آفتاب کے آنے تک بس اتنا ہی کر پائی تھی ۔۔ ۔۔ پر ابھی بھی بہت کچھ کرنا باقی تھا ۔۔
مجھے کتنے ہی ایسے کام یاد آرہے تھے جو پایہ تکمیل تک نہ پہنچے تھے ۔۔
کچھ خیال ابھی دل و دماغ میں بیج کی طرح رکھے تھے جو بارآور نہ ہوئے تھے ۔ میں ڈیسک ٹاپ کے سامنے بیٹھی خالی نظروں سے کمپیوٹر اسکرین دیکھ رہی تھی ۔ یہی سکرین کبھی میرے لئے زندگی کی نوید لاتی تھی ۔
میرے افسانے ۔۔
میری شاعری ۔۔
میرے این این سی (نگہت نسیم یوٹیوب چینل ) کے سارے پرگرام کی تفصیل موجود تھی ۔
کئی کتابیں لکھ رکھی تھیں ۔۔۔جنہیں کوویڈ کی وبا نے ایک طرف لگا رکھا تھا۔
کیا میرے لفظوں میں اتنی حیات اور تازگی ہے کہ میرے بعد زندہ رہ پایئں گے ؟
کیا میں دوبارہ ایک بھرپور زندگی کی طرف لوٹ کر آسکونگی ؟
کتنے ہی سوال راہ میں آپڑے تھے جن کے جواب بھی صرف میرے ہی پاس تھے ۔
ایسے سوال جو ہمیں ہر وقت یاد رہنے چاہیئے لیکن کبھی یاد نہیں رہتے ۔۔ اور اس وقت شدت سے یاد آرہے تھے ۔
اپنے بہن بھایئوںکو وٹس اپ پر وائس میسج بھیج چکی تھی ۔۔میرے بھائی کہہ رہے تھے کہ ہم میں سب سے زیادہ تو آپ ایکٹو ہیں ۔
پھر ایسا کیسے ؟
ہفتے میں تین دن پرسنل ٹرینر مونیکا کے ساتھ جم ٹرینگ
بہت اعتدال سے کھانا پینا
بہت ہی جلد سو جانا کہ صبحساڑھے پانج بجے جم جانا ۔۔ ٹھیک سات بجے واپسی ۔۔ پھر تیار ہو کر ہسپتال نوکری پر جانا ۔
الحمدوللہ گھر اور باہر سب سکون اور آرام تھا
ہسپتال کی نوکری بھی من پسند اور محبت عزت کرنے والا عملہ
سیر سیاحت کے سلسلے بھی دراز رہتے تھے
افسانے ، شاعری ، عالمی اخبار، ریڈیو ، ٹی وی ، یو ٹیوب چینل اور میڈیکل لیکچرز ۔۔ زندگی ہر رنگ میں بکھری پڑی تھی ۔
پھر کیسے ۔۔ بھلا ۔۔ یہ کینسر ہمارے درمیان رہنے آ گیا تھا ؟

ہسپتال کی نرس یونٹمنیجر جورجینا ٹرینک جو میری بہت عزیز دوست بھی ہے اسے بھی میسج بھیج دیا کہ وہ کل پورے سٹاف اور میڈیکل ڈایئریکٹر پیٹر میکول کو بتا دے کہ ڈاکٹر نگہت نسیم کو کینسر ہوا ہے اور اسے نہیں معلوم کہ نوکری پر کب واپس آ سکے گی۔۔
پھر اپنے قریبی دوستو ں کے وٹس اپ گروپ میں بھی لکھ دیا ۔۔۔ میں جانتی تھی کہ سب بے یقینی کی کیفیت میں ہونگے ۔
پر ایسا ہو چکا تھا ۔۔۔
یوں لگ رہا تھا جیسے کینسر نہیں کتاب حیات کا نیا باب کھل چکا تھا ۔ اور یہ سب اتنا اچانک ہوا تھا کہ کئی ابواب کو مکمل پڑھنا مشکل ہو رہا تھا۔
