عجب انداز سے یہ گھر گرا ہے
مرا ملبہ ، مرے اوپر گرا ہے
( آنِس معین )
چھیاسٹھ سے پچھتر فیصد کا ریونیو دینے والا روشنیوں کے شہر کراچی میں ناجاٸز تجاوزات کے خاتمے کی فقیدالمثال مہم کے سلسلے میں آج چوالیس سے زاٸد گھرانوں کی رہاٸش گاہ نسلہ ٹاور کو منہدم کرنے کا باضابطہ آغاز کیا جاچکا ہے ۔ آج 24.نومبر 2021 عدالت عظمی کراچی رجسٹری میں کمشنر کراچی کو طلب کرکے ان سے نسلہ ٹاور کے انہدام کی بابت سوالات کیے گٸے اور ان کی ہر ہر بات کو رد کرکے انہیں باور کروایا گیا کہ آپ کو یہاں جیل بھی بھیجا جاسکتا ہے
جو عزت افزاٸی اس 21 یا 22 گریڈ کے اعلی سرکار افسر کی سننے میں آٸی اس پر باوجود کوشش کے یقین نہ آیا بہر قصہ مختصر بعد ازاں افسر موصوف کو کراچی بھر کی مشینری کے ساتھ جاکر فوری طور پر نسلہ ٹاور کے منہدم کرنے کے احکامات کے ساتھ ساتھ منہدم کرنے کے مراحل کی تصاویر اور وڈیوز بھی پیش کرنے کے احکامات صادر فرماٸے گٸے۔
ہم نسلہ ٹاور کے انہدام کے دکھ بھرے آنکھوں دیکھے مناظر کے حوالے سے کچھ نہیں کہہ سکیں گے(کیوں کہ ہماری اس آزاد و خود مختار اسلامی فلاحی جمہوری نظریاتی ریاست مدینہ میں سرچھپانے کو کوٸی جگہ ہے ہی نہیں) ماسواٸے اس کے کہ اگر آج ہمارے گھر کی چھت سے ہمیں بنا کوٸی معاوضہ دیٸے بے دخل کیا جاتا تو اللہ جانے ہم پر یا ہمارے بچوں کیا بیت تی۔ وہاں دل خراش چیخیں بھی سناٸی دی گٸیں اور بے بسی اور بےسروسامانی کے دردناک مناظر بھی دیکھنے کو ملے۔
ایک ضعیف خاتون ہمارے قریب آٸیں ہم احتراما“ پیچھے کو ہٹنے لگے تو خاتون نے ہمارے سر پر ہاتھ پھیرا اور فرمایا نہیں بیٹے پیچھے کیوں ہٹ رہے ہو میں تو سہارا پانے کےلیے تمہارا ہاتھ تھامنے کو آگے بڑھی تھی۔ اماں جی کی آنکھیں رو رو کر بری طرح سوجی ہوٸی تھیں۔ جیسے ہی انہوں ہمارے شانے پر ہاتھ رکھا اور فرمایا بیٹا کتنے ہی محکموں نے اس عمارت کی تعمیر کی منظوری دی ہوگی آج ان میں سے کوٸی ایک بھی مجرم نہیں ٹھہرا ۔ مجرم بھی قرار پاٸے اور سزا بھی ہمیں دی گٸی۔ ہم سے کسی اعلی سے اعلی یا ادنی سے ادنی افسر نے کوٸی بات ہی نہیں کی نہ ہی ہمیں کوٸی معاوضہ دینے کا ہمیں یقین دلایا گیا یہ کہہ کر اماں جی نے مڑ کر اپنی رہاٸش گاہ کو منہدم ہوتے دیکھا تو وہ یہ منظر دیکھ کر بے ہوش ہوگٸیں
عوام الناس کا کہنا تھا کہ کیا ہی اچھا ہوتا نسلہ ٹاور اور اس جیسی دیگر تمام غیر قانونی عمارتوں کی تعمیر میں ملوث (سہولت کاروں) کو بھی کاش کسی عدالت میں طلب کرکے یہ حسنِ سلوک روا رکھا جاتا کہ جو حسن سلوک جناب کراچی کراچی کے ساتھ روا رکھا گیا۔
نسلہ ٹاور کے رہاٸشیوں رہاٸشیوں میں سے ایک جناب محمدعلی گزشتہ کٸی برسوں سے بیرون ملک مقیم تھے اور اب جب اپنے آشیانے میں زندگی گزارنے آٸے تو آشیانہ ہی نہ رہا۔
آشیانے کی بات کرتے ہو
دل جلانے کی بات کرتے ہو
(جاوید احمد قریشی)
آج یوم انہدام نسلہ ٹاور کو ایک عجیب و غریب واقعہ دیکھنے میں آیا اور وہ یہ کہ متعدد بےدخل کیے جانے رہاٸشی بھی وہاں موجود تھے ۔ ایک لڑکی/دوشیزہ کالے رنگ کا اسکاف لگاٸے بھی وہیں موجود تھیں
ان کی آنکھیں بھی رو رو کر سوجی ہوٸی تھیں ۔ وہ پھٹی پھٹی نظروں سے اس عمارت کے انہدام کے دل خراش مناظر کو دیکھنے میں مصروف تھی کہ اتنی دیر میں اوپر سے جو چند ایک سیمنٹ/اینٹوں کے ٹکڑے نیچے گرے تو ان کے ساتھ ایک شاپنگ بیگ بھی گرا اور اس شاپر میں فیض احمد فیض کی کلیات نسخہ ہاٸے وفا کا نسخہ تھا۔ خاتون نے کی جیسے ہی اس پر نظر پڑی تو یکدم اچھل کر کتاب اٹھا لاٸیں ۔ہم دیکھیں گے، ہم دیکھیں گے
لازم ہے کہ ہم بھی دیکھیں گے
وہ دن کہ جس کا وعدہ ہے
جو لوحِ ازل میں لکھا ہے
جب ظلم و ستم کے کوہ گراں
روئی کی طرح اُڑ جائیں گے
ہم محکوموں کے پاؤں تلے
یہ دھرتی دھڑدھڑدھڑکے گی
اور اہلِ حکم کے سر اوپر
جب بجلی کڑ کڑ کڑکے گی
جب ارضِ خدا کے کعبے سے
سب بُت اُٹھوائے جائیں گے
ہم اہلِ سفا مردودِ حرم
مسند پہ بٹھائے جائیں گے
سب تاج اچھالے جائیں گے
سب تخت گرائے جائیں گے
بس نام رہے گا اللہ کا
جو غائب بھی ہے حاضر بھی
جو ناظر بھی ہے منظر بھی
اٹھّے گا انا الحق کا نعرہ
جو میں بھی ہوں اور تم بھی ہو
اور راج کرے گی خلقِ خدا
جو میں بھی ہوں اور تم بھی ہو
لازم ہے کہ ہم بھی دیکھیں گے۔۔
