھی کرو قتل کہ ہوں میں بھی ہزارہ
,,,,,,,,,
گونجے گا جہانوں میں یہ نعرہ میرا صفدر
حیدر علی حیدر علی حیدر علی حیدر
اب مل کے کریں بیعتِ عباسِ دلاور
تیار کریں لشکرِ ناموسِ پیمبر
اب نامِ حسین ابن علی کا ہے سہارا
مجھکو بھی کرو قتل کہ ہوں میں بھی ہزارہ
صفدر ھمٰدانی













