ڈاکٹر نگہت نسیم تمہیں‌کینسر ہے ! قسط نمبر 1

ڈاکٹر نگہت نسیم ایک زندہ دل فرد ہیں اور انکی زندگی کی ہر جہت منفرد ہے۔ ڈاکٹر ہونے کے ناطے انکا یہ حال ہے کہ وہ مریض کے ساتھ خود مریض بن جاتی ہیں۔ میں نے انکو اپنے مریضوں کے لیئے روتے اور دعائیں کرتے دیکھا ہے۔ مجھے یہ بھی علم ہے کہ وہ اپنے کتنے ہی مریضوں کو اپنا کھانا دے دیتی ہیں انکی مالی مدد کرتی ہیں۔ ڈاکٹر نگہت نسیم پیسہ کمانے کی مشین ہر گز نہیں ہیں بلکہ پیسہ خرچ کرنے کی مشین ہیں اور مولا علی کے اس فرمان پر عمل کرتی ہیں کہ پیسہ خرچ کیا کرو تا کہ مزید پیسہ آئے۔ بہت کم لوگ جانتے ہیں کہ وہ چیرٹی کا کتنا کام کرتی ہیں، کچھ بچوں کے تعلیمی اخراجات بھی اٹھا رکھے ہیں اور بنام خدا اسکے علاوہ بھی بہت سے کام کرتی ہیں

وہ یہ سب کچھ کبھی کسی کو نہیں بتاتی ہیں اور مجھ جیسے دوست کو بھی اجازت نہیں یہ سب بتانے کی۔ لیکن آج میں نے یہ بتانا یوں ضروری سمجھا کہ گزشتہ دو ڈھائی ماہ سے وہ جس امتحان سے گزری ہیں اس میں کامیابی انکو ان ہی کاموں کی وجہ سے ملی ہے کہ اللہ پاک واقعی شہ رگ کے قریب ہوتا ہے۔ میں خوش قسمت ہوں کہ نگہت کے گھر کا بہت اہم فرد تصور ہوتا ہوں اور وہ کتنی ہی باتیں اہل خاندان سے قبل اس فقیر سے کر لیتی ہیں اور ایسا ہی کینسر کی خبر پر ہوا اور ہم نے طے کیا کہ علاج پر مکمل توجہ دی جائے سب کو بتانے کی بجائے۔

کینسر کا لفظ ہی انسان کو پچاس فیصد مار دیتا ہے لیکن نگہت یہ جاننے کے بعد کہ انکو کینسر ہے جیسے مزید طاقتور ہو گئیں اور جیسے اللہ کریم نے انکے لیئے فٹا فٹ راستے بنائے اور پھر کامیاب آپریشن ہوا اور انشااللہ نوید یہی ہے کہ وہ مکمل صحتیاب ہیں

ہم دونوں نے طے کیا کہ اس امتحان کی روداد لکھی جائے اور اس طرح لکھی جائے کہ پڑھنے والوں کو معلومات بھی ملیں مرض سے آگاہی بھی ہو اور ایسی صورت حال میں حوصلہ بھی میسرہو۔ یہی سوچ کر نگہت نے اپنی آپ بیتی لکھنی شروع کی ہے عالمی  اخبار کے لیئے۔ مجھے یقین ہے کہ انکا انداز تحریران جاں گُسل مراحل کو بھی آپکے لیئے سہل بنا دے گا

میں ذاتی طور پر اور عالمی اخبار کے ادارتی عملے کی جانب سے ڈاکٹر نگہت نسیم کی مکمل صحت یابی کے لیئے دعا گو ہوں اور شکر گزار ہوں کہ انہوں نے اپنی آپ بیتی کی اشاعت کے لیئے ایک بار پھر عالمی اخبار کو عزت دی

سلامت رہیں خوش رہیں

دعا گو صفدر ھمدانی

مدیر اعلیٰ۔ عالمی اخبار 

……………………

تیس مئی دوہزار بائیس ( 30 مئی 2022 ) بروز پیر ، سڈنی کے وقت کے مطابق تین بج کر پچیس منٹ پر میری اپوایئنمنٹ اپنی جی پی (جنرل پریکٹیشنر ) ڈاکٹر مدحت سید کے ساتھ مور بینک شاپنگ ویلج میڈیکل سینٹر میں طے تھی کہ مجھے تین دن کی چھٹیوں‌کے بعد مزید دو دن کا سرٹیفیکٹ چاہیئے تھا کہ کچھ دن اور آرام کر سکوں ۔ یہ الگ بات کہ آرام گھریلو سا ہی مطلوب تھا ۔۔ پورے گھر میں کپڑوں کی الماریاں بے ترتیب سی ہو رہیں تھیں ۔۔ کتنے ہی کپڑے پہننے میں نہیں آ رہے تھے ، دل ہی دل میں انہیں بانٹ بھی چکی تھی ۔ اور چادروں والی الماری میں تو مانو ایک کہرام سا برپا تھا ۔ تولیوں کی جگہ سنگل بیڈ کی چادریں اور سنگل کی جگہ کویئن بیڈ کی چادریں اپنی بے گھری کا شکوہ کر رہی رہیں تھیں ۔۔تولیوں‌کا حال تو بیان ہی سے باہر تھا۔۔سفید رنگین سب ایک دوسرے سے رل مل چکے تھے ۔ اور یہ بھی سوچا کہ الماریوں کو ٹھیک کرنے کے ساتھ ساتھ کچھ کھانے بنا کر آفتاب کو حیران بھی کرونگی ۔۔۔