میں دعاگزار تھی ۔۔
میرے رب مجھے ہمت دینا جس بہادری اور مسکراتے ہوئے میں نے زندگی گزاری ہے میں اسی بہادری اور مسکراتے ہوئے مرنا چاہتی ہوں ۔
مجھ پر یہ سچ آشکار ہو چکا تھا ۔۔۔
موت زندگی کی سب سے بڑی سچائی ہے اور مجھے اسی سچائی سے سامنا تھا ۔۔ جو سب سے مشکل تھا ۔۔
میں نے جانا کہ مرنا سب سے مشکل کام تھا اور آسان ترین تھا مرنے کی باتیں کرنا ۔۔ یہ کہنا کہ ایسا ہونے سے اچھا ہوتا جو میں مرجاتی ۔۔ تم نے ایسا کیا تو میں مرجاؤنگی ۔۔ لیکن حقیقتا مرنا سب سے مشکل ترین مرحلہ تھا ۔
زندگی کی رنگینیاں ۔۔رشتوں کی خوبصورتیاں پاؤں کی بیڑیاں بنتے دیکھ رہی تھی ۔
ایک پل تو یوں لگا جیسے سب سے آسان موت خود کشی تھی کہ ایک پل میں فیصلہ دوسرے پل میں اس پر عمل ۔ ۔۔
لیکن نہیں ۔۔ بلکل نہیں ۔۔
میں خود کلامی کے سفر پر تھی
خود کشی کی موت میں اپنے احتساب کا وقت نہیں ملتا جو مجھے اس وقت مل رہا تھا ۔
مجھے لگا جیسے میرے خدا نے مجھ پر ایک بار پھر اپنی رحمتوں کی بارش کر دی ہو ۔۔
مجھے معافی ، وصیت اور نصیحت کا انمول وقت اور مہلت بخشی ہو ۔
میرا رواں رواں اپنے رب کا شکرگزار ہو رہا تھا ۔۔
میری آنکھیں اپنے رب کے حضور چھلک پڑیں ۔۔
اس وقت میرے ساتھ گھر میں وہی ایک غمگسار اور دلدار تھا جو میرے لئے ہی نہیں پوری کائینات کے لئے کافی تھا ۔۔ جو دلوں کا سکون ہے ۔۔۔ میرا بھی سکون بن گیا ۔
سب حیران تھے کہ میں نے اپنی بیماری کو چھپایا نہیں تھا ۔۔ اور میں سوچ رہی تھی کہ جب صحت بیماری اسی کی طرف سے ہے تو میں کیوں چھپاؤں ۔۔ اور یقیننا جنہیں معلوم ہوگا ، مجھ سے اپنی رنجشوں کو بھلا کر وہ میری صحتیابی کے لئے دعا ہی کریں گے ۔۔ بیماری میں بھی خیر ہی تھی ۔۔ توبہ اور معافی کے کئی در کھل جاتے ہیں ۔۔
میں ابھی اور بھی جانے کیا کیا سوچتی کہ لاہور سے دلشاد کا فون آ گیا ۔۔ اس کی آواز بھرا گئی ۔۔ میں اس کی اشکبار آنکھیں محسوس کر سکتی تھی ۔۔ ہم دونوںسے چھوٹی بہن نزہت جسے پیار سے ہم سب گڑیا کہتے ہیں اس کا روتا ہوا میسج بھی آ گیا ۔۔ باری باری سب اپنا پیار مجھ پر لٹا رہے تھے ۔۔ میرا دل گواہی دے رہا تھا سب کو امی ابا جی کارخصت ہونا یاد آرہا ہے او ان کے لئے مجھ سے جدا ہونا مشکل ترین تھا ۔ ۔
