نہ ہماری قسمت بدلی نہ حکمرانوں کے بیانات،محمد صدیق پراچہ

0
1211
مجرموں سے آہنی ہاتھوں سے نمٹا جائے گا ۔۔۔۔
ملک کا دفاع مضبوط ہاتھوں میں ہے ۔۔۔۔۔
شہیدوں کا خون رائیگاں نہیں جائے گا ۔۔۔۔۔۔۔۔۔
ملک انتہائی نازک دور سے گذر رہا ہے ۔۔۔۔۔۔۔
اردو ہماری قومی زبان ہے ۔۔۔۔۔۔۔
پوری قوم افواج پاکستان کے پیچھے سیسہ پلائی دیوار کی طرح کھڑی ہے ۔۔۔۔۔۔
۔بدعنوانی کرنے والوں کو کیفرِ کردار تک پہنچایا جائے گا ۔۔۔۔
قانون کی نظروں میں تمام شہری برابر ہیں ۔۔۔۔۔۔
۔سستا انصاف عوام کی دہلیز تک پہنچایا جائے گا ۔۔۔۔۔
میں 1967 سے اب تک روزانہ تین سے پانچ اخبارات پڑھنے کا عادی ہوں ۔اس وقت میری عمر چھ سالم تھی اور گورنمنٹ پرائمری سکول محلہ سنگیڑھ کوہاٹ شہر میں اول اعلی جماعت کا طالب علم ہونے کے ناطے ہجے کرکے اردو پڑھنے کا شوق نیا نیا تھا کہ اتنے میں عرب اسرائیل جنگ چھڑ گئی ۔اس دور میں والد صاحب کی دکان پر روزنامہ نوائے وقت آتا تھا ۔پاس پڑوس کی دکانوں پر مشرق پشاور ۔حریت کراچی اور جنگ راولپنڈی آتے تھے ۔
سکول سے چھٹی ہوتی تو میں بستہ گھر چھوڑ کر کھانا کھا کر دکان کی طرف بھاگتا تھا ۔اس وقت تک والد صاحب سمیت دیگر دکان دار اپنے اپنے اخبار پڑھ کر فارغ ہو چکے ہوتے تھے اور میری موج لگ جاتی تھی ۔اردگرد کی دکانوں سے اخبارات لے کر میں ان کو کھول کر بچھا دیا کرتا تھا اور ان پر جھک جاتا تھا ۔کیی بار ایسا کرنے اور دکان پر آنے والے گاہکوں پر توجہ نہ دینے یا ان کے لیے اخبار ہٹا کر جگہ نہ دینے پر والد صاحب کی ڈانٹ ڈپٹ بھی سنی اور مار بھی کھائی لیکن اخبار بینی کا نشہ کچھ ایسا چڑھ چکا تھا کہ یہ ڈانٹ ڈپٹ اور مار پھولوں کی طرح محسوس ہوتی تھی
۔اپنی بات شروع کرنے سے پہلے میں نے چند فقرے لکھے ہیں ۔کیا آپ یقین کریں گے کہ میرے مشاہدے کے مطابق 1967 سے 2023 تک کے چھپن برسوں میں ہمارے حکمرانوں کے بیانات کی زبان تبدیل نہیں ہو پائی ۔
ہم نے قسمت بھی ایسی پائی ہے کہ قائد اعظم محمد علی جناح کے انتقال کے بعد سے ایک ہی طبقہ پیر تسمہ پا بن کر ہماری گردنوں پر سوار ہے ۔ نہ اس کی ہوس اقتدار ختم ہونے کے کوئی آثار نظر آتے ہیں اور نہ ہی اس بات کا بظاہر کوئی امکان نظر آتا ہے کہ ہمیں من حیث القوم اپنی حالت بدلنے کا خیال ہی آیا ہو۔ اب ایسے میں حکمران بے چارے بھی کریں تو کیا کریں کہ انہیں ایسی رعایا ملی ہوئی ہے ۔جس پر دنیا جہاں کی خرابیوں کا مرقع ۔جھوٹے ۔ بدکردار ۔ شراب کے رسیا ۔ ٹیکس چور ۔خود غرض اور پانچوں شرعی عیب رکھنے والے افراد سول و ملٹری بیوروکریسی اور سیاسی نٹوں کی صورت میں حکومت کررہے ہیں اور یہ ساری رعایا اپنے اپنے پسندیدہ دیوتاؤں کی جملہِ خرابیوں کو بھول کر انہی کے دیگر ہم پیشہ دیوتاؤں کی غلط کاریوں کا ڈھنڈورا پیٹنے میں مصروف ہیں ۔ اور رعایا بے چاری یہ نہیں جانتی کہ سارا حکمران طبقہ اصل میں ایک ہی ہے ۔ اسی لیے نہ ہماری قسمت بدلتی ہے اور نہ حکمرانوں کے بیانات میں کوئی تبدیلی آتی ہے ۔
SHARE

LEAVE A REPLY