اب تو ہر سمت ہے شبیرؓ کا سجدہ بیٹھا

سلام
ریت آنکھوں میں پڑی کَرب میں اُٹھا بیٹھا
شرم سے ظلم کا چڑھتا ہوا دریا بیٹھا
منتظر تھا اسی ساعت کا عروجِ اسلام
آگ خیموں میں لگی کُفر کا بھٹہ بیٹھا
فتحِ حق لکھی تھی شبیرؓ نے خود ماتھے پَر
تھام کے سینہ جب آنکھوں کا اُجالا بیٹھا
صَبر کے بوجھ سے اس طرح کمر ٹوٹی کہ بس
پھر نہ اُٹھا کبھی بیعت کا جو ناقہ بیٹھا
کربلا سُن کے دَہل جاتے ہیں کچھ لوگ ابھی
خوف سا جیسے کہ دل میں ہو کسی کا بیٹھا
اب بھی محتاط قدم رکھتا ہے دشمن ڈر سے
جب سے ساحل پہ ہے اُن آنکھوں کا پہرہ بیٹھا
کربلا کے سوا ملتی بھی کہاں جائے اَماں
پایا شبیرؓ نے ہر موڑ پہ فتنہ بیٹھا
زلزلے چوم کے لوٹ آئے ترا نقش قدم
ظلم جس راہ چلا تھا وہی رستہ بیٹھا
ماں بھلا دیکھے گی کیا سینۂ اکبرؓ کا شگاف
خشک ہونٹوں کو جو دیکھا تو کلیجہ بیٹھا
شاخ گریہ سے بہت پوچھتی ہے بادِ صبا
وہ جو اشکوں کا پرندہ تھا کہاں جا بیٹھا
چھِد گئے گردن بے شیر،دل اُمِّ رباب
تیر بھی ٹھیک نشانے پہ کچھ ایسا بیٹھا
شعلہ جرم نے پھر چین سے رہنے نہ دیا
حُرملہ اُٹھا تڑپ کر جو ذرا سا بیٹھا
اقتدار آتا ہے ہر صبح کو سجدہ کرنے
دل میں کچھ اس طرح زینبؓ کا ہے سکہ بیٹھا
ظلم کیا بولے گا اب دیکھ کے دربارِ حسینؓ
اُس کی آواز تو بیٹھی ہی تھی لہجہ بیٹھا
دل کے ہمراہ ہمیشہ رہا شبیرؓ کا غم
دَرد نے کب اُسے پایا کبھی تنہا بیٹھا
جائے،کس راہ سے نکلے گا کوئی منکر حق
اب تو ہر سمت ہے شبیرؓ کا سجدہ بیٹھا
٭رضا قیصرزیدی
( مرحوم )