اے محمد اے سوارتوسن وقت رواں
اے محمداے طبیب فطرت ونباض جاں
اے محمد اے فقیہ نفس و نقاد جہاں
موت کو تونے وہ بخشی آب وتاب جاوداں
زندگانی کے پجاری موت پر مرنے لگے
لوگ پیغام اجل کی آرزو کرنے لگے
۔۔۔۔۔۔۔۔۔۔۔۔۔۔۔۔۔
نوع انساں کو دیا کس فلسفی نے یہ پیام
مرد غازی کا کفن ہے خلعت عمر دوام
نصب کس نے کر دیۓ مقتل میں حوروں کے خیام
جانتے ہو اس دبیر ذہن انسانی کا نام
جو انوکھی فکر تھا جو اک نیا پیغام تھا
اس حکیم نکتہ پرور کا محمد نام تھا۔
۔۔۔۔۔۔۔۔۔۔۔۔۔۔۔۔۔۔۔
تو نے انساں کو تمناۓ شہادت بخش دی
اس تمناۓ شہادت نے شجاعت بخش دی
اور شجاعت نے پھبکنے کی حرارت بخش دی
اس حرارت نے گداؤں کو حکومت بخش دی
اس قدر عجلت سے تو روۓ زمیں پر چھاگیا
مدعی چکراگۓ تاریخ کو غش آگیا
۔۔۔۔۔۔۔۔۔۔۔۔۔۔۔۔
اہل نخوت ہیں سوار ابلق لیل و نہار
اور تو فقدان ہمت سے مجسم انکسار
تیری آنکھوں میں نہیں لرزاں بغاوت کے شرار
سر ہے تیرا اور پاۓ صاحبان اقتدار
قوت باطل پہ جو انسان چھا سکتا نہیں
حشر میں وہ مصطفےٰ کو منہ دکھا سکتا نہیں
۔۔۔۔۔۔۔۔۔۔۔۔۔۔۔
کربلا اب بھی حکومت کو نگل سکتی ہے
کربلا تخت کو تلووں سے مسل سکتی ہے
کربلا خاک تو کیا آگ پہ چل سکتی ہے
کربلا وقت کے دھارے کو بدل سکتی ہے
کربلا قلعہء فولاد ہے جراروں کا
کربلا نام ہے چلتی ہوئی تلواروں کا
۔۔۔۔۔۔۔۔۔۔۔۔۔۔۔۔۔
اہل دل سے کہہ رہی ہے یہ مورخ کی زباں
بعد پیغمبر ہوئی تھیں کس طرح سرگوشیاں
چھاگیاتھا ہرطرف کس طرح دولت کا دھواں
کیا دبے پاؤں چلے تھے سازشوں کے کارواں
اب بھی ان امواج میں ڈوبی پڑی ہے کربلا
ہاں انہیں کی ایک تاریخی کڑی ہے کربلا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
داورا ہلچل ہے پھر برپا میان مشرقین
ہر نظر ہے ایک ماتم ہر نفس ہے ایک بین
تخت پر سرمایہ داری ہے بصد اجلال و زین
اور ٹس سے مس نہیں ہوتے محبان حسین
ہے یہی ایمان تو ایمان کو میراسلام
اک فقط ایمان کیا قرآن کو میرا سلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیا نماز شاہ تھی ارکان ایمانی کے ساتھ
دل بھی جھک جاتاتھا ہرسجدے میں پیشانی کے ساتھ
اہل بیت پاک کے ہر ایک قول و فعل کو
ہاں ملا کر دیکھ لو آیات قرآنی کے ساتھ
جوش ہم ادنیٰ غلامان علیِ مرتضےٰ
تمکنت سے پیش آتے ہیں جہاں بانی کے ساتھ
شاعر آفاق جوش ملیح آبادی
انتخاب۔۔رضامہدی باقری