لیکن میں پر عزم تھی ۔۔میرے خدا نے مجھے کمال مہربانی سے بکھرے کاموں کو سمیٹنے کا موقع دیا تھا ۔۔ میری روح کا عزم بتا رہا تھا کہ میں آپریشن سے پہلے پہلے زیادہ سے زیادہ کام نپٹانا چاہتی ہوں ۔
میں نے اپنی کاپی پر سارے کام ترتیب سے لکھنے شروع کر دیئے تاکہ بھول نہ جاؤں اور میرے بعد کسی کو پریشانی کا سامنا ہو ۔۔ ایک سکون سا اطراف میں پھیل گیا تھا ۔
جو بات سب سے اچھی ہوئی ۔۔ وہ تھی ۔۔ آفتاب کے گھر پہنچنے تک میں پورے خلوص سے کینسر کو قبول کر چکی تھی ۔
میں نے یقین کر لیا کہ میرے بچوں کا پہلا گھر رحم مادر
( یوٹرس / Uterus )
کی دیواریں بوسیدہ ہو گئی ہیں ۔۔ ان میں کینسر کی پھپھوند لگ چکی ہے ۔۔ اگر اسے نہ نکالا تو پورا جسم کائی جیسا زہریلا ہو سکتا ہے ۔ اور میں نے رحم مادر سے آپریشن کی اجازت بھی لے لی تھی ۔۔
اب مجھے فکر تھی تو بس یہ کہ بچوں کو کیسے بتایا جائے کہ انہیں کم سے کم دھچکہ لگے ۔۔ منیب ، نجیب اور آمنہ یقیننا بہت بے چین ہو جایئں گے ۔ ۔ میرے بچوں نے صرف زندگی کو ہنستے مسکراتے دیکھا ہے ۔۔اپنوں کو مرتے ہوئے کبھی نہیں دیکھا تھا ۔ ہم دونوں جب سیر کرنے کسی دوسرے ملک جاتے تو سب یوں ایئر پورٹ چھوڑنے آتے جیسے لوٹ کر نا آ سکیں گے ۔ ہم دونوں نے انہیں یہ تو سکھا دیا کہ گریس فل زندگی یعنی اللہ پاک کے فضل و رحمت میں کیسے جیتے ہیں لیکن گریس سے کیسے مرتے ہیں یہ سکھانا باقی تھا ۔۔۔ اور میری خوش قسمتی دیکھئے کہ یہ زمہ داری بھی میرے ہی حصے میں آئی ۔۔
مجھے یاد ہے ۔۔ جب بچے چھوٹے تھے تو میں نے ہی ان کو کلمہ ، نماز ، روزہ ، قران ، صدقہ خیرات اور اخلاق سب سکھایا تھا ۔۔ پھر جب بچے بڑے ہوئے تو ہم آپس میں ایک دوسرے سے سیکھنے لگ گئے ۔ ہر بار نیا فلسفہ ، کوئی نئی بات ، کسی نئی دریافت پر گھنٹوں گفتگو ہوتی ۔ نجیب تو باقائدہ کوکنگ سیکھ رہا تھا ۔۔ اور اس کی کتاب مکمل ہونے کو تھی ۔ اس کا خیال تھا کہ آفتاب فیملی کی دیسی کھانوں کی وراثت نسلوں تک پہنچنی چاہیئے ۔ ۔۔ میں اس کی باتیں یاد کر کے ہنس پڑی ۔۔۔
وقت تیزی سے گزر رہا تھا ۔۔ ایکبار پھر ہمت کا دامن پکڑا اور خود کو تیار کرنے لگی ۔
اب مجھے انہیں دائمی جدائی کا فلسفہ بھی سمجھانا تھا۔
مجھے انہیں یہ بھی بتانا تھا ۔۔۔ کہ ۔۔ زندگی موت کے بعد بھی ہوتی ہے ۔۔
میرے خدا میری مدد کیجئے ۔۔ میرے بچوں کے لئے تسلی بھیج دیجئے ۔۔
میرے خدا
کچھ دل
کچھ روحیں
بہت اداس اور بےچین ہیں
یارب ۔۔!
