کل ہوا یہ کہ میں تاجکستان کی معروف مغنیہ نگارہ خالوا کا ایک فارسی گیت سن رہا تھا۔ اسے سن کر ایسا لگا جیسے یہ آج ہی کے حالات کے مطابق لکھا گیا ہو۔ انتہائی روح کش گیت تھا سو میں اس کی نغمگی اور تاثیر میں بہتا چلا گیا اور کچھ کیفیت ایسی طاری ہوئی کہ فوری طور پر استفادے کی صورت نکل آئی اور میں نے بھی بحر رمل مثمن میں ایک زمین تراش لی اور اس پر دو اشعار کہہ کر پوسٹ کر دیئے، ان اشعار کو پڑھنے کے بعد کچھ دوستوں نے مزکورہ گیت کی طرف اشارہ کیا تا ہم شہاب الدین شہاب جو میرے دوست بھی ہیں شاعر بھی ہیں اور فارسی شاعری سے بھی خوب خوب واقف ہیں،انہوں نے دل کی گہرائی سے استفادے کی تعریف کی۔۔ یہ گیت ان دنوں سوشل میڈیا پر حافظ شیرازی کا نام سے وائرل ہو رہا ہے جبکہ میری تحقیق کے مطابق اس گیت کے خالق افغانستان کے شاعر گلوکار اور موسیقار امیر جان صبوری ہیں اور انہوں نے خودبھی اس گیت کو گایا ہے۔ یہ الگ بات ہے کہ انہوں نے بھی حافظ سے استفادہ کیا ہے۔ اس گیت کوسننٓے کے بعد میں سوچ رہا تھا کہ ہم نے فارسی جیسی خوب صورت زبان سے بہت زیادہ فائدہ نہیں اٹھایا موقع ملے تو وہ گیت بھی سنیئے گا اور میری اس غزل کو بھی پڑھیے گا،شائد میں اپنی بات کہہ سکا۔ بہت شکریہ. (وضاحتی نوٹ :۔ جاوید صبا )
تازہ غزل …………………. جاوید صبا
کوچہ خالی قریہ خالی جادہ خالی ہائے ہائے
چوک خالی موڑ خالی رستہ خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صبح ویراں شام ویراں رات ویراں دم بدم
صحن خالی بام خالی خانہ خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عندلیب گلشن نا آفریدہ رفت رفت
دشت خالی باغ خالی صحراخالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سر بہ زانو خاک برسر زندگانی رو برو
چاک خالی کوزہ خالی دریا خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔
حرف برہم لفظ مبہم صوت مدھم ہیچ ہیچ
سوز خالی ساز خالی نغمہ خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گفتگو آہستہ آہستہ تنفس تیز تیز
جام خالی مینا خالی سینہ خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کارو بار زندگی سے درہمی ہے پیچ پیچ
ملک خالی شہر خالی دنیا خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سر گزشت آدمی اس سے زیادہ کچھ نہیں
ہاتھ خالی جیب خالی کاسہ خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بے صدف ہونے کو ہے کیا آب نیساں کا ہدف
قطرہ خالی دجلہ خالی دریا خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہائے یہ ویرانیاں زعم عبادت بھی گیا
بتکدہ خالی پڑا ہے کعبہ خالی ہائے ہائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ جاوید صبا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
……………………………………………………………..
غزل اور وضاحتی نوٹ :۔ جاوید صبا
انتخاب و پیشکش :۔ظفر معین بلے
