یہ اہل سیاست یہ ملاں
اُمت کو بیچ کے کھاتے ہیں یہ اہل سیاست یہ ملاں
شیطان کو بھی بہکاتے ہیں یہ اہل سیاست یہ ملاں
کرسی میں انکی جان ہے اور کرسی کے لیئے ہی جیتے ہیں
کرسی کے لیئے مر جاتے ہیں یہ اہل سیاست یہ ملاں
کب انکو ضرورت ہے کوئی لکھے ہے قصیدہ انکے لیئے
خود اپنے قصائد گاتے ہیں یہ اہل سیاست یہ ملاں
ہتھیار بھی نفرت ہے انکا نفرت کی تجارت کرتے ہیں
نفرت کی دُکاں چمکاتے ہیں یہ اہل سیاست یہ ملاں
سچ بات تو یہ ہے ہم نفسو کیا خوف خدا ہے انکے لیئے
جب آپ خدا کہلاتے ہیں یہ اہل سیاست یہ ملاں
ان اہل ہوس کی نظروں میں ہے مال عوام بھی حق انکا
ہاں مال خدا کھا جاتے ہیں یہ اہل سیاست یہ ملاں
کردار میں یکساں ہیں دونوں جو کہتے ہیں وہ کرتے نہیں
وعدوں سے فقط بہلاتے ہیں یہ اہل سیاست یہ ملاں
زنبیل میں انکے رہتا ہے انبار دلائل کا صفدر
بتلاؤ تو کب شرماتے ہیں یہ اہل سیاست یہ ملاں
صفدر ھمدانی
