نوشہرہ میں دریائے کابل کا پشتہ نوشہرہ کلاں کے مقام پر ٹوٹ گیا، اور سیلابی پانی آبادی میں داخل ہوگیا ہے۔
دریائے کابل سے 2 لاکھ 70 ہزار کیوسک ریکارڈ کیا گیا پانی کا بہاؤ اٹک کے مقام پر پہنچ چکا ہے، اور دوسری طرف کابل کا پشتہ نوشہرہ کلاں کے مقام پر ٹوٹ گیا ہے، جس کے بعد سیلابی پانی مقامی آبادیوں میں داخل ہوگیا ہے۔
حفاظتی پشتہ ٹوٹنے سے لوگوں میں خوف و ہراس پھیل گیا ہے، اور سیلاب کی تباہی سے بچنے کے لئے عوام اپنی مدد آپ کے تحت محفوظ مقامات پرمنتقل ہورہے ہیں۔
پانی کا بہاؤ اس قدر شدید تھا کہ سیلابی پانی آبادی میں بڑی تیزی سے داخل ہونا شروع ہوگیا، اور علاقے میں قائم جنازہ گاہ، اسکولوں اور گھروں کو اپنی لپیٹ میں لے لیا ہے۔
پانی کے بہاؤ کا 100سالہ ریکارڈ ٹوٹ گیا
دریائے کابل میں اٹک کے مقام پر سیلابی ریلے کا بہاؤ دو لاکھ 70 ہزار کیوسک ریکارڈ کیا گیا ہے، اور پانی کی سطح میں مسلسل اضافہ ہو رہا ہے۔
ماہرین کا کہنا تھا کہ دریائے کابل میں پانی کے بہاؤ کا 100سالہ ریکارڈ ٹوٹ گیا ہے، اور سو سال بعد یہ صورتحال دیکھنے میں آئی ہے۔
دوسری جانب تربیلا سے چھوڑا جانےوالا 4 لاکھ 18 ہزار کیوسک پانی بھی آج دوپہر تک اٹک پہنچے گا، جس کے بعد مجموعی طور پر 6 لاکھ سے زائد کیوسک کا سیلابی ریلا کالا باغ بیراج کی طرف بڑھے گا۔
,,,,,,,,,,,,,,,,
سوات میں سیلاب اور لینڈ سلائیڈنگ سے 15 افراد جاں بحق اور درجنوں مکان و ہوٹلز تباہ ہو گئے۔
ضلعی انتظامیہ کے مطابق سوات میں سیلاب سے 130 کلومیٹر کی سڑکیں تباہ ہوگئیں جبکہ 15رابطہ پل مکمل یا جزوی طور پر تباہ ہو گئے۔
سیلابی ریلے سے 100 سے زائد مکانات اور دیگر عمارتیں تباہ ہوئیں جبکہ 50 کےقریب ہوٹلز تباہ ہو گئے۔
کالام میں دریا کنارے بنے ہوٹل تباہ و برباد ہوگئے، بحرین میں بھی سیلابی ریلا راستے میں آنے والی ہر شے تنکوں کی طرح بہا لے گیا۔
سوات میں درجنوں درخت جڑ سے اکھڑ گئے، گلیاں اور سڑکیں دریا کا منظر پیش کرنے لگیں، گاڑیوں کو بھی سیلابی ریلا اپنے ساتھ لے گیا جبکہ سوات کا سب سے بڑا ایوب برج بھی بند ہو گیا۔
ادھر سوات ایکسپریس وے لینڈ سلائیڈنگ کی وجہ سے پلائی کے مقام پر جزوی طور پر بند کر دی گئی، ضلع بھر میں ہنگامی حالت نافذ کر دی گئی ہے۔
