بِلال میرا وہ مولا نَجف میں رہتا ہے

دَیارِ عِشق کا آقا نَجف میں رہتا ہے
مرے حَضور کا پیارا نَجف میں رہتا ہے

سَلام کے لئے دُنیا نہ کیوں نَجف آئے
اِمامِ عَصر کا دادا نَجف میں رہتا ہے

جو شاہ ِ کَرب و بَلا ہے شہادتوں کا اَمین
اُسی حُسین کا بابا نَجف میں رہتا ہے

نَبی کے عِلم کا جِس سے چَراغ روشن ہے
وہ شمَع دِیں کا اُجالا نَجف میں رہتا ہے

جِسے رَسول نے خیبر میں خود نَوازا عَلم
وہ دست_ خالق_ یکتا نجف میں رہتا ہے

سَند سے جِس کی وِلایت مِلی ہے وَلیوں کو
وہ ہر ولی کا وَسیلہ نَجف میں رہتا ہے

ہے فَرض جِس کی محبت ہر ایک مومن پر
بِلال میرا وہ مولا نَجف میں رہتا ہے

بلال رشید