کراچی سے معروف لکھاری انجم عثمان عالمی اخبار کے قلم کاروں کے قافلے میں شامل ہو رہی ہیں اور عالمی اخبار کا ادارتی عملہ انہیں خوش آمدید کہتا ہے
انہوں نے اپنا تعارف ہمیں اس طرح بھیجا ہے
انجم عثمان
کراچی
والدین کا تعلق لکھنؤ سے تھا
میرے ماموں احمد جمال پاشا برّ ِ صغیر ہندوپاک کے پاۓ کے مزاح نگار اور لکھنؤ سے شایع ہونے والے ادبی رسالے “اودھ پنچ ” کے مدیر تھے
پہلا شعری مجموعہ “العطش ” دو ہزار سترہ میں شایع ہوا
دوسرا شعری مجموعہ ” ناشنیدہ ” دو ہزار بائیس میں طبع ہوا
العطش پر فاطمہ جناح یونیورسٹی سے ایم اے کا مقالہ لکھا گیا
بہت سے ریڈیو اور ٹی وی پروگراموں میں شرکت کی بہت سے ایوارڈز سے نوازہ گیا
ادارہ عالمی اخبار
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
غزل
اِک شوقِ بَلا خیز پسِ حلقۂ جاں ہے
سو شُعلۂ نادِیدہ سا رَگ رَگ میں روَاں ہے
لِپٹی ہو کفِ پائے مُسافِر سے اگر سعی
ہَر راہ نقیبِ خبرِ کوئے بُتاں ہے
اِک خوابِ شِکستہ کے چُنا کرتی ہے ریزے
یہ چشمِ طلب کارگہِ شِیشہ گراں ہے
دانا ئے تماشَائے شَب و روز ہیں بیزار
یہ دہر متاعِ ہوسِ کَم نَظراں ہے
ہَنگامِ جُنوں وُسعتِ صحرا بھی سِمٹ کر
اِک ذرّۂ مَعدُوم ہے ! بے نام و نِشاں ہے
تَفسیرِ مکافاتِ عمَل کون بتائے
ہر سَمت تو غوغائے صفِ بے خَبراں ہے
ہے عُمر تمنّائے پشیماں کا شُمارہ
اِک درد ورائے ہُنرِ چارہ گراں ہے
وہ حُسن ! حجابوں میں بھی بے پردہ نظر آئے
افلاک کے پردے میں نِہاں ہے نہ عَیاں ہے
گردوں سے پرے جادۂ خورشیدِ تخیّل
منزل تو غُبارِ رہِ ِآشُفتہ سَراں ہے
انجم ؔ! کوئی تعبیر مرے خوابِ گراں کی ؟
دیکھا ہے کہ اِک دُھند کراں تا بہ کراں ہے !
انجمؔ عثمان
,,,,,,,,,,,,,,,,,,,,,,
غزل
سَانحے جِن پہ نہ گُزرے ہوں نہیں جانتے ہیں
ہَم پہ گُزری جو شبِ غَم وہ ہمِیں جانتےہیں
کِس طرح قَعرِ مذَلّت میں گِرا دیتی ہے بُھوک
کب زمیں زادوں کے دُکھ عَرش نشِیں جانتے ہیں
عزّتِ نَفس کُچل جائے تو بَھرتا نہیں گھاؤ
کیا گُزرتی ہے سِتم کیش کہیں جانتے ہیں
باغباں کرتا رہا سَبز رُتوں کو تاراج
وہ بھی دُشمن کے رہا زیرِ نگیں جانتے ہیں
ناؤ یہ پاپ کی آخر کو بَھرے گی اِک دن
اور پھر ڈُوبے گی ہم کو ہے یقیں !جانتے ہیں
بادشاہی کا بَھرم ہَم کو نہيں دے شاہا
ہَم ترے تَخت کو بھی فرشِ زمیں جانتے ہیں
بَزم آرائی نہیں آپ کی فِطرت انجم
آپ کو اہلِ سُخن گوشہ نَشیں جانتے ہیں
,,,,,,,,,,,,,,,,,,,,,,,,,,,,,,,,
