گجرات کی ادبی فضا میں ایک نام ادب سرائے گجرات کا بھی ہے جس میں سے اگر احمد باقی نکال دیں تو باقی کچھ نہیں رہتایہ ان کی کاوش کا نتیجہ ہے کہ طویل تعطل کے بعد اچانک ان کی جانب سے ادب سرائے گجرات کے اہم اجلاس کے انعقاد کااعلان کیاگیااور موضوع کیادیا”جھوٹ بولے بندہ کاٹے”بلکہ اسی پر بس نہیں کیااجلاس کی تاریخ یکم اپریل رکھی اور مقام تھاگجرات ریلوے اسٹشن کا پلیٹ فارم نمبر ایک۔۔۔۔۔۔۔۔۔۔۔
یاالہی لاج رکھنا کہیں موضوع کی طرح اور تاریخ کی مناسبت سے اپریل فول ہی نہ بنایاگیاہوشام کو باقی بھائی سے فون پر کنفرم کیاجنھوں نے پراعتماد لہجے میں اجلاس کے انعقاد کا عندیہ دیاخیر اسٹشن جانے سے قبل چھپ کر تانک جھانک بھی کی کہ آخری لمحات تک یقین نہ تھاکہ کہیں ہم کو فول بناکر ہماری حالت کا مزہ تو نہیں اٹھارہے کیونکہ ہم ٹھرے سداکے فول جو ہمیشہ ہی جلدی سے اپنے محبان کی باتوںکوایمان کی حد تک سچ مان لیتے ہیں اور جب اپنے بیوقوف بننے کا علم ہوتاہے تب تک ہمارے فول بننے کے جھنڈے لہرارہے ہوتے ہیں لیکن ایک میں کیایہاں پوری قوم کا یہ حال ہے ‘فول بننا’خیر باقی بھائی اور دوسرے دوستوںپر نظر پڑی توہم بھی بزم کا حصہ بن گے۔اس اجلاس کی کارروائی باقی بھائی کے الفاظ میں کچھ یوں تھی۔۔۔۔۔۔۔۔
“ادب سرائے گجرات کے باقاعدہ ماہانہ اجلاس بند ہو جانے کے بعد 2022 میں من چاہی بنیاد پہ اجلاس شروع کیے گے ہیں۔
یکم اپریل 2022(اپریل فول ڈے )کو من چاہا پہلا اجلاس ریلوے اسٹیشن گجرات پہ ہوا۔ جو کہ شام 07:00 سے رات 09:00 بجے تک رہا۔
اجلاس کا موضوع تھا۔
”سچ بولے بندا کاٹے”
اس نشست میں احباب نے سیر حاصل گفتگو کی، سچ کیوں ضروری ہے ؟ سچ اور حقیقت میں فرق کیا ہے ؟ جھوٹ کی ضرورت کیوں کر پیش آئی ہوگی ؟ پہلا جھوٹ کیوں بولا گیا ہوگا ؟ بدلتی اقدار کے اور جھوٹ کے بے شمار ثمرات کے باوجود سچ کو ہی کیوں پسند کیا جاتا ؟ اور آخر کار ہم سب بہت سے جھوٹ بولنے کے بعد ان سے مستفید ہونے کے بعد سچ ہی کیوں بول کے سکون محسوس کرتے ہیں ؟۔سیاست اور مذہب میں سچ اور جھوٹ کا کردار کیا ہے۔؟ اور ان جیسے کئی دیگر سوالات پہ خوب بحث رہی آف دی ریکاڈ بڑے بڑے جھوٹ صفائی کے ساتھ بولنے کا مقابلہ بھی ہوا جس میں ہم سب ہی ناکام رہے اور خوب ہنستے رہے جس سے معلوم ہوا کہ ہم جھوٹے جب کہیں مل بیٹھیں تو آپس میں جھوٹ بولنا ہمارے لیے مشکل ہو جاتا ہے۔اس گپ شپ کے ساتھ بسکٹ اور چائے کی چسکیوں کے ہمراہ پہلے اسٹیشن کی گہما گہمی اور پھر اس کی ویرانی سے لطف اندوز بھی ہوئے۔اس نشست میںشامل اراکین میں
سکندر ریاض چوہان صاحب
ایم خالد فیاض صاحب
عثمان خالد صاحب
ڈاکٹر فیصل ریاض
اور خاکسار (راقم )تھے،ان کے علاہ چند فٹ کی دوری پہ ٹی سٹال کا پڑھا لکھا مالک ہمارا نوجوان دوست، شہزاد اور کانسٹیبل بھٹی صاحب کی سماعتیں شامل رہی ہیں۔اگلی من چاہی نشست اور موضوع کا اعلان کسی بھی وقت اچانک سے کیا جاسکتا ہے۔”