خاموش سماعتوں کو صدائیں عطا ہوں
اداس تنہا راتوں کوماہ تمام عطا ہو
یارب ۔۔!
کچھ خاموش دعائیں ہیں
تیری بارگاہ میں رکھ رہی ہوں
ہجر گزیدہ کو متاع صبرعطا ہو
الہی آمین
جاری ہے
ڈاکٹر نگہت نسیم














نگہت تمہارا لکھا ہوا ایک ایک لفظ۔ قطرہ قطرہ بن کہ دل پر گر رہا ہے اور دعائیں لے رہا ہے۔
ایک بات تو بتاو دوست کیا جنہیں کینسر نہیں ہوتا وہ لوگ نہیں مرتے؟
کیا یہ سب سب جو تیاری کر رہی ہو اس کے لئے کینسر ہونا ضروری ہے ؟ ارے یار مرنا بر حق ہے۔ ہم سب کو واپس اپنے سونے رب کی محبت بھری آغوش میں تا حیات رہنا ہے۔
Written words never die
Hence every word written on paper ( I think paper is more durable n reliable than internet)
So please get your written work printed n published. Books written thousands of years back are read today. I dont know about paperless life.
سنو شہذادی میں بہت محبت سے تمہارے لکھی ہوئ آپ بیتی کو نوبل پرائز دے رہی ہوں ایڈوانس میں کیونکہ۔ آج تک اتنی معلومات سے بھر پور کسی نے سوانح عمری نہیں لکھی ہوگی۔
انداز بیان، لفظوں کا چناو
احساس، خلوص اور کہ بچوں کو پیاروں کو تکلیف نہ ہو۔
سبحان اللہ
اللہ پاک کو تم پر اور پیار آرہا ہوگا کہ کتنی محبت کرنے والی اسکی بندی ہے۔
خوش رہو بہادر بیٹی
Beautiful words beautiful heart and beautiful soul 🌹❤️🌹
قابل صد احترام آپا جی ۔۔ آپ کی پسندیدگی اور دعایئں کسی بھی نو پرائز سے بڑھ کر ہے ۔
بہت بہت شکریہ
بہت پیار اور دعایئں
ڈاکٹر نگہت نسیم
نگہت ۔۔میری بہادر دوست اللہ تمھیں مکمل صحتیابی عطا کرے گا۔۔مجھے اس کا یقین ہے ۔۔یہ ایک آزمائش ہے جس سے تم گزر نے لگی ہو۔۔ہماری اور لاکھوں کی دعائیں تمھارے ساتھ ہیں۔۔انشاءاللہ سب اچھا ہوگا۔۔۔لو یو
صرف پیار
زندگی, اس کی حقیقت ہے , کہ ویسی ہو گی
جس کا جو موت کے بارے میں تصور ہو گا
ہمت کر کر کے اقساط پڑھ رہی ہوں ۔جذبات اور احساسات کی کا، یہ اظہاریہ اس سے پہلے کہیں نہیں ملا ۔آپی یہ فقط ایک بیماری کے دنوں کی کہانی نہیں ہے آپ نے کوزے کے اندر دریا بند کردیا ہے ۔اتنا ڈوب کر لکھاہے کہ خود پر کیفیت طاری ھونے لگی ہے ۔مولا آپ کو ہمت اور توانائ دے ۔جیئں ہزاروں سال۔آپ نے ہمیشہ مجھے مایوسی سے نکالا ہے ۔۔۔آج آپ اجتماعی طور پر نہ جاکتنے مایوس لوگوں کو ہمت اور توانائ اس تحریر کے ذریعے، دے رہی ہیں صدقہ جاریہ نہیں تو اور کیا ہے ۔