یوں تو بچپن سے ہی ہم سنتے پڑھتے چلے آئے ہیں کہ رمضان المبارک برکتوں کا مہینہ ہے اور فرمان الہی ہے کہ اس مہینے میں اللہ پاک ابلیس کو مقید کر دیتا ہے۔ سچ پوچھیں تو ابلیس ضرور مقید ہوتا ہے ابلیسیت شاید زیادہ فعال ہو جاتی ہے
رمضان آتے ہی منافع خور ابلیسیت کا لباس زیب تن کرتے ہیں اور یہ بھول جاتے ہیں کہ یہ رحمتوں اور برکتوں کا مہینہ ہے جس میں روزہ داروں کو آرام اور سہولت دینا کار ثواب ہے لیکن نہ جانے یہ کیسے مسلمان ہیں کہ عوام کی چیخیں نکلوا دیتے ہیں
ہر سال ہم سب یہی واویلا سنتے ہیں اور خود بھی سہتے ہیں اور افسوس ہوتا ہے کہ ہر حکومت اس ضمن بے دست و پا لگتی ہے اور انتہائی ناکام کہ قیمتوں پر کنٹرول کر سکے
میں ابھی فیصل آباد سے واپس آئی ہوں اور اپنے قیام کے دوران وہاں لوگوں کو پھلوں اور سبزیوں کی قیمتوں میں اضافے کا رونا روتے دیکھا
اب لاہور واپس آ کر جب اخبار میں یہ خبر دیکھی تو فیصل آباد کے لوگوں کے رونے کا احساس مزید شدید تر ہو گیا
لیجئے یہ خبر من و عن آپ بھی پڑھ لیجئے
۔۔۔۔۔
فیصل آباد میں منافع خوروں نے پھلوں اور سبزیوں کی قیمتوں میں پچاس فیصد تک بڑھا دی ہیں، رمضان المبارک میں ضلعی انتظامیہ اور مارکیٹ کمیٹیاں قیمتیں کنٹرول کرنے میں مکمل ناکام دکھائی دیتی ہیں۔
رمضان المبارک کی آمد کے ساتھ ہی مہنگائی کے نام پر، منافع خوروں نے عوام کی جیبوں پر ڈاکہ ڈالنے کے لئے کمر کس لی۔ پھلوں، سبزیوں سمیت اشیاء خورونوش کی قیمتوں میں پچاس فیصد تک اضافہ کر دیا۔ فیصل آباد میں ایک ہفتے کے اندر، سیب 200 روپے سے بڑھ کر 350 روپے کلو ہو گئے، کیلا ڈیڑھ سو روپے درجن تک جا پہنچا اور فالسہ 320 روپے کلو تک فروخت ہونے لگا۔
کجھور 70 روپے کے اضافے سے 250 روپے کلو تک پہنچ گئی، سبزیوں میں گرمی کی سوغات کریلے 70 روپے فی کلو سے بڑھ کر 150 روپے ہو گئے۔ کھانوں کا لازمی جز لہسن اور ادرک کی قیمت میں 50 سے 60 فیصد اضافہ کر دیا گیا ہے۔ لہسن 100 روپے اضافے کے ساتھ 225 روپے کلو
جبکہ ادرک 60 روپے اضافے کے ساتھ 190 روپے کلو ہو گیا۔
گرمی کا توڑ لیموں 320 روپے کلو تک جا پہنچے، گاہک کہتے ہیں دکاندار مارکیٹ کمیٹی کی طرف سے جاری کردہ نرخ نامے آویزاں کرنے کی بجائے خود ساختہ قیمتیں مقرر کر کے پھل اور سبزیاں بیچتے ہیں۔
دوسری جانب دکاندار حضرات کہتے ہیں اگر پھلوں سبزیوں کی قیمتوں کو کنٹرول کرنا ہے تو انتظامیہ آڑھتیوں کو قابو میں کریں۔
رمضان المبارک میں مہنگائی کے جن نے بے قابو ہو کر جہاں غریب عوام کے لیے مشکلات پیدا کر دی ہیں وہیں انتظامیہ کے سب اچھا کے دعووں کی قلعی کھول دی ہے۔
شاہین اشرف علی
