توہین رسالت کے مقدمے میں سپریم کورٹ سے بری ہونے والی مسیحی خاتون آسیہ بی بی نے پاکستان سے جرمنی منتقل ہونے کی خواہش کا اظہار کیا ہے۔
اتوار کے روز یہ بیان ان کے وکیل کی جانب سے ایک جرمن اخبار میں شائع ہوا ہے۔ آسیہ بی بی کا مقدمہ لڑنے اور پھر پاکستان سے یورپ منتقل ہونے والے سیف الملوک نے کہا کہ آسیہ بھی اگر اپنے اہل خانہ کے ساتھ جرمنی منتقل ہو جاتی ہیں، تو وہ اس پر خوش ہوں گی۔
سن 2010ء میں ایک ضلعی عدالت سے موت کی سزا پانے والی آسیہ بی بی کو چند روز قبل پاکستانی سپریم کورٹ نے بری کرنے کا حکم سنایا تھا۔ اس عدالتی حکم کے بعد پاکستان بھر میں پرتشدد مظاہرے ہوئے تھے۔
