اپنی ہی آگ میں ظلم جل جائے شاید نئے سال میں
یہ کرپشن وطن سے نکل جائے شاید نئے سال میں
یہ بھی ممکن ہے کہ جابروں کو حساب اپنا دینا پڑے
جبر کو صبر میرا نگل جائے شاید نئے سال میں
اُس مسیحا کے انے کا ہو معجزہ یہ بھی امکان ہے
روشنی میں اندھیرا یہ ڈھل جائے شاید نئے سال میں
یہ محبت کی دستار سر پر سجائے ہوئے صف شکن
پاؤں میں نفرتوں کو کُچل جائے شاید نئے سال میں
بے حیا حاکموں کے لہو میں بھی شاید حیا گھر کرے
برف کوہ ندامت کی بھی اب پگھل جائے شاید نئے سال میں
منصفوں کے دلوں میں اُتر آئے خوف خدائے ابد
عدل و انصاف کا سکہ چل جائے شاید نئے سال میں
ایسا ممکن نہیں پھر بھی صفدر یہ خواہش ہے زندہ مری
اب غریبوں کی قسمت بدل جائے شاید نئے سال میں
صفدر ھمٰدانی