گھر میں اب تھا ہی کون ہم دو کے سوا۔ بچے تعلم اور جاب کے سلسلے میں گھر سے دور جا بسے تھے اور جب جس کو جو جو وقت ملتا گھر کا چکر لگاتے پر فون اور وٹس اپ گروپ پر یوں خبر گیری رہتی جیسے ہم سب ساتھ ساتھ ہی رہ رہے ہوں ۔ ٹیکنالوجی نے محبت کرنا اور نبھاہنا آسان سا کر دیا تھا ۔۔ ماں باپ کو سکون سا دے رکھا تھا ۔۔ چیٹ ۔۔فون اور فیس ٹائم زندگی کا حصہ ہو گئے تھے ۔ لوگ کہتے ہیں ٹیکنالوجی نے احساسات کے ساحلوں پر دبے پاؤں آکر لمس کے نشان مٹا دیئے ہیں پر مجھے لگتا ہے جیسے لمس سے آشنائی اسی کی وجہ سے ممکن ہو پائی تھی۔ مجھے لہجوں اور لمس کی پہچان اسی ٹیکنالوجی نے سیکھائی تھی ورنہ تو زندگی میں صرف ہجر ہی آباد رہتا ۔

سچ ہی تو تھا زندگی کی منسائن یہی تو ہے ۔۔۔ ہاں یاد آیا منسائن کا لفظ میری دوست شاہین خان کی زبان سے پہلی بار سنا تھا جس کے معنی “‌رونق “‌ کے ہیں ۔۔۔ اس نے بھی اپنی ساس صاحبہ جو اس کی ممانی بھی ہیں ان سے سنا تھاکہ وہ ہندی کے لفظ بہت آسانی اردو سے ایسے ملاتی ہیں کہ رشک ہونے لگتا ۔ ان کا کہنا تھا کہ گھر ہو کہ دنیا منسائن صرف بے ترتیبی اور نئے پن میں تھی اور مجھے ان سے اتفاق تھا ۔

سرجری کی انتطار گاہ میں حسب معمول اور حسب توقع بہت رونق تھی ۔۔۔ اس کا مطلب کچھ بھی ہو لیکن میرے نزدیک ڈاکڑوں‌ اور اسٹاف کا اچھا ہونا تھا یعنی مستعد اور بااخلاق عملہ ۔۔ میں نے چاروں‌ طرف دیکھا ۔۔ لوگ اپنے اپنے موبائل میں الجھے سلجھے بیٹھے تھے ، کچھ لوگ ٹی وی دیکھ رہے تھے ، اور کچھ ریسیپشن استقبالیہ پر اپنی باری آنے کا باربار پوچھ رہے تھے ۔ مجھے اپنے ہسپتال کا اپنا چھوٹا سا یونٹ یاد آگیا اور اپنا اسٹاف اور اپنے مریض بھی ۔۔ لیکن اس وقت میں مریض تھی اور ایک یہی بات مجھے اچھی نہ لگتی تھی یعنی رول کی ادلا بدلی ۔ لیکن کیا کیجئے قانونی طور پر ہم ڈاکٹر ہوتے ہوئے بھی اپے لیئے کوئی نسخہ تجویز نہیں کر سکتے ۔۔ اب میں مسکرا رہی تھی ۔

ایسے میں اچانک فون کی گھنٹی بجی ۔۔۔۔۔ میں نے موبائل فون کو یوں دیکھا جیسے پہلی بار بجا ہو
اسکرین پر میری گائیناکولوجسٹ ڈاکٹر رابعہ شیخ کا نمبر جمگا رہا تھا
میرا دل زور سے دھڑکا ۔۔ اور فون سننے کے لئے میں سرجری سے باہر نکل آئی ۔۔ سامنے پارکنگ تھی ۔۔ ٹریفک دھیرے دھیرے بڑھ رہا تھا۔۔ سردیوں کی شام بھی ڈھلنے والی تھی اور وقت چار بج کر چھ منٹ‌ تھا ۔۔ لیکن ڈاکڑ رابعہ کیوں مجھ سے بات کرنا چاہتی ہے ۔۔۔ ڈرنے کی بات تھی شاید ۔۔۔ نہیں شاید ۔۔۔
ہیلو نگہت
جی رابعہ
نگہت کیا آپ میری کلینک پر ابھی اسی وقت آ سکتی ہیں
نہیں رابعہ یہ ممکن نہیں ۔۔ آفتاب آٹھ بجے تک آفس سے آیئں گے اور اب تو ہلکی ہلکی بارش بھی شروع ہو گئی ہے ۔۔ اور ویسٹ‌میڈ‌ ہسپتال بہت دور ہے
اچھا پھر پانچ بجے زوم پر آ جانا ضروری بات کرنی ہے
کیامیری رپورٹ آ گئی ہے رابعہ
ہاں آ گئی ہے اور اسے ہی ڈسکس کرنا ہے ۔۔ اچھا پھر پانچ بجے ذوم پر بات ہوتی ہے
رابعہ اگر رپورٹ اچھی نہیں آئی ہے تو ابھی سے بتا دو
اچھا نگہت بات ہوتی ہے ۔۔ہو سکے تو آفتاب بھائی کو بلا لینا
فون بند ہو چکا تھا ۔۔۔
شاید میرا دل بند ہونے والا تھا

جاری ہے
ڈاکٹر نگہت نسیم