حکمران جماعت تحریک انصاف نے ڈسکہ کے حلقہ این اے 75 میں دوبارہ الیکشن کرانے کے فیصلے کیخلاف اپیل دائر کرنے کا فیصلہ کیا ہے۔
ڈسکہ سے قومی اسمبلی کے حلقہ این اے 75 سے پی ٹی آئی کے امیدوار علی اسجد ملہی الیکشن کمیشن کے فیصلے کیخلاف اپیل دائر کریں گے۔
خیال رہے کہ الیکشن کمیشن آف پاکستان نے این اے 75 کے ضمنی الیکشن کو کالعدم قرار دیتے ہوئے وہاں 18 مارچ کو دوبارہ الیکشن کرانے کا فیصلہ کیا ہے۔
وزیراعلیٰ پنجاب کی معاون خصوصی فردوس عاشق اعوان کی جانب سے جاری بیان میں کہا گیا ہے کہ ہم الیکشن کمیشن کے فیصلے کا احترام کرتے ہیں، تاہم قانونی چارہ جوئی پی ٹی آئی کا حق ہے اور اپیل کا فیصلہ پارٹی مشاورت سے کیا جائے گا۔
ڈاکٹر فردوس عاشق اعوان نے اپنی ٹویٹ میں کہا ہے کہ ڈسکہ ضمنی الیکشن پر الیکشن کمیشن کے فیصلے پر ہمارے تحفظات ہیں۔ تحریک انصاف کے امیدوار علی اسجد ملہی قانونی آپشن استعمال کرتے ہوئے فیصلے کے خلاف سپریم کورٹ میں اپیل کرینگے۔
ان کا کہنا تھا کہ ڈسکہ کے عوام نے تحریک انصاف کے حق میں فیصلہ دیا لیکن فاتح امیدوار کو حلقے کی نمائندگی سے روکنا سمجھ سے بالاتر ہے۔