اس نشست میں احباب سے میرا سب سے اہم سوال یہ تھاکہ “جھوٹ کی ایجاد اور ضرورت کیوں محسوس کی گئی؟”
کافی بحث وتمہیدکے بعد ہم اس نتیجے پر پہنچے کے جھوٹ کی ضرورت اور ایجاد کے پیچھے دواہم ترین عوامل کارفرماہیں اول اقتدار جس کو جاہ پرستی کہہ لیںحکمرانی کہہ لیں،قابوکرناکہہ لیں یا کوئی بھی اصطلاح کہہ لیں مقصد اپنے آپ کو سب سے بہتر رکھنااور دوسرا وسائل وخزائن پر اختیار یعنی دولت وثروت پر کلی قابورکھنااور یہ دونوں عوامل جہاں پر ملتے ہیں اس نکتہ عروج کو عام طور پر’لالچ’کہاجاتاہے۔حاکمیت کی خاطر جب لالچ کی دیگ کو چولہے پرچڑھایاجاتاہے سوانگ اور جذبات کی آتش پراس میںجھوٹ کے پارچہ جات کے ساتھ مظلومیت، ناانصافی،عوام کو شریک اقتدار کرنے کے خواب،روزگار کی سہولیات،ٹھکانے کے خواب،دودھ وشہد کی نہروں،کاروبار کی فراوانی،دولت کی چمک،بہشت بریں کی سی زندگی اور دیگر مصالحہ جات ڈال کر ان میںآسائشات،فراغت مہنگائی کے خاتمے،مراعات میں اضافے جیسے مائعات کا شوربہ تیار کیاجاتاہے اور اس کو مزید پرلطف بنانے اورعوام کے جذبات ونفسیات کو سامنے رکھتے ہوئے مذہب کا تڑکہ لگاکر اس طعام کو سب سے بہتر قوم،جنت کے حقدار، مذہبی فلاحی ریاست،دنیاپر حکمرانی اور دشمنوں کی تباہی جیسے نان کے ساتھ مخالفین کوحقارت کے گھونٹ کے ساتھ غدار،چور اور کافر کے لقموںکو حلق میں ٹھونساجاتاہے جس کو ہم فول بن کرخوب چباچباکرنگل جاتے ہیں،اور نشہ دوآتشہ رکھنے کے لئے جھوٹ کے سہارے سنہرے خواب دکھائے جاتے ہیں،بیانیے بنائے جاتے ہیںجن کو اتنا دہرایاجاتاہے کہ جھوٹ سے دامن چھڑانامشکل ہوجاتاہے حالانکہ ہم جان چکے ہوتے ہیں کہ ہم جھوٹ کی پکڑ میں ہیں مگر خود کو صیحح ثابت کرنے اورفول کہلوانے سے بچنے کی خاطر خود فریبی،ہٹ دھرمی اور ضد پر قائم رہتے ہیںلیکن جب یہ غذاء ہضم ہوکر بد ہضمی بناتی ہے تو ایک طویل علاج سے کسی قدر افاقہ ممکن ہوپاتاہے مگر کیاکیجئے اس بیماری کے دورانئے کاجس میں ہم اپنامعاشی،جسمانی،ذہنی اور اخلاقی نقصان کرچکے ہوتے ہیں۔اس کے نقصانات کا مشاہدہ اور سبق ہم کو جنرل ضیا کی آمریت سے سیکھناہوگاجس کے نقصانات اوراثرات آج تک مٹ نہیں سکے مگر کسی قدر افاقہ ہونے ہی کو ہوتاہے کہ کوئی دوسراہم کو سیدھاراستہ دکھاکر جنگلوں میں لے جاتاہے جہاںہم پھر سے وحشت زدہ ایک دوسرے کو کاٹنے میں لگ جاتے ہیں،مگر سچ یہ ہی ہے کہ جب ہم جھوٹے مل بیٹھتے ہیں تو جھوٹ بھی ٹھیک بول نہیں سکتے اور سچ کو آخرکارمانتے ہی بنتی ہے کیونکہ ہم بالآخرانسان ہیں اور مجبوراً ہی سہی اس کے دامن سے لگے رہنے میں ہی عافیت ہے اور سچ یہ ہے ہم کو پہلے اپنے آپ کو جانناہوگااور اپنی مذہبی،سیاسی،معاشی واخلاقی فکر جیسے بنیادی امور کو خود پر لاگوکرناہوگاتاکہ ہم جھوٹے اپنے جھوٹ سے جان چھڑاکر سچ کے سیدھے راستے پر چل سکیں۔













